Azər Həsrət: "Nəticə əldə etmək üçün məhz nüvə danısıqlarında ABŞ-ın masa arxasında olması vacibdir"
Euro.news xəbər yayıb ki, İran, Böyük Britaniya, Fransa və Almaniya nüvə danışıqlarını bərpa etmək barədə razılığa gəliblər.
Bildirilib ki, danışıqların növbəti raundu İran, Böyük Britaniya, Fransa və Almaniyanın xarici işlər nazirlərinin müavinləri səviyyəsində keçiriləcək.
Qeyd olunub ki, Tehran və Avropa üçlüyü İranın nüvə proqramı ilə bağlı danışıqların bərpası məsələsində prinsipial razılığa gəlsələr də, danışıqların vaxtı və keçirilmə yeri hələ dəqiqləşməyib.
Növbəti danışıqlara hansı ölkənin ev sahibliyi edəcəyi ilə bağlı qərar hələ verilməyib.
Xatırladaq ki, bundan əvvəl ABŞ, Fransa, Almaniya və Böyük Britaniya İranla nüvə sazişinin əldə olunması üçün son tarix kimi avqustun axırını təyin etmək qərarına gəlmişdilər.
Bəllidir ki, artıq Avropa dövlətləri Amerikaya inanmırlar, Ukrayna məsələsində fikir ayrılıqlarını gördük. İran da ABŞ-a etimadsızlıq nəticəsində bu danışıqları onunla yox, Avropa ilə aparmağa maraq göstərir. Ağ Evin bu məsələyə münasibəti necə olacaq, sonradan Vaşinqtonun bu danışiqlara müdaxiləsi mümkündürmü? Nəzərə alsaq ki, Tramp prezidentliyinin birinci dönəmində İranin nüvə proqramları üzrə danışıqlardan çıxıb, üç Avropa ölkəsinin Amerikanin çıxdığı bu danışıqları davam etdirməsinin arxasında nə dayanır - onlar ABŞ-ı proseslərdən tamamilə uzaqlaşdırmaq istəyirmi?
Baki-xeber.com-a açıqlamasında siyasi şərhçi Azər Həsrət bildirdi ki, ABŞ-ın olmadığı heç bir format nəticə verməyəcək: "Çünki hazırda dünyada elə bir vəziyyət yaranıb ki, ABŞ meydanda təkbaşına qlobal gücdür. Yəni ABŞ ilə üz-üzə gələ biləcək, yaxud Amerika kimi dünyada gedən proseslərə təsir edə biləcək ikinci güc yoxdur. Belə olan şəraitdə nüvə danışıqları kimi qlobal əhəmiyyətli bir məsələni sadəcə Avropa ilə müzakirə edərək nəticəyə nail olmaq o qədər də inandırıcı görünmür. Bəli, ABŞ danışıqlardan çıxmışdı, amma sonra ilk addım kimi İsraili İranın üzərinə göndərdi, İran bombalandı, raket atəşinə tutuldu, çoxsaylı itkilər verildi, obyektləri vuruldu və son nöqtəni də Amerika qoydu. İranın strateji nüvə obyektləri ABŞ tərəfindən bombalandı. İran və ya Avropa buna nəsə edə bildimi? Əlbəttə yox, ona görə də İranın Avropa ölkələri ilə hansısa nüvə danışıqları aparması imitasiyadan başqa bir şey deyil. Bu bir tərəfdən Avropaya lazımdir ki, guya onlar qlobal problemlərlə məşğul olurlar və bunların da sözünə kiminsə güvəndiyi görüntüsü yaradırlar.
Digər tərəfdən İranın özünə lazımdır ki, bəli, biz danışıqlara meylliyik, güvəndiyimiz tərəfdaşlarla biz bu danışıqları aparırıq. Bütün bunlar təbii ki, heç bir nəticə verməyəcək. Nəticə əldə etmək üçün məhz nüvə danısıqlarında ABŞ-ın masa arxasında olması vacibdir. O yoxdursa, Avropa ilə İran danışacaq, bəlkə də anlaşacaq, günün birində isə ABŞ yenə okeanın o tayından qalxıb, gəlib İranı məlum obyektlərini bombalayıb darmadağın edib, çıxıb gedəcək. Ən yaxşısı bu olardı ki, İran heç kəslə danışıq aparmadan nüvə texnologiyalarından imtina etsin və desin ki, mən bu dəhşətli silahı yaratmaqdan vaz keçirəm, bütün dünya, o cümlədən də yaxın qonşularla normal münasibətlər qurmaq niyyətindəyəm. Belə olan halda, bəli, İran normal bir dövlətə çevrilə biləcək və onlara qarşı tətbiq edilən sanksiyalar da yavaş-yavaş aradan qaldırılacaq. Amma Avropa ilə danışıqların hansısa nəticə verəcəyinə bel bağlamaq olmaz"
Akif NƏSİRLİ
