ABŞ Zəngəzur dəhlizinə nəzarəti üzərinə götürməyi təklif edib. "Middle East Eye" xəbər verir ki, bunu ABŞ-ın Türkiyədəki səfiri Tom Barrak jurnalistlərə açıqlamasında deyib.
Səfir bildirib ki, ABŞ 32 kilometrlik Zəngəzur dəhlizinin idarəçiliyini 100 il müddətinə öz üzərinə götürməyi təklif edib.
"Bununla hər iki tərəf bu dəhlizdən istifadə edə biləcək" deyən səfir Barrakınsözlərinə görə, təklifin məqsədi Azərbaycan və Ermənistan arasında diplomatik danışıqların irəliləməsinə kömək etməkdir".
Barakın bəyanatları Tramp administrasiyasının dəhlizin neytral qarant rolunu oynayacaq özəl Amerika şirkəti vasitəsilə idarə olunmasını təklif etdiyini rəsmən təsdiqləyən ilk bəyanatdır.
Middle East Eye-a danışan regional mənbə bildirib ki, dəhlizin Azərbaycan və Ermənistan tərəfindən təsdiqlənmiş özəl şirkət tərəfindən idarə olunmasını təklif edən ilk ölkə Türkiyə olub.
Qeyd edək ki, Zəngəzur dəhlizi yalnız infrastruktur layihəsi olmaqla kifayətlənmir, həm də regional inteqrasiyanın mühüm bir hissəsidir. Bu yol yalnız nəqliyyat sistemini gücləndirmək deyil, həm də regionda iqtisadiyyatın inkişafını sürətləndirmək və strateji əlaqələri gücləndirmək üçün mühüm bir vasitə olacaq.
Əlavə edək ki, bu ilin martın 13-də Azərbaycan XİN rəhbəri Ceyhun Bayramov bildirib ki, Azərbaycan və Ermənistan arasında müzakirə olunan sülh sazişi ilə bağlı danışıqlar yekunlaşıb.
"Mətn üzrə işlər yekunlaşıb. Sonrakı mərhələdə artıq Ermənistanın Konstitusiyasında Azərbaycana qarşı ərazi iddiaları aradan qaldırılmalıdır. Əlavə olaraq, Minsk qrupu və onun qalıqlarının da ləğv olunması həyata keçirilməlidir", - C.Bayramov qeyd edib.
Xatırladaq ki, 10 iyul 2025-ci il tarixində Birləşmiş Ərəb Əmirliklərinin Əbu-Dabi şəhərində Azərbaycan Respublikasının Prezidenti İlham Əliyev və Ermənistan Respublikasının Baş naziri Nikol Paşinyan arasında görüş keçirilib və Azərbaycan-Ermənistan dövlətlərarası normallaşma gündəliyinin müxtəlif aspektləri müzakirə edilib.
İkitərəfli danışıqların normallaşma prosesi ilə bağlı bütün məsələlərin həlli üçün ən səmərəli format olduğu təsdiqlənib və bu əsasda belə nəticəyönümlü dialoqun davam etdirilməsi razılaşdırılıb.
Sərhədin delimitasiyası prosesi ilə bağlı əldə olunmuş nailiyyətləri dəyərləndirən liderlər bu istiqamətdə əməli işlərin davam etdirilməsi üçün müvafiq dövlət komissiyalarına tapşırıqlar veriblər.
Tərəflər həmçinin iki ölkə arasında ikitərəfli danışıqları və etimad quruculuğu tədbirlərini davam etdirmək barədə razılığa gəliblər.
TAHİR
