Fuad İbrahimov: “Azərbaycan azsaylı ölkələrdən idi ki, onların toruna düşmədi”
“Əgər biz həmin məsləhətləri dinləsəydik, ola bilsin, bu gün ölkəmiz ən azı iki qonşusu ilə müharibədə idi. Əgər məsləhətləri dinləsəydik, biz Qarabağı heç zaman qaytara bilməzdik”. Bu barədə Prezident İlham Əliyev III Şuşa Qlobal Forumunun iştirakçıları ilə görüşündə bildirib.
Ölkə başçısının sözlərinə görə, Qərbdə bəzi dairələrdə böyük məyusluq var idi ki, Azərbaycan həddindən artıq müstəqil siyasət aparır: “Təlimatlarımıza qulaq asmır, məsləhətlərimizə məhəl qoymur və istədiyini edir. Əgər biz həmin məsləhətləri dinləsəydik, ola bilsin, bu gün ölkəmiz ən azı iki qonşusu ilə müharibədə idi. Əgər məsləhətləri dinləsəydik, biz Qarabağı heç zaman qaytara bilməzdik. Əgər məsləhətləri dinləsəydik, bu gün ola bilsin Beynəlxalq Valyuta Fondundan və onun “parçala və hökm sür” strategiyasından asılı olardıq. Bir sözlə, biz məsləhətlərə qulaq asmadıq. Güclü ölkəni, güclü iqtisadiyyatı qurduq”.
“Ərazilərimiz işğal altında ola-ola açıq deyirdilər ki, neft kəməri Ermənistandan keçməlidir”
Sözügedən məsələni “Bakı-Xəbər”ə şərh edən iqtisadçı-ekspert Fuad İbrahimovun fikrincə, Prezident Əliyevin toxunduğu məqamların böyük sətiraltı mənası var: “Azərbaycan müstəqillik dövrünə qədəm qoyandan aparıcı, güclü dövlətlər, eyni zamanda bizim təbii sərvətlərimizi öz maraqları çərçivəsində “nəzərə alan” hər bir ölkə, siyasətçi çalışırdı ki, prosesi öz maraqları çərçivəsində istiqamətləndirsin. Bəli, istəyirdilər cənub qonşumuzla toqquşaq. İstəyirdilər ki, Rusiya ilə bütün körpüləri yandıraq. Ancaq Azərbaycan bu təhriklərə getmədi, qonşu ölkələrə qarşı poliqona çevrilmədi. Bu gün Azərbaycan regionun iqtisadi cəhətdən cazibədar mərkəzinə çevrilir. Tranzit daşımaların kəsişdiyi bir haba çevrilir. Bütün bunların fonunda bir ölkə olaraq hardasa söz sahibidir. BVF dəfələrlə iqtisadi alətlərdən istifadə edərək bir sıra ölkələri siyasi baxımdan asılı vəziyyətə salıb. Azərbaycan azsaylı ölkələrdən idi ki, onların toruna düşmədi. Müstəqil siyasət yeridərək öz yolu ilə getdi. İllər sonra artıq iqtisadiyyatı formalaşmış bir ölkənin müstəqil siyasəti nəticəsində biz yaranan problemləri aradan qaldırdıq. Bəli, Azərbaycan öz yolu ilə getdi. Bizim ən böyük iri layihələrimiz Bakı-Tbilisi-Ceyhan, Bakı-Tbilisi-Ərzurum, Bakı-Tbilisi-Qars layihələridir. Bu layihələrin həyata keçirilməsi üçün nə qədər məsləhət verən var idi. Hər vəchlə mane olurdular. Ərazilərimiz işğal altında ola-ola açıq deyirdilər ki, neft kəməri Ermənistandan keçməlidir. Kəmər Ermənistandan keçmədiyi üçün o vaxt ABŞ “Excimbank”ı kəmərin çəkilməsinə kredit ayırmadı. Bax biz bu kimi çətinliklərdən keçərək bu günlərə gəldik. Dünyanın aparıcı nəşrlərində sifarişli yazılar dərc edildi ki, guya Azərbaycanın həyata keçirdiyi böyük layihələrin iqtisadi perspektivi yoxdur. Bu layihələri gözdən salırdılar. Ancaq Azərbaycan bütün bunlara əhəmiyyət verməyərək öz layihələrini həyata keçirdi. Qarşıya qoyduğu məqsədlərə çatmaq üçün öz yolu ilə getdi. Müstəqil siyasətin qələbəsidir ki, Azərbaycan iqtisadi cəhətdən asılı deyil. Beynəlxalq maliyyə qurumlarının təzyiqi altında deyil. İqtisadi cəhətdən heç kimdən asılı olmayan bir vəziyyətdəyik. Bütün bunlar Prezident İlam Əliyevin incə siyasəti nəticəsində mümkün olub”.
Vidadi ORDAHALLI
