Türkiyənin Milliyyətçi Hərəkat Partiyasının (MHP) lideri Dövlət Baxçalının təşəbbüsü ilə başlayan və terrorçuların lideri Abdullah Öcalanın çağırışı ilə davam edən “Terrorsuz Türkiyə” prosesində tarixi bir addım atıldı. Mayın 12-də ləğv edildiyini elan edən PKK bu gün İraqın şimalındakı Süleymaniyyə şəhərində silahlarını yerə qoyub.
Süleymaniyyənin Surdaş bölgəsindəki mağaraya toplaşan bir qrup PKK-lı daha sonra silahları ilə çıxıb və silahların təhvil veriləcəyi əraziyə gəliblər. 15-i qadın olmaqla 30 PKK-lıdan ibarət qrup təntənəli mərasimdə sıraya düzülərək, İraq və Türkəyədən olan rəsmilərin qarşısında silahlarını böyük, alovlu qazana ataraq məhv ediblər. PKK-nın liderlərindən biri olan Base Hozat da silahlarını yerə qoyanlar arasında olub. Ərazidə qruplaşmanın rəhbərlərindən biri türkcə və kürdcə mesaj səsləndirib. Silahı yerə qoyan PKK-ya bağlı ilk qrupun “Sülh və Demokratik Cəmiyyət Qrupu” adlandırıldığı açıqlanıb.
Qruplaşmanın tərksilah prosesini izləmək üçün Türkiyə və İraqdan çox sayda jurnalist, yazar və siyasətçi bir araya gəlib. Tədbirin keçirildiyi yerdə Milli Kəşfiyyat Təşkilatının (MİT) nümayəndələri, iraqlı rəsmilər, İraq Kürd Muxtariyyətinin rəsmiləri və təhlükəsizlik qüvvələri, DEM Partiyasının üzvləri, bəzi QHT nümayəndələri və media təmsilçiləri iştirak ediblər.
Terrorçuların tərksilah edilməsi ilə PKK terror təşkilatının ləğv edilməsi və bütün silahlarının məhv edilməsini ehtiva edən 3-4 aylıq yeni və mühüm mərhələyə keçildi. Təşkilatın tamamilə silahsızlaşdırılması prosesinin sentyabr ayının sonuna qədər yekunlaşdırılması hədəflənir.
Türkiyənin hakim Ədalət və İnkişaf Partiyası (AKP) Şimali İraqda PKK terrorçularının birinci qrupunun silahlarını təhvil verməsinə münasibət bildirib. Partiyanın sözçüsü Ömer Çelik Süleymaniyədə silahlarını nümayişkaranə şəkildə məhv edən terrorçu qrupun hərəkətlərini bəyan edilmiş “Terrorsuz Türkiyə” hədəfinə gedən yolda “kritik hədd” adlandırıb və bildirib ki, PKK terrorçuları fəaliyyətlərini tamamilə dayandırmalı və silahlarını tez bir zamanda təhvil və məhv etməlidirlər.
O, terrorla mübarizədə uğurların Prezident Rəcəb Tayyib Ərdoğanın iradəsi və ölkənin aparıcı siyasi güclərindən biri olan Milliyyətçi Hərəkət Partiyasının (MHP) sədri Dövlet Bahçelinin çağırışı sayəsində əldə edildiyini vurğulayıb.
Eyni zamanda, siyasətçi “Terrorsuz Türkiyə” ideyasının həyata keçirilməsindən sonra “Terrorsuz region” məqsədinin reallaşacağına əminliyini ifadə edib.
Hakim partiyanın nümayəndəsi terrora qarşı mübarizədə canlarından keçmiş şəhidlərin xatirəsini ehtiramla yad edib, cinayətkarlıqla mübarizədə göstərdikləri qəhrəmanlığa görə qazilərə minnətdarlığını bildirib.
"PKK yaraqlılarının Süleymaniyyədə silahı yerə qoyması davam edən tərksilah prosesinin üçüncü mərhələsində mühüm mərhələdir və konkret və alqışlanan bir addımdır. Biz bu hadisəni geridönülməz dönüş nöqtəsi kimi görürük", - deyə yüksək rütbəli türk rəsmi AFP-yə bildirib.
Prezident Rəcəb Tayyib Ərdoğan isə PKK-nın tərksilah edilməsindən sonra ilk açıqlamasını sosial şəbəkədə verib.
"Terrorsuz Türkiyə hədəfimizə doğru atdığımız bugünkü mühüm addımın xeyirli olmasını ümid edirəm. Allah bizə ölkəmizin təhlükəsizliyi, millətimizin əmin-amanlığı, bölgəmizdə davamlı sülhün bərqərar olması üçün getdiyimiz bu yolda hədəflərimizə çatmağı nəsib etsin" – deyə Ərdoğan bildirib.
Bu arada İraq mediası yazır ki, yaxın günlərdə PKK terrorçularının İraqın Süleymaniyyə şəhərində tərk-silah olunmasının ikinci mərhələsi başlayacaq. İkinci mərhələdə Süleymaniyyənin dağlıq ərazilərində mövqe tutan terrorçuların daha bir hissəsinin silahlarını təhvil verəcəkləri bildirilir.
Xatırladaq ki, Türkiyənin 47 ildir mübarizə apardığı qanlı təşkilat 2025-ci il mayın 12-də özünü ləğv etdiyini və tərk-silah olunduğunu açıqlayıb. Cinayətkar təşkilatın tam tərk-silah prosesinin bu ilin sentyabr ayının sonunadək başa çatdırılması planlaşdırılır.
Qeyd edilir ki, türk xalqına qarşı törədilən qanlı cinayətlərdə birbaşa iştirak etməyən terror təşkilatının üzvləri Türkiyəyə qayıda biləcək və “reabilitasiya” prosesindən keçəcəklər. Murat Karayılan, Cəmil Bayık və Mustafa Karasunun da olduğu qanlı təşkilatın 30-40 nəfərlik bir qrupunun isə Türkiyəyə girişi qadağan ediləcək.
TAHİR
