"İşıqçı Karapetyan Çarukyandan güclü fiqurdur” - Paşinyanın qarşısına fiqur tapıb çıxara bilmirlər...
"Biznesmen Samvel Karapetyanın yaratdığı yeni qüvvə ətrafında konsolidasiya və ya əməkdaşlığı istisna etmirəm". Bunu jurnalistlərlə söhbətində müxalifətçi deputat, Ermənistan Respublikaçılar Partiyasının üzvü Tiqran Abramyan deyib. Onun sözlərinə görə, ilk növbədə, onlar ayrı-ayrı şəxslər ətrafında deyil, ideyalar ətrafında birləşirlər: "Samvel Karapetyanın şəxsiyyətini və onun müxtəlif Ermənistan Respublikaçılar Partiyasının xadimləri, o cümlədən onun lideri Serj Sarkisyanla münasibətlərini nəzərə alsaq, təbii ki, oturmaq, danışmaq, müzakirə etmək imkanı var. Amma hələlik, biz özümüzü qabaqlamamalıyıq".
Qeyd edək ki, Samvel Karapetyan istintaq təcridxanasından verdiyi son mesajında bildirmişdi ki, prinsipial olaraq yeni qüvvə ətrafında birləşməyin, vahid yumruğa çevrilməyin vaxtı çatıb. Onu da xatırladaq ki, Erməni Apostol Kilsəsini öz bildiyi metodla müdafiə edəcəyini ehtiva edən bəyanatından sonra Samvel Karapetyan hakimiyyəti zorakılıqla ələ keçirməyə çağırış ittihamı ilə həbs edilib. Saxlandığı təkadamlıq kameradan mütəmadi olaraq müxtəlif mesajlar göndərən “Tashir Group”un sahibi artıq konkret siyasi prosesə başlamaqdan da danışıb. Karapetyan yeni qüvvənin formalaşdığını və onun ətrafında müxtəlif qüvvələrin cəmlənməli olduğunu açıqlayıb. Vəkilləri vasitəsilə iş adamı cəmiyyətə aşağıdakı mesajı ünvanlayıb: “Yeni qüvvə ətrafında birləşməyin, vahid yumruq olmağın vaxtı çatıb. Mən bütün bunları necə edəcəyimi bilirəm. Və biz bunu birlikdə edəcəyik. Nikol Paşinyan və onun hökumətinin Ermənistanla heç bir əlaqəsi yoxdur və bundan sonra da onların erməni xalqının gələcəyi ilə heç bir əlaqəsi olmamalıdır”. Samvel Karapetyanın yeni yaradılmış siyasi hərəkatına kimin rəhbərlik edəcəyi hələ dəqiq bəlli olmasa da, artıq bu istiqamətdə də işlər aparılır. Bunu iş adamının qardaşı oğlu, “Ermənistan Elektrik Şəbəkələri” QSC-nin Direktorlar Şurasının sədri Narek Karapetyan da təsdiq edib. O qeyd edib ki, yaxın vaxtlarda bütün suallara cavab veriləcək: “Biz bununla bağlı açıqlamalar verəcəyik. Gələcəkdə ictimaiyyəti maraqlandıran bütün sualların cavabı olacaq”. Məsələ ilə bağlı Ermənistanın “Hraparak” qəzeti də yazıb ki, Karapetyan komandasının tərkibində siyasi qüvvənin formalaşdırılması üzrə başlanılan işlər fonunda media orqanın açılması da nəzərdə tutulur. Bununla komanda öz təbliğatını qurmağa da xüsusi diqqət etdiyini nümayiş etdirib. Erməni siyasi şərhçi Akop Badalyan diqqəti ona yönəldir ki, Samvel Karapetyan siyasi baxımdan deyil, resurslar baxımından kifayət qədər güclü fiqurdur. O xatırladır ki, Ermənistanda böyük resurs sahibi birinin siyasi səhnəyə atıılması birinci dəfə deyil. Müəyyən bir dövrdə iş adamı Haqik Çarukyan bunun nümunəsini yaradıb. Amma Samvel Karapetyan, analitikin fikrincə, Çarukyandan daha böyük fiqurdur və ona görə də proseslər fərqli, rusiyalı iş adamı Paşinyan hakimiyyəti üçün riskli ola bilər: “Biz bilirik ki, ictimaiyyətin təxminən 60-70 faizi siyasətdən uzaqlaşır, heç bir siyasi qüvvəyə etibar etmədiyini deyir, bunu sorğular da sübut edir. İndi sual yarana bilər: Samvel Karapetyan həmin şəxslərdən səs qazanmağa iddialı ola bilərmi? Belə olan halda mənzərə dəyişəcək, çünki Robert Köçəryan və Serj Sarkisyan öz səslərini qazanacaqlar, Samvel Karapetyana isə yeni səslər əldə edə bilər. Bu, həqiqətən də hökumət üçün risqdir”.
