Məhərrəm Zülfüqarlı: “Trampın bu mesajı ilk növbədə Putinədir ki, böyük lider sülhə gedənə, sülh yaradana deyirlər”
ABŞ prezidenti Donald Tramp Azərbaycan prezidenti İlham Əliyevə “İlham, sən böyük lidersən” başlığı ilə fotoşəkillər göndərib. Bu barədə Əliyev X sosial şəbəkəsindəki səhifəsində məlumat verib. Amerika liderinin göndərdiyi fotolarda Tramp, Əliyev və Ermənistanın baş naziri Nikol Paşinyan ABŞ vasitəçiliyi ilə Ermənistan və Azərbaycan arasında paraflanmış sazişi imzaladıqdan sonra əl-ələ veriblər.
Bununla bağlı Azərbaycan Prezidenti İlham Əliyev ABŞ Prezidenti Donald Trampa minnətdarlığını ifadə edib. Prezident Əliyev "X" sosial səhifəsindəki hesabında bu barədə paylaşım edərək yazıb:
“Prezident Donald Trampa şəxsi imzası ilə mənə hədiyyə etdiyi tarixi fotoşəkillərə və üzərində yazdığı xoş sözlərə görə təşəkkür edirəm. Prezident Donald Trampın Azərbaycan ilə Ermənistan arasında münasibətlərin normallaşdırılmasına, habelə Cənubi Qafqazda və dünyada sülh gündəliyinə verdiyi qətiyyətli dəstəyini yüksək qiymətləndirir və buna görə ona bir daha dərin minnətdarlığımı bildirirəm”.
Xatırladaq ki, avqustun 8-də Ağ Evdə Donald Tramp, Nikol Paşinyan və İlham Əliyev İrəvanla Bakı arasında münaqişənin sülh yolu ilə həllinə dair paraflanmış saziş imzalayıblar. ABŞ Prezidenti Donald Tramp sosial şəbəkə hesabında İlham Əliyevlə həmin mərasimdə çəkilən şəkilini paylaşaraq, "İlham, sən böyük lidersən" (Ilham, You are Great Leader) sözlərini yazıb. Tramp bu sözlərlə kimlərə hansı mesajları verir?
“Bu mesaj həm də Rusiyanın Ermənistanda qızışdırdığı qüvvələrə ünvanlanıb”
Tarix elmləri doktoru, professor, siyasi ekspert Məhərrəm Zülfüqarlı “Bakı-Xəbər”ə bildirdi ki, ABŞ prezidenti Donald Trampın, İlham Əliyevin və Nikol Paşinyanın görüşündə bir sıra yeni məsələlərə şahidlik etdik. “Vaşinqtonda - “Ağ Ev”də gedən söhbətlərdə Azərbaycan Prezidentinin hamıdan üstün olduğunu gördük. Bir məqamı vurğulayım, sənədləri imzalayıb ayağa duran kimi İlham Əliyev pencəyinin düyməsini bağladı, bu, protokol qaydasıdır, beynəlxalq münasibətlərdə etik normalardandır. Yəni İlham Əliyev bunların hamısını bilir və zamanında bunlardan dərs deyib. Amma digər iki rəhbər ayağa durdular, pencəklərinin düymələrini bağlamadılar, heç nə olmamış kimi davrandılar, sanki adi bir məclisdədirlər. Yəni bu, bizim Prezidentin bir üstünlüyü. Trampın İlham Əliyev haqqında bir neçə dəfə xoş sözlər söyləməsi və “İlham, sən böyük lidersən” deməsi təsadüfi deyil. Çünki İlham Əliyev kimi şəxsiyyətlər, siyasi liderlər hazırda çox azdır. Yəni öz torpaqlarını öz gücünə xalqla birlikdə işğaldan azad edən siyasi lider XXI əsrdə çox azdır, bəlkə də yeganədir. Son illər biz ikinci belə hadisənin şahidi olmamışıq. Biz 44 günlük Vətən müharibəsi və lokal antiterror tədbirləri ilə həm ərazi bütövlüyümüzü bərpa etdik, həm də Azərbaycana düşmən olan qüvvələri ölkədən çıxardıq. Bu, İlham Əliyevin böyük şəxsiyyət, böyük lider olmasını təsdiqləyən birinci amildir. İkincisi, Azərbaycan təyyarəsinin Rusiya tərəfindən vurulmasından sonra bütün dünya Prezident İlham Əliyevin tutduğu qətiyyətli mövqeyi gördü. Rusiyanın böyük dövlət olmasına və bizə qarşı hər cür pislik etməkdən çəkinməməsinə baxmayaraq, Prezident qətiyyətlə öz xalqını, dövlətimizin milli maraqlarını qorudu, müdafiə etdi, qətiyyət göstərdi. Həmçinin Cənubi Qafqazda gedən proseslərdə uzun illər Rusiyanın inhisarında olan bir məsələnin Rusiyadan ayrı həll olunmasına imza atdı. Yəni Rusiyanın Cənubi Qafqazdan çıxmaq fikri yox idi, indi də yoxdur. Ancaq artıq Cənubi Qafqazda olan üç respublikadan ikisinin bu sənədə imza atması bilavasitə Prezident Əliyevin təşəbbüsü idi. Bu onun güclü lider olduğunu göstərir...”
M.Zülfüqarlı deyir ki, artıq Rusiya Azərbaycana qarşı münasibətləri yumşaltmağa çalışır, hətta əməkdaşlıq məsələlərini müzakirə edir və bu yaxınlarda belə müzakirələrdən biri Həştərxanda keçirilib. M.Zülfüqarlı qeyd etdi ki, Rusiya geriyə addım atır, onun geriyə addım atması da İlham Əliyevin güclü lider, böyük şəxsiyyət olduğunu göstərir. “Mən əminəm ki, Zəngəzur dəhlizi (Tramp yolu) açıldıqdan sonra Azərbaycanın dünya dövlətləri içində Çindən Avropaya qədər uzanacaq tranzit yolda əsas söz yiyəsi olmaqla mövqeyi daha da güclənəcək.
İlham Əliyevin böyük və güclü lider olması faktını onun dostları ilə yanaşı düşmənləri də qəbul edir. Biz də bir xalq olaraq Prezidentin yanında olmalıyıq, hər kəs öz sahəsində Prezidentə dəstəyini əsirgəməməlidir”-deyə M.Zülüqarlı bildirdi.
Trampın “İlham, sən böyük lidersən” deməsinin hansı ölkələrə mesaj olmasına gəlincə, M.Zülfüqarlı bildirdi: “Trampın bu mesajı ilk növbədə Putinədir ki, böyük lider sülhə gedənə, sülh yaradana deyirlər. Bu mesaj həm də Rusiyanın Ermənistanda qızışdırdığı qüvvələrə ünvanlanıb. Bəli, böyük lider sülh yaradan liderdir.
Hüseyn Cavid deyirdi:
Kəssə hər kim tökülən qan izini
Qurtaran dahi odur yer üzünü”.
M.Zülfüqarlının fikrincə, bu mesaj Ermənistanı silahlandıran, müharibəyə təşviq edən Avropa liderlərinə də ünvanlana bilər, amma əsas ünvanlandığı yer Rusiyadır. “Tramp, sülh yaratdığı üçün İlham Əliyevə “İlham, sən böyük lidersən” deyir. Əslində, ABŞ prezidenti həm də bununla Azərbaycanın əldə etdiyi qələbənin rəsmiləşməsinə böyük bir dəstək verir”-deyə professor Zülfüqarlı bildirdi.
İradə SARIYEVA
