Rusiya Akkuyu AES-lə bağlı Türkiyəyə qəbuledilməz şərt qoydu...
Əli Orucov: “İstənilən halda, bunun kökündə siyasi səbəblərin olma ehtimalı daha böyükdür”
Türkiyənin Akkuyu AES-in tikintisində çalışan ruslar maaşlarını almağı dayandırıblar.
Bu barədə işçilərin yaxınları Sotaproject-ə bildiriblər.
Onların sözlərinə görə, problemlər may ayında yaranıb və artıq iki aydır ki, davam edir, bunun fonunda heyət 12 min nəfərdən 3 min nəfərə endirilib. Layihə Rusiyanın “Rosatom” dövlət korporasiyası tərəfindən “tik-sahiblən-işlət” modelindən istifadə etməklə həyata keçirilir.
Məlum olub ki, Rusiya Federasiyasındakı işçilər Titan-2 şirkəti tərəfindən işə götürülür və orada Türkiyənin TSM Enerji şirkəti ilə əmək müqaviləsi bağlayırlar. Mart ayında türkiyəli işçilər əmək haqqı indeksasiyasının olmaması səbəbindən tikilməkdə olan AES-də tətilə çıxıblar. Rus işçilər etiraz etməkdən qorxurlar. Onlar işdən çıxarılmaqla hədələnirdilər və əmək müqaviləsi ilə alınmış Rusiya Federasiyasına geri dönüş biletləri ləğv edilib. O cümlədən, bu cür tədbirlər türkiyəli vəkilə müraciət edən 200 Ahıska türkünə (onlar Rusiya Federasiyası vətəndaşlarıdır) tətbiq edilib. Fevral ayında məlum olub ki, Rusiya sanksiyalardan yaranan ödəniş problemlərinə görə Türkiyəyə Akkuyu AES-in tikintisi ilə bağlı xərclərin bir hissəsini öz üzərinə götürməyi təklif edib. Bloomberg mənbələri Rosatom-un Qazprom-a rublla ekvivalent məbləği köçürməyi planlaşdırdığını, bununla da Türkiyənin Rusiya qazı idxalı üçün aylıq ödənişindən çıxacağını bildirib.
Maraqlıdır, bütün bu deyilənlərin fonunda nə baş verir? Rusiya üzərinə düşən öhdəliklərini niyə icra etmir? Ola bilərmi ki, Rusiya bilərəkdən Türkiyənin AES-ə malik olmasını qəsdən ləngidir?
“Görünür, Moskva da bu yolla Türkiyəyə təzyiq edir və hansısa güzəştlər tələb edir”
Sözügedən məsələyə aydınlıq gətirən AMİP funksioneri Əli Orucov “Bakı-Xəbər”ə açıqlamasında bildirdi ki, bunun arxasında iqtisadi səbəblərdən çox, siyasi motivlər dayanır: “Güman edirəm ki, bunun arxasında hansısa siyasi faktorlar dayanır. Ümumən, bəli, Ukrayna müharibəsi səbəbindən Rusiya böyük itkilərə məruz qalır. Qərbin tətbiq etdiyi genişmiqyaslı sanksiyalar hər keçən gün Rusiya iqtisadiyyatına daha çox mənfi təsir göstərir. Ancaq mən deməzdim ki, məhz sanksiyalar səbəbindən Rusiya Akkuyu AES-in tikintisində çalışan rus fəhlələrin pulunu verə bilmir. Bu, o qədər də inandırıcı görünmür. Necə olur ki, Ukrayna müharibəsini maliyyələşdirməyə vəsait tapılır, amma Akkuyu AES-in fəhlələrinə maaş verməyə pul tapılmır? Üstəlik, burada imic söhbəti var. Çox güman ki, Suriyada Əsəd rejiminin devrilməsi və bizə məlum olmayan digər siyasi səbəblərdən belə vəziyyət yaranıb. Çünki Rusiyadan nə desən gözləmək olar. Azərbaycanla gərginlik yaranan kimi pomidor idxalını dayandırır. Gürcüstanla problem yarananda gürcü şərabında “problem” ortaya çıxır. Bu baxımdan Rusiya öz köhnə ənənəsindən əl çəkmir. Türkiyənin regionda, dünyada, türkdilli dövlətlərdə artan rolu, təsir imkanları Moskvanı narahat edir. Görünür, Moskva da bu yolla Türkiyəyə təzyiq edir və hansısa güzəştlər tələb edir. Ola bilər ki, Türkiyə artıq Rusiyanın sanksiyalardan yan keçməsinə əvvəlki kimi göz yummur. İstənilən halda, bunun kökündə siyasi səbəblərin olma ehtimalı daha böyükdür”.
Vidadi ORDAHALLI
