Paşinyan Rusiyanın əsas fiquru ilə bağlı bütün planları açdı...
Ramil Hüseynov: “Paşinyanın açıqlaması o deməkdir ki, Rusiya emissarlarına qarşı sərt siyasət davam etdiriləcək”
Ermənistanın Baş naziri Nikol Paşinyan Rusiyada yaşayan bəzi erməni oliqarxların ölkə siyasətinə müdaxilə cəhdlərini tənqid edib və bu xüsusda Samvel Karapetyanın adını çəkərək sərt açıqlamalar verib:
“Onlar bildiriblər ki, Samvel Karapetyan Ermənistanda siyasi fəaliyyətlə məşğul olacaq. Mən soruşuram: onun əsas vətəndaşlığı olan ölkədə belə bir şey ağlına gələrmi? Əgər belə bir fikir orada ağlına gəlsəydi, o, ilk fürsətdə həmin binanın yuxarı mərtəbəsindən özünü atardı. Ermənistanda özünüzü əsas vətəndaş olduğunuz ölkədə necə aparırsınızsa, eləcə də aparın”.
Paşinyan həmçinin xəbərdarlıq edib ki, Ermənistanın suverenliyinə, müstəqilliyinə və dövlətçiliyinə qarşı istənilən təhdidə qarşı xalqın ona verdiyi “dəmir mandatı” dərhal işə salacaq: “Kim olursa-olsun, əgər Ermənistanın suverenliyinə və dövlətçiliyinə toxunmağa cəhd etsə, mən dərhal xalqın mənə verdiyi dəmir mandatdan istifadə edəcəyəm”.
Burada diqqət çəkən məqam ondan ibarətdir ki, Paşinyan “o ilk fürsətdə həmin binanın yuxarı mərtəbəsindən özünü atardı” deməklə, əslində Rusiyada məmurların müəmmalı şəraitdə ölməsinə eyham vurub. Yəni Rusiyada icazəsiz belə təşəbbüslə çıxış edənləri nə gözlədiyinə işarə edib.
“Fərqli mövqedən çıxış edən ya Navalnı kimi həbsxanada öldürülür, ya da hündürmərtəbəli binanın pəncərəsindən yerə atılır”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynovun fikrincə, Paşinyan bununla Rusiyaya açıq mesaj verir: “Demək istəyir ki, hər şeyin fərqindədir. Yəni Karapetyan xüsusi missiya ilə Ermənistana göndərilib və arxasında Rusiya hakimiyyəti dayanıb. Paşinyan həm də işarə edir ki, Ermənistanda mövcud olan siyasi mühit Rusiyada yoxdur. Fərqli mövqedən çıxış edən ya Navalnı kimi həbsxanada öldürülür, ya da hündürmərtəbəli binanın pəncərəsindən yerə atılır. Yəni Karapetyan Rusiyada müxalif mövqe sərgiləsəydi onun aqibəti belə olacaqdı. Bu günlərdə Rusiyanın keçmiş nəqliyyat naziri və Kursk vilayətinin keçmiş qubernatoru Roman Starovoytyn intihar etməsi bir daha bu ölkədə sistemin necə kriminal qaydalarla idarə edildiyini ortaya qoydu. Paşinyanın açıqlaması həm də o deməkdir ki, Rusiya emissarlarına qarşı sərt siyasət davam etdiriləcək. Ümumən bəli, Rusiyanın Ermənistana qarşı təsir rıçaqları geniş və çoxşaxəlidir. Ancaq erməni ictimai rəyində Rusiyapərəst qüvvələrin sosial dayaqları zəifdir. Paşinyanı da cəsarətləndirən budur. Üstəlik, ABŞ Paşinyanın təhlükəsizliyinin təmin edilməsinə yardım edir. Avropa İttifaqı isə iqtisadi baxımdan bu ölkəyə yardım edir. Söhbət maliyyə yardımlarından gedir. Məsələnin digər tərəfi onunla əlaqədardır ki, Rusiyanın Ermənistanla birbaşa quru sərhədi yoxdur. Bütün bunlar onu deməyə əsas verir ki, Paşinyanın Rusiyanın təzyiqlərinə duruş gətirmək imkanı böyükdür”.
Vidadi ORDAHALLI
