Mətbuatın builki yubileyi əvvəlkilərdən çox fərqli oldu...
Məlumdur ki, 1875-ci il iyulun 22-də görkəmli ədib və ziyalı Həsən bəy Zərdabinin təsisçiliyi və baş redaktorluğu ilə Azərbaycanın ilk mətbu orqanı - "Əkinçi" qəzeti işıq üzü görüb.
Bu gün Azərbaycan mətbuatının 150 illiyi tamam olur. Xatırladaq ki, Prezident İlham Əliyev milli mətbuatın Azərbaycanın ictimai-siyasi və mədəni həyatındakı yerini, mədəniyyətin, maarifçiliyin inkişafında rolunu, müasir cəmiyyət quruculuğu və ölkəmizin beynəlxalq nüfuzunun daha da yüksəldilməsi sahəsində töhfələrini nəzərə alaraq, Azərbaycan Milli Mətbuatının 150 illik yubileyinin ölkəmizdə geniş qeyd olunması haqqında Sərəncam imzalayıb.
Qeyd edək ki, mətbuat bayramında tədbirlər, təntənəli mərasimlər keçirilir. Maraqlıdır, 150 illiyin qeyd olunma tədbirlərinin ötən illərdə keçirilən mərasimlərdən nə kimi fərqləri oldu?
Bahəddin Həziyev: “Bir əsr yarım müddətdə milli mətbuatımız çox çətin və maraqlı yollardan keçib”
Yazıçı-publisist, "bizimyol.info" saytının təsisçisi və baş direktoru Bahəddin Həzi “Bakı-Xəbər”ə açıqlamasında bunları qeyd etdi: “Sözün doğrusu, bu fərq barədə heç düşünməmişəm. Yəni müqayisə etməmişəm. Ancaq şübhəsiz ki, Milli Mətbuatın 150 illik yubileyi öz anlamı və təntənəsi ilə fərqlidir. Bir əsr yarım müddətdə Milli Mətbuatımız çox çətin və maraqlı yollardan keçib. Bu baxımdan, təbii ki, bu yubileyin mənası başqadır. Həm də ona görə ki, bu yubiley dövlət səviyyəsində - prezident sərəncamı ilə xüsusi qeyd olunur. Bu məqamlar yubileyə ayrı bir cövhər qatır. Bu, möhtəşəm bir tarixdir”.
Aqil Camal: “Bu gün milli mətbuatın 150 illiyini qeyd edən media əhli geri boylanarkən xələflərinə “Biz bacardıq” deməyi haqq edir”
“Türküstan” Media Qrupunun rəhbəri Aqil Camal “Bakı-Xəbər”ə şərhində bildirdi ki, jurnalist fəaliyyətimiz dövründə bir neçə onillikdə Milli Mətbuatımınız yubileylərini yaşamışıq. Təbii ki, 150 illik digərlərindən fərqlənir: “Mətbuatın 100 illiyi sövet dövrünə təsadüf edib. O dövr Azərbaycan mətbuatı məzmunca zamanın siyasi konyunkturasının ruporu olsa da, formaca ümumi inkişafın bir parçası idi. Müstəqillik dövründə Azərbaycan mətbuatı həm ölkənin qarşılaşdığı işğal faktının yaratdığı bəlaların dünyaya çatdırılması, həm də yeni media çağırışlarının tətbiqi sahəsində önəmli yol qət edib. 44 günlük Vətən müharibəsində informasiya savaşında Azərbaycan mediasının peşəkar və vətənpərvər fəaliyyəti bu gün də təqdir olunmaqdadır. Ondan sonrakı dövrdə qlobal informasiya məkanında Azərbaycana qarşı həyata keçirilən təxribatlara da mediamız ləyaqətlə cavab verdi. Bu prinsipial və peşəkar duruşu 2 gün öncə III Şuşa Qlobal Media Forumunun iştirakçıları ilə görüşdə Azərbaycan Prezidenti də xüsusi qeyd etdi.
Mətbuatın 150 illiyi ilə bağlı cənab Prezidentin imzaladığı Sərəncamla onlarla həmkarımız müxtəlif dövlət mükafatları ilə təltif edildi. Bu da Azərbaycan mediasının fəaliyyətinə verilən qiymətin ali göstəricisidir.
Bu baxımdan hesab edirəm ki, bu gün milli mətbuatın 150 illiyini qeyd edən media əhli geri boylanarkən xələflərinə “Biz bacardıq” deməyi haqq edir”.
Hacıbəy Heydərli: “Keçirilən tədbirlər onu göstərir ki, Azərbaycan Prezidenti hər bir jurnalistin yanında, arxasındadır”
Mətbuat Şurasının İdarə Heyətinin üzvü Hacıbəy Heydərli “Bakı-Xəbər”ə şərhində bildirdi ki, Azərbaycan milli mətbuatı hər zaman dövlətin diqqət və qayğısı ilə əhatələnib: “Uzun illərdir ki, Azərbaycan milli mətbuatının ildönümü ilə bağlı tədbirlər keçirilir. Dövlətimiz hər zaman jurnalistlərin, qələm əhlinin yanında olub. Ölkə başçısı İlham Əliyev dəfələrlə “jurnalistlərin onun dostu” olduğunu qeyd edib. Bu, Azərbaycan mətbuatına verilən ən böyük dəyər, qiymətlərdən biridir. Məlumat üçün deyim ki, ölkə başçısı İlham Əliyev bu ilin 25 aprel tarixində Azərbaycan Milli Mətbuatının 150 illiyi ilə bağlı tədbirlər planının keçirilməsi ilə bağlı sərəncam imzalayıb. Bu sərəncam dövlətin növbəti dəfə mediaya göstərdiyi qayğının bariz nümunəsidir. Bu baxımdan deyə bilərəm ki, bu il mətbuat günü çox geniş şəkildə keçirilir. Mətbuatın 150 illiyi ilə bağlı geniş tədbirlər keçirilir. Keçirilən tədbirlər onu göstərir ki, Azərbaycan Prezidenti hər bir jurnalistin yanında, arxasındadır”.
Həmsöhbətimiz onu da əlavə etdi ki, son illər media sahəsində geniş islahatlar həyata keçirilir: “2021-ci ildə Medianın İnkişafı Agentliyi yaranandan sonra Azərbaycan mətbuatının saflaşması prosesi daha da sürətləndi. Bu gün artıq ölkədə media layiq olduğu dəyəri dövlət tərəfindən alır. Onu da deyim ki, Şuşada baş tutan III Qlobal Media Forumunda Prezident İlham Əliyevin media haqqında yüksək fikirlər səsləndirməsi Azərbaycan jurnalistləri üçün ən böyük bayram hədiyyələrindən biri oldu”.
Günel CƏLİLOVA
