Ceyhun Məmmədov: “Türkmənistan Azərbaycan vasitəsilə qazı Avropaya ixrac etsə, bundan daha çox qazanacaq”
İndiyə qədər Türkmənistan rəhbərləri Azərbaycanla münasibətlərdə həmişə qəribə bir ehtiyatlılıq nümayiş etdiriblər. Azərbaycanla Türkmənistan arasında yaxınlaşma dövrü müxtəlif vaxtlarda olsa da, bu, davamlı olmayıb. İndi isə, görünür, iki ölkə arasında buzlar əriyir.
Türkmənistan Xalq Məsləhətinin sədri Qurbanqulu Berdiməhəmmədovun Azərbaycana səfəri, keçirdiyi görüşlər bu qənaətə gəlməyə əsas verir.
Qurbanqulu Berdimuhemmedovun Azərbaycana son səfəri, keçirdiyi çoxsaylı görüşlər, məxsusən Qarabağa getməsi, gedən quruculuq işləri ilə yaxından tanış olması fonunda, iki ölkə arasında görünməmiş bir yaxınlaşma, qarşılıqlı etimadın möhkəmlənməsi müşahidə edilir. Bütün bunların fonunda hesab etmək olarmı ki, yaxın perspektivdə Türkmənistan qazını TransXəzər vasitəsi ilə dünya bazarına çıxarmaq üçün konkret addımlar atacaq, təşəbbüslə çıxış edəcək?
“Fikrimcə, bu imkanlar dəyərləndiriləcək və biz növbəti mərhələdə bu istiqamətdə real addımların atıldığının şahidi olacağıq”
Sözügedən məsələni “Bakı-Xəbər”ə şərh edən millət vəkili Ceyhun Məmmədovun fikrincə, Türkmənistan Xalq Məsləhətinin sədrinin Azərbaycana səfəri bir çox aspektdən xüsusi önəm və əhəmiyyət kəsb edir: “Bu səfər iki dost və qardaş türk respublikası arasında əlaqələrin möhkəmlənməsinə, inkişafına öz ciddi töhvəsini verəcək. Bizim əlaqələrimiz daha da inkişaf edib möhkəmlənəcək. Hesab edirəm ki, Azərbaycan-Türkmənistan əlaqələri yeni bir dövrə qədəm qoyur. İki ölkə arasında əlaqələrin keyfiyyətcə yeni bir mərhələyə daxil olacağının şahidi olacağıq. Əslində Azərbaycan uzun müddətdir əlaqələrin inkişafı üçün çalışır. Bu istiqamətdə müxtəlif addımlar atır. Cənab Prezidentin bu istiqamətdə davamlı təkliflərini, səylərini görmüşük. Bu mənada Türkmənistan Xalq Məsləhətinin sədri Qurbanqulu Berdiməhəmmədovun Azərbaycana səfəri, Qarabağa getməsi, orada görülən işlərlə tanış olması əlaqələrimizin yeni bir dövrə keçməsinin göstəricisidir. Fikrimcə, növbəti illərdə bu əlaqələrin daha da inkişafını görəcəyik. Əslində bu gün bunun üçün çox geniş imkanlar var. Eyni zamanda biz qeyd etməliyik ki, Türkmənistanın çox zəngin qaz yataqları var. Türkmən qazının Avropaya ixracı üçün Azərbaycanın geniş imkanları var. Çünki Azərbaycan illərlə bu sahəyə milyardlarla sərmayə qoyaraq müasir infrastruktur yaradıb. Artıq 5 ildir ki, Azərbaycan Avropaya qaz ixrac edir. Cənub Qaz Dəhlizi İtaliyaya qədər uzanır. O baxımdan Türkmənistan niyə də bu imkanlardan faydalanmasın? Türkmənistan Azərbaycan vasitəsi ilə öz qazını Avropaya ixrac etsə, bundan daha çox qazanacaq. O baxımdan hesab edirəm ki, Türkmənistan bu imkanlardan daha çox istifadə etməlidir. Çünki Türkmənistan üçün Avropaya ən qısa yol Azərbaycandan keçir. Bu baxımdan TransXəzər qaz kəmərinin çəkilməsinə qərar verilsə, Türkmənistanın ixrac gəlirləri əhəmiyyətli dərəcədə artacaq. Fikrimcə, bu imkanlar dəyərləndiriləcək və biz növbəti mərhələdə və bu istiqamətdə Türkmənistan tərəfindən real addımların atıldığının şahidi olacağıq”.
Vidadi ORDAHALLI
