İmamoğlunun həbsindən sonra Türkiyənin iç siyasətində mümkün təmayüllər - sabitlik qalacaqmı?..
Türkiyənin İstanbul Böyükşəhər Bələdiyyəsinin vəzifədən uzaqlaşdırılmış sədri Əkrəm İmamoğlu barəsində bir il səkkiz ay müddətinə azadlıqdan məhrumetmə cəzası verilib.
Türkiyə KİV-i xəbər verir ki, Məhkəmənin qərarına əsasən, Ə.İmamoğlu bu ilin yanvarında İstanbul Cumhuriyyət Baş Prokuroru Akın Gürlək və onun ailəsi haqqında işlətdiyi ifadələrə görə “dövlət məmuruna qarşı vəzifəsindən dolayı açıq şəkildə təhqir”, “təhdid” və “terrorla mübarizədə vəzifə almış şəxsləri hədəf göstərmək” ittihamları üzrə mühakimə olunub.
Bunun ardınca Türkiyədə daxili siyasi proseslər hansı istiqamətdə cərəyan edə bilər?
Əli Orucov: "İmamoğlunun artan siyasi karyerasını dayandırmaq üçün iqtidarın atdığı addımlar cəmiyyətdə birmənalı qarşılanmır"
Baki-xeber.com-un sualını cavablandıran siyasi şərhçi Əli Orucov bildirdi ki, bir sıra qüvvələr çalışır Türkiyədə süni qarşıdurma yaradaraq ölkəni daxildən zəiflətsin: "Həmin qüvvələrin cəmiyyəti parçalamaq, siyasi düşərgələr arasında ixtilaflar salmaq, hüququn aliliyini şübhə altına almaq kimi çeşidli planlarını həyata keçirmək üçün aktivliyi hiss olunmaqdadır. Təəssüflər olsun ki, bəzi hallarda bilərəkdən və ya bilməyərəkdən həm iqtidar, həm də müxalifət məkrli güclərə fürsət verir. İstanbul Böyükşəhər Bələdiyyə Başqanı, CHP-nin tanınmış simalarından biri olan Əkrəm İmamoğlunun həbsi qardaş ölkədə ictimai siyasi gərginliyi xeyli artırdı. Ana müxalifət partiyasının çağırışı ilə həm İstanbulda. həm də digər şəhərlərdə izdihamlı aksiyalar keçirildi. İqtidar-müxalifət toqquşmasının astanasından dönüldü. Ancaq hələ də vəziyyət həssas olaraq qalır. İmamoğlunun artan siyasi karyerasını dayandırmaq üçün iqtidarın atdığı addımlar cəmiyyətdə birmənalı qarşılanmır. Hətta, suçlu olsa belə, istintaqın aparılması insanlarda ciddi şübhələr yaradır və İmamoğlunu günahkar bilənlərin sayı azalır. Bu həm də hüquqa və dövlətə inamsızlıq yaratmağa yol açan haldır. İstanbul prokurorununu güya təhdid və təhqir adı ilə onun 1 il 8 ay azadlıqdan məhrum edilməsi kənardan sifariş kimi görsənir. Ola bilsin, İBB başqanının həqiqətən də fəaliyyətində hansısa qanun pozuntusu olub. Lakin bunun dəlil və mötəbər sübutlarla təsdiqində qüsurlar olduğundan, ona ictimai bəraət qazandırmasına gətirib çıxarır. Türkiyə qaynar və strateji bölgədə yerləşir. Sərhədlərində bitməyən silahlı münaqişələr var. İsrail-ABŞ tandeminin Yeni Ortadoğu layihəsinə uyğun olaraq İslam dövlətlərinə təcavüz açıq-aşkar xarakter alıb. Belə qarmaqarışıq və mürəkkəb dövrdə Türkiyənin daxili islərində münasibətlərin zorakı və qanundan kənar aydınlaşdırılması ölkəni risqə atır. Hər ötən gün Təl-Əvivin təxribatı və təhriki Türkiyəni münaqişəyə sürükləyir. Ankara bunu anlayır, milli həmrəylik, milli birlik yolunda qəti və uğurlu addımlar atır. Lazımdır ki, CHP ilə də bölünməyəcəklər masada müzakirəyə çıxarılsın. Həmçinin Ə.İmamoğlunun məsələsi də ədalətli və qanuni şəkildə həllini tapsın. Məncə, ən optimal yolu budur".
Azər Həsrət: "Türkiyənin daxili işlərinə qarışmadan demək istəyirəm ki, bu güvənlik və sabaha əminlik Əkrəm İmamoğlu kimi manipulyatorlarla bağlı məsələ deyil"
Məsələ ilə bağlı mövqe bildirən siyasi şərhçi Azər Həsrət bildirdi ki, bu, Türkiyədə nə birinci, nə də sonuncu hadisədir, Türkiyə zaman-zaman siyasətçilərlə bağlı bu cür yanasmaları görüb, belə cətin mərhələləri həmişə uğurla ötüşdürməyi bacarıb və əlbəttə, bunu da ötüşdürəcək: "Turkiyə hazırda ən məhsuldar dövrünü yaşamaqdadır. Qardaş Türkiyə gözümüzü önündə son 30 ildən artıq müddətdə faktiki olaraq yeni bir dövlətə çevrilib. Qarşımızda dünyanin sayılıb-seçilən, yeri gələndə dünyanın bir çox dövlətlərinə meydan oxuya biləcək qüdrətə sahib Türkiyə var. Bu dövləti içəridən pozmaq, dağıtmaq istəyənlər, əlbəttə, qarşılarında dövləti görəcəklər, dövlət də belə vəziyyətlərdə bir qayda olaraq qanun çərçivəsində öz gücünu göstərəcək.
Əkrəm İmamoğlu, əslinə qalanda, Türkiyə dövləti və siyasəti üçün elə də vacib persona deyil. Baxmayaraq ki, bəlli bir kontingent seçicini öz arxasınca aparmağı bacardı, bəlli bir müddətdə meydana çıxdı, özünü tanıtdı, İstanbul kimi şəhərin böyuk şəhər bələdiyyə başqanlığını iki dəfə qazandı, lakin bütün bunlar o demək deyil ki, bu adam qardaş Türkiyə üçün vazkeçilməz bir siyasi xaldimdir. Əsas məsələ dövlətin güvənliyi, sabahının əminliyidir. Türkiyənin daxili işlərinə qarışmadan dəmək istəyirəm ki, bu güvənlik və sabaha əminlik Əkrəm İmamoğlu kimi manipulyatorlarla bağlı məsələ deyil. Onun kimilər Türkiyə üçün faydali deyil, yalnız ziyan gətirə bilərlər. Türkiyənin dərin dövləti də bu ziyanın olmaması üçün qanun çərçivəsində uyğun addımları vaxtında atdı və şəxsən mən bunu doğru hesab edirəm. Amma bütun bunlarla bərabər, birmənalı qeyd edirəm ki, bu cür məsələlər qardaş Türkiyənin öz daxili işidir, bizim üçün Türkiyənin dövlət olaraq sabitliyi, davamlılığı və sabahının təminatı hər şeydən vacibdur. Əgər bu dövlət o təminatı belə addımlar ataraq sığortalamaq istəyirsə, bizə düşən Türkiyə dövlətinin seçiminə hörmət göstərməkdir".
Akif NƏSİRLİ
