Tural İsmayılov: “Trampın paylaşımı sadəcə minnətdarlıq deyil, həm də strateji mesajdır”
ABŞ prezidenti Donald Tramp Azərbaycan Prezidenti İlham Əliyevin “lll Şuşa Qlobal Media Forumu”ndakı çıxışını paylaşıb. APA xəbər verir ki, ABŞ lideri paylaşımı özünün rəsmi Truth Social hesabında edib.
Paylaşımda Prezident İlham Əliyevin Donald Tramp haqqında fikirləri əks olunmuş görüntü yer alıb.
Azərbaycan Prezidenti forumda bildirib: “Mən Trampın qələbəsini proqnozlaşdırmırdım. Sadəcə dedim; onun bizim kimi fundamental dəyərləri, o cümlədən ailə dəyərlərini bölüşdüyünü nəzərə alsaq, Azərbaycan xalqı üçün daha yaxşı olardı. O, müharibələrə başlamamış yeganə ABŞ Prezidentidir. Həm də hakimiyyətdə olduğu qısa müddətdə müharibələrə son qoyan bir adam olduğu aydın görünür. Biz, həmçinin Azərbaycana və Ermənistana son nəticədə razılığa gəlməyə kömək etmək səylərinə görə ona çox minnətdarıq. O, beynəlxalq təhlükəsizik üzrə daha qlobal məsələlərlə məşğul olmasına baxmayaraq, Cənubi Qafqazdakı şəraiti də diqqət mərkəzində saxlayır. Əlbəttə, onun qələbəsi bir sıra səbəblərdən Azərbaycanda bizi çox sevindirir. Təbii olaraq, arzulayırıq ki, o, işini sona çatdırsın, “Vaşinqton bataqlığı”nı dibinə qədər qurutsun”.
Donald Trampın Azərbaycan Prezidenti İlham Əliyevin “lll Şuşa Qlobal Media Forumu”ndakı çıxışını paylaşması nə deməkdir və bu hansı anlama gələ bilər?
“ABŞ prezidenti səviyyəsində bu çıxışa reaksiya verilməsi Azərbaycanın geosiyasi çəkisinin artdığını təsdiqləyir”
Siyasi ekspert Tural İsmayılov “Bakı-Xəbər”ə bildirdi ki, ABŞ Prezidenti Donald Trampın Azərbaycan Prezidenti İlham Əliyevin III Şuşa Qlobal Media Forumundakı çıxışını paylaşması ciddi siyasi məna daşıyır: “Bu addım ABŞ-Azərbaycan münasibətlərinin yeni mərhələyə qədəm qoyduğunu göstərir. Prezident Əliyevin Tramp haqqında dediyi fikirlər Ağ Evdə də rezonans doğurub. Trampın paylaşımı sadəcə minnətdarlıq deyil, həm də strateji mesajdır.
Bu, ilk növbədə, İlham Əliyevin qlobal auditoriyaya çıxış imkanlarının genişləndiyini göstərir. ABŞ prezidenti səviyyəsində bu çıxışa reaksiya verilməsi Azərbaycanın geosiyasi çəkisinin artdığını təsdiqləyir. Trampın mesajı onun şəxsi diplomatik üslubunun tərkib hissəsidir - o, açıq və simvolik jestlərlə əməkdaşlıq etdiyi liderlərə dəstək nümayiş etdirir”.
T.İsmayılovun fikrincə, paylaşım eyni zamanda ABŞ-ın Cənubi Qafqaz siyasətində Azərbaycanın aparıcı mövqeyini qəbul etdiyini göstərir. T.İsmayılov hesab eidr ki, Tramp bu yolla həm regionda balans yaratmaq, həm də Əliyev kimi tərəfdaş liderlərlə münasibətləri möhkəmləndirmək niyyətində olduğunu göstərir: “Azərbaycan üçün bu paylaşım informasiya müharibəsində və diplomatik cəbhədə əhəmiyyətli bir qələbədir. Şuşa Forumunun mesajları təkcə region üçün deyil, qlobal güclər üçün də maraq doğurur. ABŞ prezidentinin bunu paylaşması forumun beynəlxalq legitimliyini artırır.
Həmçinin bu jest Trampın müstəqil və praqmatik xarici siyasət xəttini davam etdirdiyini göstərir. Onun klassik “ən yaxşı müdafiə – hücum deyil, əməkdaşlıqdır” yanaşması bu dəfə Şuşadan gələn səsə cavabla ifadə olundu. Nəticə etibarilə bu paylaşım sadəcə sosial media fəaliyyəti deyil, ABŞ-Azərbaycan münasibətlərində yeni siyasi atmosferin başlanğıcıdır”.
İradə SARIYEVA
