Akif Nağı: "Əli Kərimli müəyyən tapşırıqlar yerinə yetirib, işin içərisində onun öz funksiyası olub"
Oxu24.az-ın məlumatına görə, AXCP sədri Əli Kərimlinin evində aparılan axtarış zamanı bir məktub tapılıb. Tapılan məktubun məzmunu, məlumatlara görə, Ramiz Mehdiyevin Rusiyaya yazdığı və mətbuatda yayılan məktubu ilə eynidir.
Bu məqamlar Əli Kərimlinin Ramiz Mehdiyev ilə işbirliyində olduğu barədə şübhələri gücləndirib. Hadisə ilə əlaqədar Əli Kərimli DTX-ya aparılıb.
Bundan əlavə, məqalədə bildirilir ki, Ramiz Mehdiyev işi çərçivəsində Əli Kərimliyə qarşı ayrıca epizod üzrə cinayət işi başlanılıb.
Bu epizod nədən ibarət ola bilər?
Hadisə ilə bağlı yayılan mənbələrdə “ayrı bir epizod”un konkret nədən ibarət olduğu açıqlanmayıb. Məlumatlarda yalnız qeyd olunur ki, Əli Kərimlinin evində tapılan materiallar, xüsusilə Ramiz Mehdiyevin Rusiyaya yazdığı məktubun ilkin versiyası və digər sənədlər Mehdiyev işi üzrə ayrıca bir istiqamət yaratdığı üçün onun barəsində də cinayət işi açılıb.
Bu epizodun mahiyyəti barədə yayılan qeyri-rəsmi ehtimallar əsasən üç istiqamətdə cəmlənir:
- Əldə olunan materialların Mehdiyev-Kərimli arasında gizli siyasi koordinasiya kimi qiymətləndirilməsi və bunun “hakimiyyəti ələ keçirməyə yönəlmiş fəaliyyət” ittihamı ilə əlaqələndirilməsi.
- Tapılan sənədlərin hər hansı maliyyə əməliyyatları, vasitəçilik və ya qeyri-şəffaf əlaqələrə işarə etməsi və bunun “çirkli pulların leqallaşdırılması” maddəsi üzrə ayrıca epizod kimi ayrılması.
- Məktubun ilkin versiyasının xarici dairələrlə əlaqə və ya xarici təsir elementlərini ehtiva etməsi səbəbindən “dövlətə xəyanət” işi çərçivəsində ayrıca istiqamət kimi araşdırılması.
Hansı variantın real olduğunu demək mümkün deyil, çünki istintaq epizodun məzmununu açıqlamayıb. Hazırda ictimaiyyətə məlum olan tək şey odur ki, tapılmış sənədlər “cinayət məsuliyyəti yaradan əlaqə əlamətləri” kimi qiymətləndirilib və bu səbəbdən Əli Kərimli barəsində ayrıca bir istiqamət açılıb.
Məsələ ilə bağlı siyasi şərhçi Akif Nağıya sual ünvanladıq. O, baki-xeber.com-a bildirdi ki, məsələ yalnız istintaq orqanlarına dəqiq məlumdur və yəqin bu barədə ictimaiyyətə açıqlama veriləcək:
“Belə görünür ki, Əli Kərimli ümumən bu işin içərisindədir. O, Ramiz Mehdiyevin komandasında onun görünməyən tərəfi olub. Kərimli müəyyən tapşırıqlar yerinə yetirib, işin içərisində onun öz funksiyası olub.
Ayrıca epizod Milli Şuranın yaradılması və fəaliyyəti ilə bağlı ola bilər. Yaxud "Dövlət Şurası" adlanan qurumun yaradılmasına cəhddə iştirakla bağlı ola bilər. Həmçinin müxalifətin daxilində hansısa parçalanma meyllərinə təşəbbüs göstərmək və ya buna dəstək verməklə əlaqədar ola bilər. Amma istintaqın gedişində hər şey aydınlaşacaq, müəyyən məsələlər ortaya çıxacaq.
Bu proses cəmiyyətdə birmənalı qarşılanmır, müəyyən kəsim Əli Kərimlini müdafiə etməyə çalışır. Amma söhbət ondan gedir ki, hər kəs üçün dövlətin və dövlətçiliyin maraqları öndə olmalı, şəxsi və qrup maraqları arxa plana keçməlidir. Dövlətçilik üçün təhlükə yaradan hər hansı bir şəxs və ya hərəkət ictimaiyyət tərəfindən qınanmalıdır. Bizim üçün ən vacib məsələ dövlət maraqları və dövlətçiliyin möhkəmlənməsidir. Azərbaycan dövləti bu gün hər tərəfdən təhdidlərə məruz qalır - bir tərəfdən Qərb, şimaldan Rusiya, cənubdan İran... Belə bir vəziyyətdə ölkənin daxilində dövlətçiliyimizə qarşı kimlərsə qeyri-qanuni, təxribatçı və düşmən hərəkətləri ilə ittiham olunursa, bunu hər kəs başa düşməlidir – ya dəstək verməlidir, ya da heç olmasa mane olmamalıdır. Məsələnin mahiyyəti bundan ibarətdir.
Azərbaycan hökuməti çox ağır bir işin öhdəsindən gəlib - torpaqlarımızı 30 illik işğaldan azad edib. Bu, Azərbaycan vətəndaşı üçün baş tutması mümkün görünməyən bir xəyal idi. İndi isə Böyük Zəfərdən daha ağır olan - işğaldan azad edilmiş ərazilərdə geniş yenidənqurma və bərpa işləri ilə məşğuldur. Belə bir şəraitdə ölkə daxilində hansısa müxalifət və ya hökumət daxilində olan qüvvələr, vicdanını itirmiş adamlar xarici ölkələrin sifarişini yerinə yetirirlərsə, dövlətçiliyə zərər vururlarsa, bunun qarşısı mütləq alınmalıdır və bu proses gedir. Çətin bir prosesdir, Rusiya kimi bir dövlət faktiki olaraq Azərbaycana qarşı hərəkətlərdə ittiham olunur. Bu işdə Rusiya tərəfindən böyük təzyiqlər olacaq. Kimlər bu gün sosial şəbəkələrdə Ramiz Mehdiyevin və Əli Kərimlinin həbsi ilə bağlı haray-həşir qaldırırsa, onlar haradasa xarici mərkəzlərdən idarə olunurlar, bunu başa düşmək lazımdır. Dövlətin maraqları hər kəs üçün öndə olmalı, şəxsi və qrup maraqları arxa plana keçməlidir.” - deyə A.Nağı vurğuladı.
Dəniz NƏSİRLİ
