Aydın Mirzəzadə: "Azərbaycanın dövlət quruculuğu, ağır problemləri məharətlə həll etmək təcrübəsi digər dövlətlər üçün də cəlbedicidir"
Beynəlxalq mətbuat III Şuşa Qlobal Media Forumunu geniş şəkildə işıqlandırmağa davam edir.
Qeyd edək ki, Çinin dövlət informasiya agentliyi “Sinxua” daxil olmaqla aparıcı media orqanları Azərbaycan Prezidenti İlham Əliyevin iyulun 19-da Xankəndidə Çinlə yüksək səviyyədə strateji əməkdaşlıqdan danışmasına diqqət çəkib.
Bununla yanaşı, Çin və Yaponiya mətbuatında Qazaxıstanın Aktau şəhəri yaxınlığında baş verən təyyarə qəzası ilə bağlı Azərbaycanın Rusiyaya qarşı beynəlxalq məhkəmədə iddia qaldırmağı planlaşdırması məsələsi də xüsusi işıqlandırılıb.
Eyni zamanda, “Hindustan Times” (Hindistanın ingilisdilli gündəlik qəzeti), “Vietnam+” (Vyetnamın rəsmi dövlət xəbər agentliyi olan Vyetnam Xəbər Agentliyinin ingilisdilli xidməti”, “La Radio del Sur” (Venesuelanın paytaxtı Karakasda yerləşən beynəlxalq radio şəbəkəsi) kimi mətbu orqanlar da, öz növbəsində, ötən ilin dekabrında AZAL təyyarəsinin vurulması ilə əlaqədar Azərbaycan Prezidentinin beynəlxalq məhkəməyə dosyenin hazırlanması fikirlərinə xüsusi yer ayırıb.
Birləşmiş Ərəb Əmirliklərinin rəsmi xəbər agentliyi olan “WAM” (Wakalat Anba'a al Emarat) isə III Şuşa Qlobal Media Forumunun mövzu və mahiyyətinə diqqət çəkərək, bu tədbirin dünyanın 52 ölkəsindən nüfuzlu jurnalistləri bir araya topladığını vurğulayıb
"Bu gün ABŞ prezidenti Donald Trampın öz sosial şəbəkə hesabında Azərbaycan Prezidentinin onunla bağlı dediyi fikirləri paylaşması onu göstərir ki, Azərbaycan dünyanın diqqət mərkəzindədir"
Beynəlxalq mətbuatın Prezidentin Mediaforumda çıxışına geniş yer verməsinin əhəmiyyəti haqqında fikir bildirən millət vəkili Aydın Mirzəzadə "Bakı-Xəbər"ə şərhində bildirdi ki, III Şuşa Media Forumunda 52 ölkədən 140 nümayəndənin iştirak etməsi forumun geniş əhatəyə yayılacağından xəbər verirdi. Forumun əsas hadisəsi iştirakçılarının Azərbaycan Prezidenti İlham Əliyevlə çıxışı, görüşü, dialoqu oldu: "İlham Əliyev tədbir iştirakçılarının suallarını əhatəli cavablandırıb. Ümumiyyətlə, hər bir sualın cavabı ilə həm də Azərbaycanın qarşısında duran problemlərin həllinə dair maraqlı fikirlər səsləndirib. Heç təsadüfi deyil ki, cənab prezidentin cavabları xarici mətbuatda geniş şəkildə işıqlandırılır, şərhlər verilir, ona istinadlar edilir. Bu gün ABŞ prezidenti Donald Trampın öz sosial şəbəkəsində Azərbaycan Prezidentinin onunla bağlı dediyi fikirləri paylaşması onu göstərir ki, Azərbaycan dünyanın diqqət mərkəzindədir. İlham Əliyevin apardığı siyasət, onun Azərbaycanın nüfuzunun qaldırılması, beynəlxalq birlikdə əməkdaşlığın inkişaf etdirilməsi diqqəti cəlb edir. Azərbaycanın dövlət quruculuğu, ağır problemləri məharətlə həll etmək təcrübəsi digər dövlətlər üçün də cəlbedicidir. Bu onu göstərir ki, Azərbaycan diqqət mərkəzindədir. Azərbaycanın atdığı addımlar xarici ölkələrin problemlərinin həllində istifadə olunur və olunacaq. Forum uğurla başa çatdı. Məlum forumun Azərbaycan mətbuatının 150 illiyi ərəfəsində baş verməsi ölkə mətbuatına, mediasına verilən qiymətin göstəricisidir".
Günel CƏLİLOVA
