Əməkdar mədəniyyət işçisi Musa Nəbioğlu Aydın Quliyevi təbrik etdi
“Ozan Dünyası” Aşıq Yaradıcılığının Təbliği İctimai Birliyinin sədri, “Ozan dünyası” jurnalının baş redaktoru, Əməkdar mədəniyyət işçisi Musa Nəbioğlu “Bakı-Xəbər” qəzetinin baş redaktoru Aydın Quliyevi 65 illik yubileyi münasibətilə təbrik edib.
Təbrikdə deyilir: “Hörmətli Aydın müəllim, Sizi - çağdaş Azərbaycan jurnalistikasının görkəmli nümayəndəsini anadan olmağınızın 65 illik yubileyi münasibəti ilə rəhbərlik etdiyim ictimai birliyin üzvləri və şəxsən öz adımdan səmimi qəlbdən təbrik edirəm!
Siz 65 illik şərəfli ömrünüzün yarıdan çoxunu ölkəmizdə mətbuatın inkişafına həsr etmisiniz və müstəqillik dövrü Azərbaycan mətbuatının formalaşmasında danılmaz xidmətləriniz var. Sizin hər çıxışınız, hər publisistik yazınız böyük maraqla qarşılanıb, cəmiyyətə yeni ideyalar verib, dövlətçiliyimizin, xalqımızın mənafelərinin qorunması baxımından hər zaman faydalı olub.
Siz təkcə peşəkar baş redaktor deyil, həm də görkəmli ictimai xadim, tanınmış politoloq və siyasətçi, öz düşüncəsi, təfəkkürü, hadisələrə maraqlı və orijinal yanaşmaları olan sözün əsl mənasında dəyərli bir ziyalısınız. Azərbaycan Mətbuat Şurası İdarə Heyətinin üzvü kimi də qayğılarınız çoxdur.
Qəzetinizdə mədəniyyətimizə, xüsusilə də aşıq sənətinə, onun daha geniş miqyasda təbliğinə, “Ozan Dünyası” Aşıq Yaradıcılığının Təbliği İB-nin həyata keçirdiyi tədbirlərin işıqlandırılmasına böyük önəm verməyiniz və geniş yer ayırmağınız isə milli-mənəvi dəyərlərimizə bağlılığınız kimi, təqdirəlayiqdir və buna görə də Sizə ayrıca təşəkkür edirik.
Hörmətli Aydın müəllim, Sizi Milli mətbuatımızın 150 illik yubileyi ilə eyni vaxta təsadüf edən 65 illik yubileyiniz münasibəti ilə bir daha təbrik edir, uzun və sağlıqlı ömür, müstəqil milli mətbuatımızın inkişafı naminə fədakar və yorulmaz fəaliyyətinizdə uğurlar arzulayırıq”.
