İrəvan Minsk qrupunun buraxılmasını Bakı ilə müzakirə edir? - Maraqlı bəyanat...
Mehman İsmayılov: "Əslində Ermənistan Azərbaycanın irəli sürdüyü bütün şərtləri qəbul edib, sadəcə, o şərtlərin icrasında zaman nizamlanmasi məsələsində fikir ayrılığı var"
Ermənistanın baş naziri Nikol Paşinyanın mətbuat katibi Nazeli Baqdasaryan iyulun 21-də mətbuata bildirib ki, Ermənistan və Azərbaycan “Dağlıq Qarabağ” münaqişəsinin nizamlanması üzrə Avropada Təhlükəsizlik və Əməkdaşlıq Təşkilatının (ATƏT) Minsk Qrupunun buraxılması şərtlərini fəal şəkildə müzakirə edir.
"Minsk Qrupu mexanizmlərinin ləğvi və sülh sazişinin mümkün imzalanmasına gəlincə, bu, Ermənistan Respublikası üçün aydın gündəmdir və hazırda bunun baş verə biləcəyi şərtlərlə bağlı fəal müzakirələr aparılır", - o bildirib.
ATƏT-in Minsk qrupunun buraxılması Azərbaycanın Ermənistanla sülh sazişi imzalaması üçün iki ilkin şərtdən biridir. Paşinyan apreldə parlamentdə çıxış edərkən Bakıya eyni vaxtda həm sülh sazişi, həm də ATƏT-in Minsk Qrupunun buraxılması ilə bağlı bəyanat imzalamağı təklif edib. Həmsədrlərin qarşılıqlı fəaliyyəti dayandırıldığı üçün onun fəaliyyəti 2022-ci ildən faktiki olaraq dayandırılıb.
Necə yəni Ermənistan Minsk Qrupunun buraxılmasını fəal şəkildə müzakirə edir? Bu məsələdə müzakirə olunası nə var? Nəyi mürəkkəb edirlər? Münaqişə mövcud deyilsə, onun "həlli ilə məşgul olan" qurumun mövcudluğuna nə ehtiyac var?
"Əslində Ermənistan Azərbaycanın irəli sürdüyü bütün şərtləri qəbul edib, sadəcə, o şərtlərin icrasında zaman nizamlanmasi məsələsində fikir ayrılığı var. Ermənistan Minsk qrupu həmsədrlik institutunun ləğvi barədə Azərbaycanın tələbini Rusiyanın təzyiqi altında yerinə yetirmək istəmirdi. İndi Ermənistanla Rusiya siyasi hakimiyyəti arasında elə bir uçurum yaranıb ki, Ermənistan siyasi hakimiyyəti Paşinyanın obrazında Bakının və İstanbulun bütün şərtlərini yerinə yetirməyə hazırdır. Bu, istər Minsk qrupu həmsədrlik institutunun buraxılması olsun, istər Zəngəzur dəhlizinin açılması məsələsi olsun, istərsə də konstitusiyaya dəyişiklik məsələsi olsun, bunun üçünün də Paşinyan hakimiyyəti tərəfindən dərk edilərək qəbullanıldığının nişanələri onların verdiyi açıqlamalarda və ümumi siyasi gedişlərdə aydın-açıq müşahidə edilir.
Sadəcə, bir tərəfdən erməni cəmiyyətindən Paşinyan hakimiyyətinə qarşı olan müqavimət, digər tərəfdən Rusiyanın erməni kilsəsi və daşnakların destruktiv qüvvələrini hakimiyyətə qarşı qaldırıb, onu birtərəfli güzəştə getməkdə suçlaması məcbur edir ki, Paşinyan ehtiyatla hərəkət etsin və Azərbaycanın tələblərini zamana bağlasın. Amma mütləq yerinə yetirsin. Paşinyan şərt olaraq uydurma bir məsələ ortaya atıb ki, guya Minsk qrupu həmsədrlik institutundan imtina edəndən sonra Azərbaycanın "qərbi Azərbaycan" adi altında Bakının İrəvana qarşı ərazi iddiaları ortaya çıxa bilər. Əlbəttə, bu absurd yanaşmadır, onun heç bir məntiqi yoxdur.
Paşinyan Minsk qrupunun buraxılmasını sülh müqaviləsinin imzalanması ilə bağlayır ki, Rusiyanın təzyiqlarini neytirallaşdırmaq üçün vaxt qazansın". Bunu baki-xeber.com-a açıqlamasında politoloq Mehman İsmayılov deyib.
O əlavə edib ki, Ermənistan iqtidarı Rusiyanın Paşinyana qarşı qaldırdığı daxili və xarici qüvvələri tam zərərsizləşdirməyə çalışır: "Ona görə də Paşinyan istəyir ki, Minsk qrupu həmsədrlik institutu ilə razılaşdırilmış 17 maddə üzrə çərçivə sazişinin imzalanmasını eyni vaxta salsın. Bu o deməkdir ki, mən bu qurumun ləğvinə hazıram, sadəcə mənin indiki durumum buna imkan vermir, indidən addım atsam, Rusiyanın qızışdırdığı erməni cəmiyyətinin böyük müqaviməti ilə üzləşəcəm.
Digər məsələ Zəngəzur dəhlizidir ki, Paşinyanın sözçüsü Ermənistanın Sünik bölgəsindən keçəcək 43 kilometrlik yolun infrastrukturunun Azərbaycanla razılaşdırıldıqdan sonra inşa edilməsinə başlanılacağını deyir. Ermənistan daha çox bu dəhlizin moderatorluğunun kimə verilməsini müzakirə edir. Bu barədə prezident İlham Əliyev Xankəndidəki çıxışı zamanı birmənali olaraq hamıya çatdırdı ki, Azərbaycanın qərb rayonlarını Naxçıvanla birləşdirəcək Zəngəzur dəhlizində bizim vətəndaşlarımız və sürücülərimiz heç bir maneəyə rast gəlməməlidir. Bu, Azərbaycanın mövqeyidir.
Mən əminəm ki, Ermənistan rəhbərliyi vəziyyətini Əbu-Dabidə Azərbaycan tərəfinə izah etməyə çalışıb. Bütün məsələlərin həllinə Ermənistan razıdır, sadəcə, Paşinyanın hazırkı durumu buna imkan vermir".
Akif NƏSİRLİ
