Nəsimi Məmmədli: "NATO ilə həmsərhəd olan Ukraynanı Rusiyanın hücumundan qorumaqda çətinlik çəkən Qərbin Gürcüstanı bu mərhələdə aktiv müdafiə etməsi real deyil"
Gürcüstanın Dövlət Təhlükəsizlik Xidmətinin (DTX) rəhbəri Anri Oxanaşvili istefa verib. O, bu barədə Facebook hesabında yazıb:
“İctimaiyyətin nəzərinə çatdırmaq istərdim ki, hakim komanda ilə məsləhətləşmələr əsasında Gürcüstanın Dövlət Təhlükəsizlik Xidmətinin rəhbəri vəzifəsini tərk edərək, Gürcüstan Baş nazirinin milli təhlükəsizlik məsələləri üzrə müşaviri vəzifəsini icra etməyə qərar verdim”, - deyə məlumatda bildirilir.
Gürcüstanın Baş naziri İrakli Kobaxidze keçirdiyi brifinqdə bildirib ki, hakim “Gürcü Arzusu” partiyasının icraçı katibi Mamuka Mdinaradze Dövlət Təhlükəsizlik Xidmətinin yeni rəhbəri olacaq.
Gürcüstanda DTX nazirinin istefasından sonra baş verən proseslər Gürcüstanın xarici siyasətdə hansı yolu seçəcəyini aktual edib. Bəziləri Amerika hökuməti ilə problemə görə Gürcüstanın Rusiyaya meyl edəcəyini deyir. İvanişvilinin rusmeylli olması bu ehtimalı gücləndirir. Gürcüstanda nə baş verə bilər?
Siyasi şərhçi Nəsimi Məmmədli məsələ ilə bağlı baki-xeber.com-a açıqlamasında bildirdi ki, Gürcüstanda əhalinin əksəriyyəti Avropa İttifaqına sıx inteqrasiyanın tərəfdarıdır: ”İndiki hakimiyyət də məhz bu kursa sadiq olduğuna görə cəmiyyətdən siyasi dəstək alıb. Faktiki olaraq, 2008-ci il 8 avqustda Rusiyanın Gürcüstanla qısamüddətli müharibəsindən sonra iki ölkə arasında diplomatik əlaqələr kəsilib. 12 ildən çoxdur iqtidarda olan mövcud hakimiyyət Rusiya ilə diplomatik əlaqələr qurmayıb, əksinə, Aİ ilə daha sıx inteqrasiyaya nail olub".
Ekspert bildirdi ki, hazırkı ziddiyyətli və mürəkkəb geosiyasi şərtlər altında Gürcüstan hökumətinin davranışlarını anlamaq olar: "Rusiyanın Ukraynaya hücumu göstərdi ki, digər postsovet respublikaları mümkün qədər Rusiyanı qıcıqlandıracaq addımlardan çəkinir. NATO ilə həmsərhəd olan Ukraynanı Rusiyanın hücumundan qorumaqda çətinlik çəkən Qərbin Gürcüstanı bu mərhələdə aktiv müdafiə etməsi real deyil.
Gürcüstan hökuməti Rusiyadan gələ biləcək təhlükələrə qarşı Çinlə və region dövlətləri ilə siyasi əlaqələri dərinləşdirməyə üstünlük verir. Gürcüstanın Aİ, NATO və ABŞ-la münasibətləri regiondakı geosiyasi proseslərə adekvat olacaq. Keçən il seçkilərdə 54%-lə qalib gələn “Gürcü Arzusu” müxalifətin davamlı etirazlarına baxmayaraq iqtidarda qalmağa nail oldu. Avropa Şurası, Avropa İttifaqı və ABŞ Gürcüstan müxalifətinə fəal dəstək vermədi. Qərbin Gürcüstandakı siyasi proseslərə birmənalı yanaşması yoxdur. Qərbin tərəddüdlü və ehtiyatlı yanaşmalarından Gürcüstan hökuməti də öz maraqları baxımından sui-stifadə edir.
Müxalifətin indiki geosiyasi şərtlər altında iqtidara gəlməsinin Gürcüstan üçün arzuolunmaz nəticələr doğura biləcəyini istisna etməyən Qərb dairələri, İvanişvilinin rəhbərlik etdiyi iqtidarın da təzyiq altında qalmasında maraqlıdır.
Avropa İttifaqının Gürcüstan hökumətinə vizasız rejimin saxlanılması üçün verdiyi müddət 31 avqustda başa çatır. Hökumətin bu istiqamətdə heç bir müsbət addım atmadığını əsas götürən müxalifət yenidən aktiv etirazlara hazırlaşır. "Dəyişikliklər Koalisiyası" yaxud 8 müxalifət partiyası sentyabrın 13-də etiraz aksiyası keçirməyi planlaşdırır.
Gürcüstan hökuməti hazırkı xarici siyasətinə köklü dəyişikliyi o halda edə bilər ki, ona ciddi təhlükəsizlik qarantiyası verilsin. Bu qarantiyanı isə yalnız ABŞ administrasiyası verə bilər. ABŞ administrasiyası bunu hansı halda edə bilər? Tramp və Putin arasındakı müxtəlif təmaslardan sızan informasiyaların təhlili göstərir ki, onların müzakirə etdiyi önəmli məsələlər arasında Cənubi Qafqaz da var. Tərəflər arasında hansı məsələlərin müzakirə edildiyi və razılaşdırıldığı, hələ ki, aydın deyil. Məhz Gürcüstan hökmətinin yaxın dövrdə atacağı addımlardan bunu müəyyən etmək mümkün olacaq".
Akif NƏSİRLİ
