Ceyhun Məmmədov: “...Məqsədli şəkildə bu cür təxribatçı fikirlər səsləndirirlər”
Ermənistana lobbiçilik edən, erməni yalanlarına havadarlıq edənlərdən biri olan İsveçrə Milli Şurasının üzvü Ştefan Müller-Altermatt yenə də həqiqətə uyğun olmayan fikirlər bildirib, Azərbaycanla Ermənistan arasında sülh müqaviləsinin hələ də imzalanmamasının suçunu rəsmi Bakının üstünə atmağa cəhd edir.
Ştefan Müller-Altermatt “Armenpress”ə verdiyi açıqlamada reallıqdan uzaq iddiallar səsləndirib və deyib ki, Azərbaycan prezidenti İlham Əliyev Ermənistanla sülhün bərqərar olmasında guya maraqlı deyil. O deyib ki, “tərəflər arasında sülh ancaq Azərbaycana kənardan təzyiqlə əldə edilə bilər”.
İsveçrəli deputatın dedikləri kökündən yanlışdır, o yenə də həqiqəti təhrif edib.
Azərbaycana düşmən mövqeyi ilə seçilən bu adamın özü də çox yaxşı bilir ki, Azərbaycanla Ermənistan arasında münasibətlərin normallaşmasında və tərəflər arasında sülh sazişinin imzalanmasında maraqlı olmayan Ermənistan tərəfidir və indiyə qədər bu prosesə bu ölkə və onun havadarları əngəl törədiblər. Bütün bunlar gün kimi aydın olduğu halda, bu erməni lobbiçisinin rəsmi Bakını ittiham etməsi yolverilməzdir. Bütün dünya bilir ki, rəsmi Bakı, şəxsən Azərbaycan Prezidenti İlham Əliyev sülh müqaviləsinin imzalanmasında maraqlıdır və ortaya konkret siyasi iradə qoyub. Ermənistan tərəf isə min bir bəhanə ilə sülh sazişinin imzalanmasına mane olur və Cənubi Qafqazda sülhün və əmin-amanlığın bərqərar olmasında maraqlı deyil. İsveçrəli deputatın səsləndiyi beynəlxalq qurumlar, dünya birliyi, iri dövlətlər Ermənistana təzyiq göstərməlidir ki, sülh sazişi imzalansın.
“Bu təxribatçı qruplar, təxribatçı insanlar o prosesə mane olaraq, bölgədəki vəziyyəti daha da gərginləşdirirlər və mürəkkəbləşdirirlər”
Millət vəkili Ceyhun Məmmədov “Bakı-Xəbər”ə təəssüflə bildirdi ki, biz bu cür açıqlamaların ilk dəfə deyil şahidi oluruq. “Ümumiyyətlə, bu insanların ya bölgədən xəbərləri yoxdur, ya münaqişə haqda məlumatsızdırlar, ya gedən proseslərdən xəbərsizdilər, ya da məqsədli şəkildə bu cür təxribatçı fikirlər səsləndirirlər. Bu, daha çox təxribat xarakterlidir, belə iddiaların mahiyyəti təxribat törətməkdir. Bu hazırda Azərbaycanla Ermənistan arasında aparılan danışıqların ruhuna da tamamilə ziddir. Yəni bu gün iki ölkə arasında danışıqlar uğurla davam edir. Bizim bu sahədə davamlı olaraq Ermənistanla bir dialoqunuz var və bu dialoq ona doğru aparır ki, əlaqələrimiz normallaşır, daha da yaxşı istiqamətə doğru gedir”.
C.Məmmədov bu anlamda hesab edir ki, bu qüvvələr bölgəmizdəki proseslərə müdaxilə etməsələr biz daha tez sülhə və anlaşmaya nail ola bilərik, nəinki bu cür müdaxilələrlə. “Yaxşı olar ki, onlar bu cür açıqlamalara, bu cür təxribatlara son qoysunlar, bölgəmizdəki prosesi gərginləşdirməsinlər. Yəni bunlar sülhə töhfə vermək istəyirlərsə onların ən böyük töhfəsi bu prosesə mane olmamaq ola bilər. Yəni bu gün qeyd etdiyimiz kimi Azərbaycanla Ermənistan arasında çox yaxşı, konstruktiv dialoq, əməkdaşlıq var, müzakirə gedir, tərəflər müsbət açıqlamalar verir, bu təxribatçı qruplar, təxribatçı insanlar isə o prosesə mane olaraq bölgədəki vəziyyəti daha da gərginləşdirirlər və mürəkkəbləşdirirlər. Ona görə də bizim tövsiyəmiz odur ki, yaxşı olar bu cür məsələlərə son qoysunlar və bölgədəki proseslərə müdaxilə etməsinlər”.
Millət vəkili hesab edir ki, həmin qüvvələr müdaxilə etməyi nə qədər tez dayandırarsa, bölgəmizdə o qədər tez sülh, əmin-amanlıq bərqərar olar, Azərbaycanla Ermənistan arasında sülh sazişi daha tez bağlanar.
İradə SARIYEVA
