Fuad İbrahimov: “Transxəzər qaz kəmərinin çəkilişi hər zaman perspektivlidir”
Azərbaycan, Türkmənistan və Özbəkistan dövlətləri arasında yeni üçtərəfli əməkdaşlıq formatı yaradılıb.
Qeyd edək ki, 22 avqust tarixində Azərbaycan Prezidenti İlham Əliyev Türkmənistana səfər edib və Türkmənistan və Özbəkistan liderləri ilə görüşlər keçirib.
Azərbaycan,Türkmənistan, Özbəkistan 3-tərəfli format yaranandan sonra Türkmənistan qazının Azərbaycanın üzərindən Avropaya nəqli üçün Transxəzər qaz kəmərinin çəkilişi perspektivi necə ola bilər?
“Azərbaycan artıq bu layihənin icra mexanizmini ortaya qoyub”
İqtisadçı ekspert Fuad İbrahimov “Bakı-Xəbər”ə “Nəzərə alaq ki, birincisi, Transxəzər qaz kəmərinin çəkilişi hər zaman perspektivlidir. Çünki Transxəzər qaz kəmərinin məqsədi, misal üçün, Türkmənistan qazının Avropaya çatdırılması ola bilər”-deyə bildirdi.
F.İbrahimlinin sözlərinə görə, bu gün Avropa məkanı dayanıqlı ödəniş qabiliyyəti baxımından bağlanmış müqavilələrdəki öhdəliyi yerinə yetirə biləcək bir məkan kimi ən əlverişli, cazibədar məkan hesab olunur. O vurğuladı ki, ticarət, biznes, yaxud iqtisadi əlaqələrin bütün istiqamətləri baxımından Avropa məkanı ilə əməkdaşlıq, əlbəttə, səmərəli hesab olunur. “Bu gün hansısa bölgə ilə müqayisədə ticarət və digər sahələrdə partnyor kimi hər kəs ilk növbədə Avropanı üstün tutar. Yəni bu baxımdan perspektivlidir. Digər baxımdan, Azərbaycan artıq bu layihənin icra mexanizmini ortaya qoyub. Bu gün TANAP və TAP üzərindən biz bu prosesi həyata keçiririk. Bu, gələcəkdə hər hansı bir fərziyyə deyil, icra mexanizmli layihədir. Nəhayət, Azərbaycanın, Türkmənistanın, Özbəkistanın bir araya gələrək müəyyən bir üçtərəfli format yaratması bu prosesin icra mexanizminin daha da hərəkətə gətirilməsi istiqamətində böyük bir töhfədir. Biz Türkmənistanla kökümüzdən qardaş hesab olunsaq da, ancaq onunla uzun müddət siyasi müstəvidə bir araya gəlmək çox çətin idi. Burda müəyyən məsələlər vardı. Bu, siyasi preambuladır və onu kənara qoyaq.
Bu gün cənab Prezident tərəfindən bu məqsəd də ustalıqla yerinə yetirilir, Türkmənistan rəhbərliyinin Azərbaycana, Azərbaycan Prezidentinin də Türkmənistana səfəri bu perspektivlərin gündəmə gəlməsini, icra mexanizmini aktullaşdırır. Bu baxımdan hesab edirəm ki, müəyyən razılaşma əldə ediləcək, siyasi göstəricilər dəyərləndiriləcək və bu istiqamətdə mühüm addım atılacaq. O ki qaldı məsələyə iqtisadi nöqteyi-nəzərdən yanaşmağa, əvvəldə dediyim kimi, bu çox əlverişli, perspektivli, icra mexanizmi olan bir layihədir”-deyə F.İbrahimov bildirdi.
İradə SARIYEVA
