Sahil Kərimli: “Prezidentin verdiyi bu mesaj Azərbaycanın haqlı və ədalətli tələbidir”
Prezident İlham Əliyev Xankəndidə “Rəqəmsal keçidlər: Süni intellekt dövründə informasiya və media dayanıqlılığının gücləndirilməsi” mövzusunda III Şuşa Qlobal Media Forumunun iştirakçıları ilə görüşdə bir sıra məsələlərə, o cümlədən də Azərbaycanla Ermənistan arasında bağlanacaq sülh müqaviləsinə toxunub.
Prezident Əliyev bildirib: “...Əgər erməni tərəfi Qarabağ münaqişəsinin bitdiyini hesab edirsə, Qarabağ münaqişəsinin həlli üçün yaradılmış Minsk qrupunu ləğv etmək lazımdır. Məntiq sadədir. Bunun üçün Ermənistan konstitusiyasına dəyişikliklər edilməlidir ki, oradan Azərbaycana qarşı ərazi iddialarının yer aldığı müstəqillik bəyannaməsi çıxarılsın. Prinsipcə məsələ budur. Buna görə də sülh sazişinin mətni razılaşdırılıb. Bu sənədin paraflanması ideyası da Azərbaycan tərəfindən irəli sürülüb. Biz sadəcə olaraq, Əbu-Dabidə baş verənləri şərh etmədik. Fikirləşdik ki, kommunükenin birgə mətni üzərində razılığa gəldiyimiz üçün şərh ediləcək heç nə yoxdur. Amma erməni tərəfi, həmişə olduğu kimi, öz şərhləri ilə təfərrüatları ortaya qoymağa çalışır. Prinsipcə, dediyim kimi, biz tabutun üzərini dəmir-betonla qapatmaqdan və bundan sonra normal yaşamaqdan uzaqda deyilik. Mən bunu əvvəlki görüşlərdə də demişəm: siz öz həyatınızı yaşayın, biz də öz həyatımızı yaşayaq. Ancaq belə olan təqdirdə Cənubi Qafqazda az-çox məqbul situasiya tədricən yarana bilər ki, üç ölkə nəhayət, heç olmasa, hər hansı əməkdaşlıq imkanlarını müzakirə etməyə başlaya bilsin”.
Azərbaycan Prezidenti təklif edib ki, Ermənistan konstitusiyanı dəyişənə və Minsk Qrupunu buraxana kimi aralıq mərhələ olaraq sülh sazişinin mətnini paraflayaq.
“İlham Əliyev Şuşa Qlobal Media Formunda da bu məsələ ilə bağlı Azərbaycanın rəsmi qətiyyətli, ədalətli mövqeyini bir daha Xankəndidən dünyaya çatdırmış oldu”
Prezident Əliyevin sazişlə bağlı İrəvana növbəti mühüm təklifi barədə danışan siyasi ekspert Sahil Kərimli “Bakı-Xəbər”ə bildirdi ki, Azərbaycanın uzun illərdir həyata keçirdiyi sülh istəkləri, Cənubi Qafqazda daimi və ədalətli sülhün əldə olunması üçün atdığı addımlar təqdirəlayiqdir. “Xüsusilə də Azərbaycan Prezidenti İlham Əliyev Şuşa Qlobal Media Forumunda bu məsələ ilə bağlı Azərbaycanın rəsmi qətiyyətli, ədalətli mövqeyini bir daha Xankəndidən dünyaya çatdırmış oldu. Prezidentin verdiyi bu mesaj Azərbaycanın haqlı və ədalətli istəyi və tələbidir. Yalnız və yalnız Ermənistan Minsk Qrupunun buraxılması ilə bağlı məsələ ilə bağlı müsbət addım atsa, paralel olaraq Ermənistan konstitusiyasında dəyişikliklər edilsə, o halda biz ədalətli və dayanıqlı sülhdən danışa bilərik. Təəssüf ki, Ermənistan konstitusiyasında bugünə qədər Azərbaycana və Türkiyəyə qarşı konkret ərazi iddiaları var. Ona görə də bu iddialardan əl çəkilməsi üçün Ermənistan öz konstitusiyasına dəyişikliklər etməlidir. Qarabağ münaqişəsi Azərbaycan tərəfindən həll olunubsa, artıq münaqişə ilə bağlı heç bir problem qalmayıbsa, xüsusilə də keçmiş münaqişənin həlli istiqamətində yaradılan Minsk Qrupu da buraxılmalıdır, ona heç bir ehtiyac yoxdur. Yalnız bu halda biz konkret olaraq sülh müqaviləsini imzalaya bilərik. Amma təəssüf ki, hələ də bununla bağlı təkliflərə və tələblərə müsbət cavab verməyib. Düzdür, son dövrlərdə Ermənistanla Azərbaycan arasında sülh müqaviləsi istiqamətində çox mühüm addımlar atılır, demək olar ki, sülh müqaviləsinin mətni artıq razılaşdırılıb, hazırdır. Əgər Ermənistan Prezident İlham Əliyevin dediyi kimi Minsk Qrupunun buraxılması ilə bağlı müsbət addım atarsa, bu istiqamətdə çıxış edib konstitusiyasına dəyişiklik edərsə, bu zaman sülh müqaviləsi problemsiz və maneəsiz bağlana bilər. Bu isə Cənubi Qafqazda uzunmüddətli, bəlkə də əbədi sülh və təhlükəsizliyin əldə olunmasına gətirib çıxara bilər”.
S.Kərimli qeyd etdi ki, ona görə də Ermənistan öz məsuliyyətini anlamalıdır, sülh müqaviləsinin imzalanması ilə bağlı irəli sürülən bu tələblərə konkret əməl etməlidir: “Azərbaycan dövləti Ermənistandan konstruktiv mövqe gözləyir. Hesab edirəm ki, nəhayət Azərbaycan bu istiqamətdə də qarşısına qoyduğu hədəflərə, məqsədlərə nail ola biləcək”.
İradə SARIYEVA
