“3 dövlət birləşir” - Bakı-Dəməşq “qaz əməkdaşlığına” erməni mediasından hücum başladı...
Akif Nəsirli: “Bu təxrubatçı məlumatı tirajlamaqla İranı qıcıqlandırmaq məqsədi güdürlər ki, İran qıcıqlanıb cavab versin və nəticədə Azərbaycanla münasibətləri yenidən gərginləşdirsin”
İyulun 12-də Suriyanın keçid dövrü Prezidenti Əhməd Əl Şaraanın Azərbaycana rəsmi səfəri çərçivəsində SOCAR ilə Suriya hökuməti arasında imzalanan qaz ixracı sazişini Ermənistan mediası qıcıqla qarşılayıb və hadisə ətrafında uyğun olmayan rəylər formalaşdırmağa çalışıb.
Erməni mediası yazır ki, Ankara-Bakı-Dəməşq Enerji Alyansı guya “İranı Suriyanın Qaz bazarından sıxışdıra bilər”.
Erməni mətbuatı bunu tirajlamaqla, əslində İranı qızışdırmaq və bu məsələni pozmaq məqsədi güdür. Başa düşürlər ki, Türkiyə, Azərbaycan, Suriya - bu üçbucaqda enerji əməkdaşlığının qurulması, həyata keçirilməsi Ermənistana çox ciddi ziyanlar vuracaq. Ən azı Ermənistanın regional blokadasını gücləndirə bilər, onlar bundan da narahatdırlar və ona görə İranı da özlərinə qoşurlar.
“...mətbuat vasitəsilə bu prosesi pozmaq cəhdidir”
Erməni mediasının Azərbaycan-Suriya enerji əməkdaşlığından qıcıqlanmasının səbəbləri barədə “Bakı-Xəbər”ə danışan Liberal İqtisadçılar Birliyinin rəhbəri Akif Nəsirli “Bakı-Xəbər”ə bildirdi ki, Türkiyənin təklifi ilə Azərbaycanla Suriya arasındakı bu enerji razılaşması müəyyən mənada, hələ ki, siyasi xarakter daşıyır. A.Nəsirlinin fikrincə, siyasi xarakterli olması ondan ibarətdir ki, Ankara Türkiyə-Azərbaycan-Suriya müttəfiqliyinin möhkəmlənməsini, onun üzərindən iqtisadi bağlar da yaranmasını istəyir. “Sözsüz ki, Azərbaycan Suriyaya qazı Avropaya satdığı qiymətə satmayacaq, müəyyən güzəştlər olacaq. Burda Azərbaycanın da maraqları var, Yaxın Şərqdə təsirinin artması üçün belə bir ixracatın, iqtisadi bağın olması siyasi baxımdan vacib şərtlərdən biridir.
O ki qaldı Azərbaycan qazının Suriyaya ixracatı ilə Rusiyanın və İranın təcrid edilməsinə, Suriyaya qaz ixracatından uzaqlaşdırılması iddiasına, Rusiya hazırda Suriyaya qaz ixrac etmir, İran edir.
Bu məlumatı yayan “Kavkazlar”a da diqqət yetirmək lazımdır. Bu xəbəri yayan kanal Rusiyanın nəzarəti altında olan teleqram platformasıdır. Bu məlumatı həmin kanala istinadən yayan da erməni mətbuatıdır. Son zamanlar nə Rusiya bizimlə normal münasibətlərdədir, nə Ermənistan bizə dost gözü ilə baxır. Həm Rusiyanın, həm də Ermənistanın Azərbaycana münasibəti ortadadır, onlar bu təxrubatçı məlumatı tirajlamaqla İranı qıcıqlandırmaq məqsədi güdürlər ki, İran qıcıqlanıb cavab verisin və nəticədə Azərbaycanla münasibətləri yenidən gərginləşdirsin.
Bilirsiz ki, son zamanlar İranla münasibətlərimiz normal məcradadır. İran Prezidenti Məsud Pezeşkian iki dəfə Azərbaycana səfər edib. Eyni zamanda İran-İsrail müharibəsi zamanı Azərbaycanın neytral mövqedə qalması münasibətlərin yumşalmasına, iki qonşu ölkə arasında siyasi-diplomatik münasibətlərin normal məcraya yönəlməsinə səbəb oldu. Azərbaycanla İran arasında münasibətlərin müsbət məcrada inkişafını nə Ermənistan, nə də Rusiya həzm edə bilir. Əslində Azərbaycanla İran arasında siyasi münasibətlərin kəskinləşməsi, bu iki dövlətin bir-birinə yaxınlaşmaması Rusiya ilə Ermənistanın marağındadır. Ona görə də “Azərbaycan-Türkiyə-Suriya ittifaqının İrana zərəri dəyəcək”, yaxud “İran Suriyanın enerji bazarından sıxışdırılıb çıxarılacaq” kimi iddialar tamamilə əsassızdır. Bu, Ermənistanın və Rusiyanın mətbuat vasitəsilə bu prosesi pozmaq cəhdidir”-deyə A.Nəsirli qeyd etdi.
A.Nəsirli vurğuladı ki, Azərbaycan bu ölkəyə Suriyanın tam tələbatını ödəyəcək həcmdə qaz satmayacaq, Suriyaya qaz güzəştli qiymətlərlə veriləcək, əslində bu, yardım xarakteri daşıyır. “Ona görə də Suriya həm Azərbaycandan qaz alacaq, həm də İrandan qaz almağı davam etdirəcək. Hətta ehtimal var ki, Suriya İrandan aldığı qazın həcmini artırmaq istiqamətində müəyyən təkliflər verəcək, müəyyən tədbirlər həyata keçirəcək.
Erməni mediasının təqdim etdiyi bu “təhlil”, bu məlumat tamamilə qərəzlidir və Azərbaycanla İran arasında münasibətlərin kəskinləşməsini tətikləməyə xidmət edir. Əslində isə başdan-başa dezinformasiyadır” - deyə A.Nəsirli vurğuladı.
İradə SARIYEVA
