Son vaxtlar İsrailin ard-arda bir neçə ölkəyə hücumlarından sonra bu ölkə mediasında və siyasi çevrələrində növbəti hədəfin Türkiyə olacağına dair müzakirələr başlayıb. İsrail mediasına görə, Qətərə hücumdan əvvəl hədəfdə Türkiyə olub və bununla bağlı planlar da hazırlanıb. Lakin son anda bundan imtina edilib və Doha vurulub.
Bu hücumdan sonra İsrail mediasında növbətin hədəfin Türkiyə olacağı ilə bağlı müzakirələr daha da qızışıb. Ancaq İsraildə də etiraf edirlər ki, Türkiyə İsrailin hədəfi olan digər ölkələr kimi belə bir hücumu cavabsız buraxmaz, Təl-Əvivin kiçik bir həmləsi böyük və dağıdıcı bir müharibəyə çevrilə bilər.
İsrailin "Haaretz" qəzeti də "Qətərdən sonra İsrailin növbəti hədəfi Türkiyə ola bilər. Nəticələri? Fəlakət!" başlıqlı analitik yazısında etiraf edib ki, Türkiyənin yerüstü gücü və bölgədəki nüfuzu Təl-Əviv üçün ciddi problem yaradacaq.
Qəzetin yazdığına görə, son vaxtlara qədər Türkiyə ilə İsrail arasında silahlı münaqişə ehtimalı çox uzaq görünürdü. Bununla belə, qəzet münaqişə toxumlarının illərdir səpildiyini, Ankaranın HƏMAS-a açıq dəstəyinin və Suriyadakı təsirinin İsraili narahat etdiyini yazır. İsrailin Qətərdə HƏMAS liderlərinə hücumunun Ankaraya xəbərdarlıq olduğu iddia edilir. Qeyd edilir ki, əgər İsrail Dohada bu hücumu reallaşdıra bilirsə, onun Türkiyədəki HƏMAS elementlərini də hədəf almayacağına zəmanət yoxdur.
Qəzet yazır ki, Türkiyə ilə İsrail arasında müharibə risqi Suriyada nüfuz mübarizəsindən qaynaqlanır. İsrail Suriyanın hərbi cəhətdən güclənməsini istəmir. Türkiyə isə Suriyada hərbi varlığını ciddi şəkildə artırır. Digər tərəfdən, hər iki ölkənin Suriyada əhəmiyyətli hərbi mövcudluğa sahibdir. Türkiyə ordusu şimalda, İsrail ordusu isə cənubda cəmləşib. Bütün bu amillərə görə, baş verə biləcək Türkiyə-İsrail müharibəsi ilə bağlı təhlildə, Türkiyə ordusunun NATO-da ABŞ-dan sonra ikinci ən böyük yerüstü qüvvələrə sahib olduğu xatırladılır və qeyd edilir ki, bu fakt Təl-Əvivi çətin vəziyyətə salır.
“İki ölkə arasında müharibə Qərbin Yaxın Şərq təhlükəsizlik arxitekturasını darmadağın edəcək və qlobal bazarları alt-üst edəcək. Müharibə Suriyadan kənara, hətta Aralıq dənizinə qədər yayıla bilər. Türkiyə dəniz qüvvələri İsrailin sualtı enerji infrastrukturu ilə toqquşa bilər. Açıq münaqişə ilə yanaşı kiberhücumlar, terror hücumları və proxy müharibələr də arta bilər. Bu vəziyyətdə Misir, Yunanıstan və Körfəz ərəb dövlətləri tərəf seçmək məcburiyyətində qalacaqlar. ABŞ, Rusiya və Çin kimi qlobal güclər də bu burulğana cəlb oluna bilər...
Gərginliyin artması fonunda Türkiyə ilə İsrail arasında hərtərəfli müharibə başlayarsa, bunun nəticəsi sadəcə Yaxın Şərqdə növbəti münaqişə və ya Dohaya birdəfəlik hücum olmayacaq, eyni zamnada qlobal güc balansını sarsıdacaq strateji zəlzələ olacaq... NATO-nu sarsıdacaq, ittifaqları parçalayacaq və güc balansını dəyişdirəcək strateji zəlzələ olacaq" – deyə İsrail qəzeti yazır.
Qeyd edilir ki, bir vaxtlar nəzəri cəhətdən mümkünsüz görünən Türkiyə ilə İsrail arasında müharibə riski artıq çox realdır: “Hələlik çəkindirmə və münaqişələrin qarşısının alınması mexanizmləri işləyir. Bununla belə, ritorika kursu, ittifaqlar və hərbi birləşmələr təhlükəli istiqamətə işarə edir. Açıq qarşıdurma başlayarsa, nəticələr bütün Yaxın Şərq və Qərbin təhlükəsizlik nizamı üçün fəlakətli olacaq”.
TAHİR
