Vardanyan Bakıda məhkəmədə istədiyi vəsatəti qəbul etdirə bilir...
Tural İsmayılov: “Erməni iddiaları hüquqi faktlara deyil, təbliğat məqsədli emosional ritorikaya əsaslanır, əslində isə…”
Azərbaycan Respublikasının Cinayət Məcəlləsinin sülh və insanlıq əleyhinə cinayətlər, müharibə cinayətləri, habelə terrorçuluq, terrorçuluğu maliyyələşdirmə ilə bağlı maddələri ilə və digər ağır cinayətlərdə təqsirləndirilən Ermənistan vətəndaşı Ruben Vardanyanın barəsində cinayət işi üzrə məhkəmə prosesi davam edir.
Qeyd edək ki, Bakı Hərbi Məhkəməsində təqsirləndirilən şəxs bildiyi dildə, yəni rus dilində tərcüməçi, habelə müdafiəsi üçün özünün seçdiyi vəkillə təmin olunub. Təqsirləndirilən Ruben Vardanyan məhkəməyə bir neçə vəsatət təqdim edib. Deyib ki, müdafiə tərəfi bundan əvvəl iclas protokolları ilə tanış olmaq üçün ərizə ilə müraciət edib. O xahiş edib ki, vəkili Avram Bermana onun iştirakı olmadan da iclas protokolları ilə tanış olması üçün şərait yaradılsın. İclasa sədrlik edən hakim Zeynal Ağayev bildirib ki, vəsatət təmin olunur. Bu, təqsirləndirilənin hüququdur. Təqsirləndirilən Ruben Vardanyana və onun vəkili Avram Bermana iclas protokolları ilə tanış olmaq üçün daim şərait yaradılıb və bundan sonra yaradılacaq. Həmçinin, Vardanyan bütün məhkəmə iclaslarından əvvəl ona vəkili ilə konfidensial görüşmək üçün imkan yaradılmasını xahiş edib. Ancaq erməni mediası isə israrla qeyd edir ki, guya Bakıda keçirilən məhkəmə prosesində təqsirləndirilən şəxslərin hüquqları kobud şəkildə pozulur. Onlar tərcüməçi ilə təmin olunmayıb, həmin şəxslərlə kobud rəftar olunur. Ancaq məhkəmə prosesi zamanı aydın olur ki, təqsirləndirilən şəxslər tərcüməçi, vəkillə təmin olunub, hətta onların qaldırdığı bir neçə vəsatət belə təmin olunub.
“Tərəfsiz müşahidəçilər də məhkəmənin gedişatında ciddi pozuntu aşkarlamayıb, həqiqətlər erməni miflərini dağıtmaqda davam edir”
Siyasi şərhçi Tural İsmayılov “Bakı-Xəbər”ə şərhində bildirdi ki, erməni mediasının Ruben Vardanyanla bağlı yaydığı məlumatlar birbaşa manipulyasiya və dezinformasiya nümunəsidir. Onların iddiaları hüquqi faktlara deyil, təbliğat məqsədli emosional ritorikaya əsaslanır: “Əslində isə, məhkəmə prosesi Azərbaycan qanunvericiliyinə və beynəlxalq hüquq prinsiplərinə uyğun aparılır. Təqsirləndirilən şəxslərin hüquqları qorunur, onlar həm tərcüməçi, həm də müdafiə vəkilləri ilə təmin olunublar. Vardanyanın özü də bir neçə vəsatət irəli sürüb və onların bir qismi təmin olunub. Bu, məhkəmənin şəffaf və ədalətli şəkildə həyata keçirildiyini açıq şəkildə göstərir. Azərbaycanın hüquq sistemi revanş yox, ədalət prinsipini rəhbər tutur. Ermənistan mediası isə təqsirləndirilən şəxsləri “müqəddəs” kimi təqdim etməyə çalışır. Amma bu keçməyəcək. Ruben Vardanyan Azərbaycan vətəndaşlarının qanını tökmüş, beynəlxalq hüququ pozmuş, separatizmi maliyyələşdirmiş bir fiqurdur. Belə şəxslərin hüquqlarının qorunması ayrı məsələdir, onların cəzasız qalması isə mümkün deyil. Hüquqi prosesin hər anı qeydə alınır və ictimai nəzarət altındadır. Azərbaycanın məhkəmə sisteminə kölgə salmaq cəhdləri beynəlxalq ictimaiyyətdə də qəbul olunmur. Tərəfsiz müşahidəçilər də məhkəmənin gedişatında ciddi pozuntu aşkarlamayıb. Həqiqətlər erməni miflərini dağıtmaqda davam edir. Azərbaycanın mövqeyi isə dəyişməzdir: kim günahkardırsa qanun qarşısında cavab verməlidir”.
Günel CƏLİLOVA
