Əli Mustafa: “İndiki şəraitdə ən məqbul variant üçtərəfli işçi qrupun fəaliyyətinə rəsmən son verməkdir”
Regional nəqliyyat kommunikasiyalarının açılması məsələsi üzrə Azərbaycan, Rusiya və Ermənistanın Baş nazirlərinin müavinlərindən ibarət üçtərəfli işçi qrup etimad problemləri səbəbindən fəaliyyət göstərmir.
Bu barədə Ermənistan baş naziri Nikol Paşinyan keçirdiyi mətbuat konfransında bildirib.
“Ermənistan, Azərbaycan və Rusiyanın Baş nazirlərinin müavinləri formatı məlum səbəblərdən, o cümlədən bəzi praktiki problemlər, mövcud mətnin təfsiri ilə bağlı fikir ayrılıqları səbəbindən artıq çoxdan fəaliyyət göstərmir”, - o bildirib. Paşinyan onu da vurğulayıb ki, sözügedən işçi qrup “müəyyən etimadsızlıq” səbəbindən fəaliyyət göstərmir.
Əgər işçi qrupa etimadsızlıq varsa və çoxdandır toplanmırsa, o cümlədən indiyə qədər hansısa məsələnin həllinə nail olmayıbsa, o zaman üçtərəfli işçi qrupun mövcudluğunun mənası nədir? Bundansa, belə bir qrupu buraxmaq daha məqsədəuyğun olmazdımı?
“Əslində Rusiya bununla Zəngəzur dəhlizi üzərində nəzarətini təmin etmək istəyirdi”
Sözügedən məsələni “Bakı-Xəbər”ə şərh edən siyasi şərhçi Əli Mustafa hesab edir ki, regional nəqliyyat kommunikasiyalarının açılması məsələsi ilə bağlı üç ölkənin baş nazirlərinin müavinlərindən ibarət üçtərəfli işçi qrupun mövcudluğuna heç bir ehtiyac qalmayıb: “Ən azından ona görə ki, bu işçi qrup fəaliyyət göstərmir. Müvafiq işçi qrupu 2021-ci ildə Rusiya prezidenti Vladimir Putinin təşəbbüsü ilə yaradılıb və regionda nəqliyyat-kommunikasiya xətlərinin bərpası məqsədi daşıyırdı. Əslində isə Rusiya bununla Zəngəzur dəhlizi üzərində nəzarətini təmin etmək istəyirdi. Rusiya rəsmisi Overçukun bir müddət regiona tez-tez səfərləri də bunun tərkib hissəsi idi. Ancaq Ermənistanın dəhlizə Rusiyanın nəzarətinə qarşı olması bir növ üçtərəfli işçi qrupun passivləşməsi ilə nəticələndi. Belə baxanda, nəinki Ermənistan, Azərbaycan da Rusiyanın dəhlizə nəzarət etməsinə qarşıdır. Çünki Rusiya kimi dövlət bu kimi vasitələrdən bütün tərəflərə qarşı bir təzyiq vasitəsi kimi istifadə edir. Nəzərə almaq lazımdır ki, Azərbaycanla Ermənistan arasında neçə müddətdir birbaşa təmaslar mövcuddur. Bakı ilə İrəvan hansısa vasitəçi olmadan bir sıra məsələlərlə bağlı ortaq məxrəcə gəliblər. O cümlədən, nəqliyyat əlaqələrinin bərpasında Rusiyanın iştirakına ehtiyac qalmayıb. Bu baxımdan indiki şəraitdə ən məqbul variant üçtərəfli işçi qrupun fəaliyyətinə rəsmən son verməkdir. Madam ki, ortada işçi qrupun fəaliyyəti yoxdur, onun saxlanılmasının bir mənası yoxdur”.
Vidadi ORDAHALLI
