Məhəmməd Əsədullazadə: “Bununla Rusiya-Ukrayna müharibəsi yeni mərhələyə keçir”
İyulun 14-də ABŞ prezidenti Donald Tramp NATO-nun baş katibi Mark Rutte ilə görüşündə Ukraynadakı müharibə, Rusiyaya qarşı sanksiyalar və Amerika silahlarının tədarükü ilə bağlı bir sıra mühüm açıqlamalar verib.
Tramp Ağ Evdə NATO-nun baş katibi Mark Rutte ilə görüşündə Ukraynaya 17 “Patriot” zenit-raket kompleksinin göndəriləcəyini bildirib. O qeyd edib ki, bu, batareyaları olan tam dəst olacaq və ilk sistemlər çox tezliklə gələcək. Bundan əlavə, Tramp Ukraynanın təkcə “Patriot” hava hücumundan müdafiə sistemləri almayacağına eyham vurub.
“Ukrayna həm hava hücumundan müdafiə, həm də raketlər, döyüş sursatları və sair üçün həqiqətən böyük miqdarda hərbi texnika əldə edə biləcək”, - ABŞ Prezidenti bildirib.
Göründüyü kimi, Tramp Ukraynanın silahlandırılması ilə bağlı qərar verdi. Maraqlıdır, Trampın bu qərarından sonra müharibədə hansı dönüş gözlənilir?
“Trampın qərarı Rusiyanın hərbi, iqtisadi itkilərini artıracaq və bu da müharibənin gedişinə öz təsirini göstərəcək”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə hesab edir ki, Trampın qərarının Rusiya üçün nəticələri ağır olacaq: “Bununla Rusiya-Ukrayna müharibəsi yeni mərhələyə keçir. Trampın bundan sonrakı hərbi yardımları əvvəlki hərbi yardımlardan daha artıq nəzərdə tutulur. Həmçinin Rusiyanın aktivlərinin ABŞ tərəfindən müsadirə edilərək Ukraynaya silah tədarükü üçün istifadə edilməsi mümkün görünür. ABŞ Senatında Rusiyaya sanksiyaların tətbiq edilməsi üçün qətnamənin qəbul edilməsi gözlənilir. Trampın Ukrayna üzrə xüsusi nümayəndəsi Kiyevə gələrək bir həftə Ukraynada qalacaq. Proseslərin Rusiya üçün ciddi mənfi nəticələrinin olacağı gözlənilir. Bununla da Rusiya ilə ABŞ arasında diplomatik danışıqlar yerini daha aktiv hərbi müstəviyə daşıdı. Tramp Rusiyaya daha çox hərbi təzyiqlər etməklə, ilin axırına kimi onu danışıqlar masasında güzəştə məcbur etməyi hədəfləyir. Rusiyanın hazırkı resurslarla Ukraynadan tam çıxarılması gözlənilmir. Demək olar ki, Qərb Alyansı Rusiyaya qarşı birlik nümayiş etdirir. Qərbin artıq siyasi və hərbi cəhətdən Rusiyaya qarşı koalisiya formalaşdırması Rusiyanın strateji məğlub edilməsini qaçılmaz edir. Artıq ABŞ başda olmaqla, Avropa dövlətlərinin Rusiyaya qarşı artan hərbi təzyiqlərinə Çin etiraz edir. Hətta Çin Ukraynada Rusiyanın məğlub olmasını qəbul etməyəcəklərini elan edib. Bununla da indiyə kimi neytrallığını saxlayan Çin Rusiyanın yanında siyasi cəhətdən yer aldığını ortaya qoydu. Çin müharibənin davam etməsində və ABŞ-ın qalib gəlməsində maraqlı deyil. Çünki növbəti hədəf Hind-Sakit okean periferiyası olacaq. Təbii ki, Çin fəal şəkildə Rusiya ilə birgə Qərbə qarşı aktiv hərbi əməliyyatlarda iştirak etməyəcək. Çinin iqtisadiyyatı kifayət qədər Qərblə bağlıdır. Avropa ittifaqı və ABŞ Çinə iqtisadi sanksiyalar tətbiq edərsə, rəsmi Pekin Rusiyanı dəstəkləməkdən geri cəkilə bilər. Bütün hallarda Trampın qərarı Rusiyanın hərbi və iqtisadi itkilərini artıracaq. Çünki Ukraynaya təkcə müdafiə xarakterli silahlar yox, həm də hücum xarakterli silahlar veriləcək. Bu da müharibənin gedişinə öz təsirini göstərəcək”.
Vidadi ORDAHALLI
