Hüseyn İbrahimov: “Paşinyan maraqlıdır ki, Vardanyan başda olmaqla separatçılar Bakıda həbsdə qalsın”
Qarabağdakı erməni separatçılarının “keçmiş dövlət naziri” Ruben Vardanyanın azadlığa buraxılması məqsədilə onun ailə üzvləri və dostları ABŞ Prezidenti Donald Trampa məktub göndərmək istəsələr də, Ermənistanın baş naziri Nikol Paşinyan belə bir addıma icazə verməyib.
Ölkənin “Hraparak” qəzetinin öz mənbələrinə istinadən yaydığı məlumata görə, ABŞ-dakı erməni diasporunun nüfuzlu nümayəndələri sözügedən məqsədlə Donald Trampın qızının əri ilə əlaqə saxlayıblar. Onlara verilən cavabda bildirilib ki, razılıq üçün "Ermənistan hökumətinin rəsmi müraciət məktubu" mütləqdir. Müraciət təklifi Ermənistanın ABŞ-dakı səfiri vasitəsilə Paşinyana çatdırılsa da, Nikol belə bir addımın “İrəvan və Bakı arasında sülh sazişi layihəsinə xələl gətirə biləcəyini” vurğulayaraq, amerikalı həmkarına Vardanyanın azadlığa buraxılması xahişi ilə məktub göndərməkdən boyun qaçırıb.
“Onlar həbsdən çıxsa, Nikolun başına bəla olacaqlar və bunu bilə-bilə, əlbəttə ki, Trampdan belə bir xahiş etməz”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimov hesab edir ki, Paşinyanın bundan imtina etməsi kifayət qədər əsaslıdır və hətta gözlənilən idi: “Əvvəla, Paşinyan Vardanyan layihəsinin hansı məqsədlə ortaya atıldığını yaxşı bilirdi. Vardanyanı Qarabağa göndərməkdə Rusiyanın məqsədi o idi ki, sonrakı mərhələdə Ermənistanda hakimiyyəti ələ keçirsin. Bənzər praktikanı bir vaxtlar Rusiya Ermənistanda uğurla sınaqdan çıxarıb. Məsələ ondadır ki, bir vaxtlar Robert Köçəryan Qarabağda separatizmə rəhbərlik edirdi. Bilavasitə Rusiyanın yardımı ilə Azərbaycan əraziləri ermənilər tərəfindən işğal edildi. Daha sonra Qarabağ dalğasında şişirdilən Köçəryan 1997-ci ildə Ermənistanın baş naziri postuna gətirildi. 1998-ci ildə isə Rusiya prezident Levon Ter-Petrosyanı devirərək Köçəryanı prezident etdi. Ondan sonra həm Köçəryanın, həm də Serj Sarkisyanın prezidentliyi dönəmlərində Ermənistan birmənalı olaraq Rusiyanın vassalı, satelliti olaraq siyasət yeritdi. Vardanyan layihəsi alınsaydı, bənzər ssenari yenidən təkrarlanardı. Azərbaycanın uğurlu antiterror əməliyyatı, Qarabağda suverenliyini tam bərqərar etməsi Rusiyanın planını pozdu. Necə deyərlər, Vardanyan planı suya düşdü. O cümlədən digər separatçı başçılar həbs edildi. Paşinyan maraqlıdır ki, Vardanyan başda olmaqla separatçılar Bakıda həbsdə qalsın. Çünki onlar həbsdən çıxsa Nikolun başına bəla olacaqlar və bunu bilə-bilə, əlbəttə, Nikol Trampdan belə bir xahiş etməz. Ən başlıcası isə, Rusiyapərəst separatçıların azadlığa çıxmasını niyə xahiş etsin ki?”.
Vidadi ORDAHALLI
