Sədrəddin Soltan: "İran hakimiyyətinin Azərbaycan Respublikasına dəyişməz münasibəti var – bu, Azərbaycanın zəiflədilməsi, regionda inkişafdan qalması, Azərbaycanın İrandan asılı vəziyyətə düşməsi arzusudur"
İranın ali dini liderinin beynəlxalq məsələlər üzrə müşaviri Əli Əkbər Vilayəti Tehranda Pakistanın daxili işlər naziri Səid Möhsin Nəqvi ilə görüşündə Azərbaycan hakimiyyətini tənqid edib,- bu barədə IRNA xəbər verir.
“Sizin Azərbaycanla yaxın münasibətləriniz var, lakin eyni zamanda qeyd etmək lazımdır ki, Azərbaycan dövləti İslam dünyasının baxışlarına zidd addımlar atır”, - deyən nazir Bakını “əl-Culani ilə sionist rejim arasında vasitəçilik etməkdə, eləcə də İsrailə neft ixrac etməkdə” ittiham edib.
İranın ali rəhbərinin ətrafı hələ də Azərbaycanı əsassız olaraq ittiham etməklə iki ölkə arasında münasibətləri korlamağa can atır. Bunun səbəbi nədir, bu insanların hədəfi nədir, nəyə nail olmaq istəyirlər?
Baki-xeber.com saytına açıqlamasında Orta Doğu Araşdırmaları Mərkəzinin rəhbəri, siyasi sərhçi Sədrəddin Soltan bildirdi ki, İran hakimiyyətinin Azərbaycan Respublikasına dəyişməz münasibəti var – bu, Azərbaycanın zəiflədilməsi, regionda inkişafdan qalması, Azərbaycanın İrandan asılı vəziyyətə düşməsi arzusudur: "Tehran hakimiyyəti buna iki məqsədlə cəhd edir. Birincisi, Azərbaycan Respublikasını "böyük qardaş" kimi idarə etmək, daxili işlərinə müdaxilə etmək imkanı qazanmaq, ikincisi isə dövləti Güney Azərbaycan türklərinin gözündən salmaqdır.
Vaxtilə Azərbaycan torpaqları işğal altında olanda Tehran hakimiyyəti Güney Azərbaycan türklərinə həmişə bu məsələni baş qaxıncı edirdilər ki, Azərbaycan Respublikası (Şurəvi) azad oldu, torpaqlarını itirdi, bir ovuc ərməni ilə Azərbaycan bacara bilmir. Torpaqlar işğaldan azad edildikdən sonra İran hakimiyyətinin ritorikasında dəyişiklik bas verdi. Bu ritorika Azərbaycan-İsrail, Azərbaycan-Amerika münasibətləri üzərində qurulmağa başladı.
Düzdür, əvvəllər də Azərbaycan-İsrail münasibətlərini Tehran hakimiyyəti qısqanclıqla qarşılayırdı. Amma son dönürlərdə, xüsusilə 12 günlük müharibədən sonra İran iqtidarı uğursuzluqlarının səbəbini başqa məsələlərdə axtarır. Onlardan biri Azərbaycan-İsrail münasibətləri, digəri isə, guya İran daxilində İsrailə casusluq edənlərdir. Başqa bir səbəb isə guya ərəb ölkələrinin İranı dəstəkləməməsidir.
İranın ali rəhbəri Ayətullah Seyyid Əli Xamneinin beynəlxalq məsələlər üzrə müşaviri Əli Əkbər Vilayətinin belə yersiz və gülünc açıqlaması iki ölkə arasındakı əlaqələrə, əməkdaşlığa, bərpa edilən münasibətlərə ciddi zərbə vurur. Artıq bu, Tehran hakimiyyətinə etimadı və etibarı zədələyir. Azərbaycan cəmiyyəti də birmənalı olaraq bilir ki, İran iqtidarından bu yanaşma ilə Azərbaycana heç vaxt dost, qonşu və qardaş ola bilməz.
Bunu dövlətin birinci adamının az qala baş müşaviri söyləyir. Çünki Vilayəti İran hökumətində uzun müddət xarici işlər naziri olmuş, yəni dövlətin xarici siyasətinə rəhbərlik etmiş bir şəxsdir. Onun bu cür açıqlama verməsi Azərbaycan-İran münasibətlərinə çox ciddi zərbə vuracaq.
Azərbaycan təkcə İsrail-Suriya münasibətlərinin normallaşması, yaxud İsrail-Suriya danışıqlarına ev sahibliyi etməyib, Azərbaycan bundan əvvəl Rusiya-NATO, Rusiya-ABŞ danışıqları üçün də ev sahibliyi edib. O zaman Vilayəti niyə hay-küy salmırdı ki, Azərbaycan Rusiya-ABS, Rusiya-NATO rəhbərlərinin görüşünə ev sahibliyi edir, yaxud Azərbaycan Türkiyə-İsrail rəhbərlərinin görüşünə ev sahibliyi edir? Yəni bu, Azərbaycanın regionda - həm Yaxın Şərqdə, həm də Cənubi Qafqazda sülhə, təhlükəsizliyə və əməkdaşlığa töhfələrindəndir. Tehran hakimiyyəti bütün bu proseslərdə oyundankənar vəziyyətdə qaldığından, həm də bunu qısqanclıqla qarşılayır. Hətta ola bilər ki, perspektivdə İran nümayəndələrinin Qərblə, yaxud da Suriya ilə danışıqlarına da Azərbaycan ev sahibliyi etsin. İran hakimiyyəti, belə olan halda Omanda və İtaliyada ABŞ nümayəndələri ilə niyə görüşür, hazır bunu öz ölkəsində və ya ABŞ-da nəyə görə keçirmir?
Yəni bu, İranın Azərbaycan Respublikasının varlığına, onun güclənməsinə, onun beynəlxalq aləmdə oynadığı rola qısqanc yanaşmasından doğur. Ötən 34 il ərzində Tehran hakimiyyəti Azərbaycana qarşı əlindən gələn bütün pislikləri edib. Amma nəticədə özünə qarşı etimadsızlıqdan başqa heç nəyə nail ola bilməyib".
Akif NƏSİRLİ
