Mübariz Göyüşlü: “Fransanın bu cəhdləri də əvvəlkilər kimi uğursuzluğa dücar olacaq”
Fransanın 2030-cu ilə qədər ölkənin milli təhlükəsizlik prioritetlərini müəyyən edən strateji icmalına əsasən, böhranların yığılması eskalasiya və genişmiqyaslı sabitliyi pozan amillərin meydana çıxma ehtimalını artırıb.
“Ukrayna və Yaxın Şərqdəki müharibələr digər üst-üstə düşən və aşağıdakı bir-birinə qarışan böhran zonalarına əlavə olunur: Cənubi Qafqaz (Ermənistan, Azərbaycan); Asiya (Tayvan boğazı, Koreya yarımadası, Cənubi Çin dənizi, Myanma); Afrika (Böyük Göllər, Darfur, Sahel, Afrika Buynuzu)...
...Son iki ildə Azərbaycanın dövlət təbliğat qolu olan Bakı Təşəbbüs Qrupu haqqında ictimaiyyəti məlumatlandırmaq və yalan iddiaları təkzib etmək məqsədilə çoxsaylı hesabatlar dərc olunub”, - icmalda qeyd edilir.
Fransa Ermənistanla Azərbaycan arasında gərginliyin artması ehtimalını gördüyünu bəyan edir. Bəlkə elə Fransa özü bu gərginliyi körükləməyi planlaşdırır?
"Müasir İnkişaf" İctimai Birliyinin sədri Mübariz Göyüşlünun fikrincə, Fransanın davranışları Azərbaycanla Ermənistan arasında olan münasibətləri pozmağa hesablanıb: "Fransa Cənubi Qafqazda normal münasibətlərin olmasının, gərginliyin azaldılmasının və Azərbaycanla Ermənistan arasında sülh sazişinin imzalanmasının tərəfdarı deyıl, əleyhdarıdır. Hətta, Ermənistan özü belə sülh prosesində maraqlı görünmək, real addımlar atmaq istədikdə, Fransanın pozuculuq fəaliyyətini biz açıq-aydın müşahidə edirik. Bu Fransanın dünyada yaradılmış sülsevər, demokratik, insanpərvər imicinin də saxta olduğunun bir göstəricisidir. Amma bu Azərbaycanı yolundan nəinki saxlaya bilməz, heç ləngitməsi də mümkün deyil. Çünki Azərbaycan dövləti elə xarici siyasət qurub ki, Fransanın bunun qarşısını almağa sadəcə olaraq gücü çata bilməz. Biz ərazi bütövlüyümüzü və suverenliyimizi bərpa etmişiksə, sülh müqaviləsi də bağlanacaq, Zəngəzur dəhlizi də açılacaq, hətta, Qərbi azərbaycanlıların vətənə qaydışı da reallaşacaq. İtirən isə Fransa olacaq. E.Makronun xarici siyasətinin ziyanlarından Fransa xalqı çəkəcək. Hazırda müstəmləkələr Fransadan qopur, ayrılır, Fransa onları saxlaya bilmir, ölkədə vəziyyət getdikcə gərginləşir. Ona görə, hesab edirəm ki, Fransanın bu cəhdləri də əvvəlkilər kimi uğursuzluğa dücar olacaq".
Dəniz NƏSİRLİ