İndilikdə hökumət bu risqi azaltmaq üçün hərəkətə keçib. Əvvəla müxaliflər sıradan çıxarılır. Ermənistan parlamenti “Hayastan” fraksiyasının rəhbəri Seyran Ohanyanı deputat toxunulmazlığından məhrum edib. Onun deputat toxunulmazlığından məhrum edilməsi ilə bağlı vəsatəti qanunverici orqana baş prokuror Anna Vardapetyan təqdim edib. “Hayastan” fraksiyasının katibi keçmiş müdafiə naziri Seyran Ohanyanın işi üzrə ittiham olunur. O cümlədən o, qanunsuz əmlakı - Draxtik kəndində, Sevan Milli Parkının ərazisində yerləşən malikanəni leqallaşdırmaqda ittiham olunur. İstintaqın məlumatına görə, malikanə Ohanyana məxsusdur. İndi Ohanyanın həbsi gözlənilir. Ermənistan parlamentinin müxalif “Hayastan” fraksiyasından olan deputatı, prokurorluq tərəfindən konstitusiya quruluşunu devirmək üçün terror aktları hazırlamaqda ittiham olunan Artur Sarkisyan məhkəmənin qərarı ilə həbs edilib. Samvel Karapetyanın Ermənistan daxilində əsas qüvvəsi “Ermənistan Elektrik Şəbəkələri” QSC-dir. Elə iş adamının müdafiəsi məqsədilə keçirilən aksiyalarda əsas iştirakçılar bu şirkətin işçiləridir. Bunu “Ermənistan Elektrik Şəbəkələri”ndə bir neçə saat axtarış aparan və digər istintaq hərəkətləri həyata keçirən hüquq-mühafizə orqanları da təsdiq edir. Proses çərçivəsində müəyyən olunub ki, “Ermənistan Elektrik Şəbəkələri”ndə Samvel Karapetyanın müdafiəsi üçün insanlar zorla yürüşlərə, etiraz aksiyalarına çıxarılır. Bundan başqa, onlar qeyd edilən məqsədlə pulla da həvəsləndirilir. Hakimiyyət indi bu qurumu da nəzarətə götürür. Samvel Karapetyanın tərəfdarları bəyan edir ki, “Ermənistan Elektrik Şəbəkələri”ndə aparılan axtarışlar siyasi xarakter daşıyır. Dövlət Nəzarəti Xidmətinin rəhbəri Romanos Petrosyanın isə “Ermənistan Elektrik Şəbəkələri” QSC-nin dövlət mülkiyyətinə keçməsindən sonra onun rəhbəri təyin olunması gözlənilir. “Armlur” nəşrinin məlumatına görə, baş nazir Nikol Paşinyan müvafiq təşəbbüslə çıxış edib və qeyd edib ki, bu vəzifə üçün 6800-ə yaxın əməkdaşın işinə effektiv nəzarət edə bilən “etibarlı insan” lazımdır. Nikol Paşinyan iqtidarına qarşı müxalifətdə olan kilsəyə qarşı da hakimiyyətin müxtəlif təsir, təzyiq metodlarından istifadə edir. Bu fonda keşişlərin bir-bir həbsə atılması diqqətdən yayınmır. Belə vəziyyətdə Samvel Karapetyanın yeni siyasi hərəkatının da Ermənistanda nəyisə dəyişəcəyi inandırıcı görünmür.
Nahid SALAYEV
