"Erməni kilsəsi İŞİD-dir, molla rejimi ilə bir addımlayır" - təhqirin biri "1 qəpik"…
Tural İrfan: “Kilsənin yaratdığı təhdid, əslində baş nazirlə yanaşı bölgə dövlətləri üçündür”
Erməni kilsəsinin terrorçu xislətini artıq erməni rəsmiləri də etiraf etməyə başlayıblar. Qeyd edilir ki, erməni Apostol Kilsəsi İŞİD-in bir qanadına çevrilib, baş kəsir: “Başı kəsilən isə Ermənistanın seçilmiş baş naziridir".
Qeyd edək ki, Ermənistanın baş nazirinin aparat rəhbəri Arayik Arutyunyan iyulun 13-də ABŞ-ın Kaliforniya ştatının Qlendeyl şəhərində Ermənistanın Baş Konsulluğu qarşısında keçirilən aksiyada səsləndirilən fikirləri kəskin şəkildə tənqid edib.
Arutyunyan həmin mitinqdə iştirak edən din xadiminin çıxışına reaksiya verərək, şok ifadələrin səsləndirildiyini bildirib: “Paşinyanın başını kəsmək lazımdır, onlar erməni apostol kilsəsini İslam Dövləti təşkilatının qoluna çeviriblər, başını kəsirlər - Ermənistan Respublikasının seçilmiş baş nazirinin başını kəsirlər".
Bir çox əsaslı mövzularda mürtəd molla rejimi ilə müştərək addımlayan Erməni Apostol Kilsəsinin indiki halı daha dəhşətlidir. Məkrli niyyət və məqsədlərinə ram olmayan baş nazirə "ölüm fətvası" verən erməni kilsəsinin keşişləri dini dəyərləri ayaqlamaqdadırlar.
“Erməni kilsəsi Baş nazirin başının kəsilməsinin lazım olduğunu deməklə dini dəyərlərdən, kilsə mahiyyətindən tam uzaqlaşdığını etiraf edir”
Mövzu ilə bağlı fikir bildirən ilahiyyatçı Tural İrfan “Bakı-Xəbər”ə şərhində bildirdi ki, Erməni Apostol Kilsəsinin fəaliyyətində, məlumdur ki, dindən savayı hər işlə məşğul olmaq var: “Eynən İranın Qum mollaları kimi ruhani, din xadimi cildində əslində siyasi təxribatlarla, fitnə-fəsadla məşğuldurlar. Türkiyə və Azərbaycana qarşı nifrət aşılayan, düşmənçilik yaradan da məhz kilsə olub. Erməni kilsəsinin məramı türk-müsəlman düşmənçiliyi yaratmaq olub. Azərbaycan xalqına qarşı törədilmiş soyqırımı aktlarının da ideoloqu məhz kilsə mənsubları olub. Türkiyəyə qarşı iddiaların da kökündə kilsə dayanıb. Baş nazir Nikol Paşinyan görür ki, kilsə bu ideologiyadan əl çəkməsə onun sülh prosesinə təsiri, mənfilik gətirməklə yanaşı, həm də öz hakimiyyəti üçün ciddi təhlükə yaradacaq. Kilsənin açıq siyasi proseslərə qarışması və birbaşa iştirakçıya çevrilərək əsasən Rusiyanın təsiri ilə hakimiyyət üçün problemi dərinləşdirməyə çalışması Ermənistan üçün heç də xoş olmayan gələcək vəd edir. Qonşularla sülhə meyl edən, əlaqələri bərpa etməyi nəzərdə tutan və iddialarından vaz keçərək normal münasibətlər qurmaq istəyən hökumət kilsəyə sərf etmir. Rusiyanın təhriki ilə hakimiyyəti dəyişərək yenidən Türkiyə və Azərbaycana qarşı iddialarda olan, yeni münaqişə münaqişə yaradan və Rusiyanın diqtəsi ilə oturub-duran rejim gətirmək istəyirlər. Erməni kilsəsi Baş nazirin başının kəsilməsinin lazım olduğunu deməklə dini dəyərlərdən, kilsə mahiyyətindən tam uzaqlaşdığını etiraf edir əslində. Erməni Apostol Kilsəsi əslində İŞİD-dən daha təhlükəlidir. Bölgədə terroru dəstəkləyən bu kilsə həmişə qan istəyir. Erməni kilsəsi deyərkən hər zaman terror göz özünə gəlir. Dinlərarası münasibətlərə məhəl qoymayan, dini dəyərlərdən tamamilə uzaq olan, xarici təsirlərə alət olan kilsə əslində dini təmsil edə bilməz. Din xadimi, məscid, kilsə həmişə sülhü, humanistliyi, mənəvi, ictimai dəyərləri tərənnüm etməlidir. Artıq iş o həddə çatıb ki, dövlət səviyyəsində, baş nazirin aparat rəhbəri kilsənin terrora xidmət etdiyini, buna çağırış etdiyini və İŞİD-in bir qanadına çevrildiyini bəyan edib. Ermənistanı qəddar və radikal teokratik dövlət timsalında terror yuvasına çevirməkdə İran da maraqlıdır və buna çalışır. Suriyada hakimiyyət dəyişəndən sonra terrorçu dəstələrin hazırlanması və narkotik ticarəti üçün meydan daraldığına görə İran Ermənistanı əvvəlki Suriyaya çevirmək istəyir ki, Azərbaycan və Türkiyə üçün də ciddi problemlər yarada bilsin. Buna görə hazırda Ermənistanda kilsənin təxribat planlarına Rusiya ilə dəstək verirlər. Hesab edirəm ki, kilsənin yaratdığı təhdid, əslində baş nazirlə yanaşı bölgə dövlətləri üçündür. Regionda sabitləşən durum, həll olunmuş keçmiş Qarabağ problemi, yeni əlaqələrin qurulması bir çoxlarını narahat edib və indiki mərhələdə hakimiyyəti dəyişə bilməsələr belə, Ermənistanda təxribatlar yaratmaqla prosesi ləngitmək istəyirlər. Lakin Rusiyanın təhriki ilə təxribatlara cəhd edən erməni kilsəsinin terrorçu xislətli din xadimləri hələlik baş nazir tərəfindən cəzalandırılır. Lakin əlavə hansısa problem yaransa belə, kilsənin Paşinyan hökumətini devirəcəyi ehtimalı azdır. Paşinyanın yürütdüyü siyasəti dəstəkləyən və yeni ortaq əlaqələr quran dövlətlər də buna imkan verməz ki, Rusiya təsirində olan şəxslər hakimiyyəti ələ alsın. Odur ki, kilsənin yerinə oturdulub islahatlara vadar edilməsinə nail olunacaq”.
Günel CƏLİLOVA
