Ursula Lyayen Paşinyanın “sülh siyasəti” barədə inanılmaz sözlər dedi...
Sahil Kərimli: “Ursulla fon der Lyayenin bu fikirləri Ermənistanı müdafiə etməyə, onun dünyada “sülhpərvər” imicini formalaşdırmağa xidmət edir”
Avropa Komissiyasının sədri Ursula fon der Lyayen X-dəki mikrobloqunda Ermənistanın baş naziri Nikol Paşinyan, Avropa İttifaqı Şurasının prezidenti Antonio Kosta ilə Brüsseldəki görüşü haqqında etdiyi paylaşımında “Ermənistan sülh və sabitliyə dərindən sadiqdir”-deyə yazıb.
Paylaşımında o, Paşinyana xitabən “Siz Ermənistanın sülh və sabitliyə dərin sadiqliyini nümayiş etdirdiniz”-deyə bildirib.
Ursula fon der Lyayen deyib ki, Ermənistan sülhə çox dərindən meyllidir. Belə bəyanatları niyə verirlər? Bilirlər ki, Azərbaycan belə sözlərə inanmaz? Lyayenin canfəşanlığı nə ilə bağlıdır? Bir halda ki, yalan dediyini özü də bilir...
“Ermənistan dərindən sülh istəsəydi, bugünə qədər çoxdan sülh müqaviləsi imzalanmalı idi”
Siyasi ekspert Sahil Kərimli “Bakı-Xəbər”ə bildirdi ki, Avropa İttifaqı Komissiyasının sədrinin bu cür açıqlaması Ermənistanı müdafiə etmək məqsədi daşıyır: “Ursula fon der Lyayenin bu fikirləri Ermənistanı müdafiə etməyə, onun dünyada “sülhpərvər” imicini formalaşdırmağa xidmət edir. Halbuki, bütün dünya yaxşı bilir ki, reallıqda bugünə qədər sülhə mane olan əsas tərəf elə Ermənistanın özüdür. Əgər Ermənistan dərindən sülh istəsəydi, bugünə qədər çoxdan sülh müqaviləsi imzalanmalı idi. Ermənistanın uzun müddətdir sülh prosesinə vurduğu ciddi zərbələr, törətdiyi maneələr, xarici qüvvələrin təhriki ilə sərgilədiyi qeyri-konstruktiv mövqe sülh müqaviləsinin hələ də imzalanmamasına səbəb olub. Bu gün Azərbaycanın sülh istəkləri, Cənubi Qafqazda uzunmüddətli və dayanıqlı, ədalətli sülh və əminamanlıq yaratmaq niyyətləri göz önündədir və bunu bütün dünya birmənalı olaraq bu cür qüiymətləndirir. Amma çox təəssüf ki, Ermənistanı müdafiə və ona havadarlıq edən bu cür qüvvələr belə təxribatçı bəyanatlar verməklə yenə də prosesə mane olmağa çalışırlar.
Son dövrlərdə Azərbaycan Prezidenti İlham Əliyevlə Ermənistanın baş naziri Nikol Paşinyan arasında yaranan çox ciddi təmaslar, bir neçə gün əvvəl hər iki ölkənin rəhbərləri arasında keçirilən çox səmərəli görüşlər onu deməyə əsas verir ki, artıq Ermənistan da sülhün vaxtının gəlib çatdığını yaxşı anlayır. Ermənistan rəhbərliyi başa düşür ki, gec və ya tez Azərbaycan öz istəyinə nail olacaq, hədəflərinə, qarşıya qoyduğu vəzifələrinə çatacaq. Yəni Azərbaycan bölgədə dayanıqlı və ədalətli sülh istəyir, Ermənistan da uzun müddət idi ki, buna mane olurdu, amma biz nəhayət tərəflər arasında dialoqun müsbət mərhələyə keçdiyini görürük”.
S.Kərimlinin fikrincə, xüsusilə də Azərbaycanın irəli sürdüyü məsələlər, Azərbaycan üçün çox önəmli olan Zəngəzur dəhlizinin açılması, eyni zamanda sərhədlərin qarşılıqlı delimitasiya və demarkasiya prosesi, nəqliyyat-kommunikasiya xətlərinin açılışı, nəhayət bölgənin sülh və əminamanlıq şəraitində olması artıq yaxındadır. S.Kərimli qeyd etdi ki, bu belə qiymətləndirilə bilər. S.Kərimlinin sözlərinə görə, Azərbaycan Prezidenti ilə Ermənistanın baş naziri arasında keçirilən son görüş zamanı da biz müəyyən qədər də olsa bunun şahidi olduq. “Amma nə qədər ki, Avropa Komissiyası və digər bu kimi dairələrin prosesə bu cür müdaxilə cəhdləri olacaq, bu da qəbuledilməzdir və müəyyən çətinliklər yarada bilər. Ona görə də yaxşı olar ki, beynəlxalq dairələr də, Avropa İttifaqının bəzi siyasi qüvvələri də bu məsələlərdə ehtiyatlı davransınlar və bütün qüvvələr yalnız sülh prosesini irəliyə aparmağa yönəlsin”-deyə S.Kərimli qeyd etdi.
İradə SARIYEVA
