Makron səfirliyimizə basqın etmiş quldurun cəzasını ağırlaşdırdı - Bakıya jest?..
Rauf Zeyni: “Rəsmi Paris bununla müəyyən mənada özünü əfv etdirmək, cinayətkarları cəzalandırdığını göstərmək istəyir”
Paris Apellyasiya Məhkəməsinin 8 iyul tarixli qərarı ilə radikal erməni millətçiləri tərəfindən Azərbaycanın Fransadakı səfirliyinin binasına edilmiş hücumla bağlı birinci məhkəmə instansiyasının müəyyən etdiyi cəza daha da ağırlaşdırılıb.
Azərbaycanın Fransadakı səfirliyinin məlumatına görə, 2022-ci il sentyabrın 18-də radikal erməni qrupları Parisdə Azərbaycan səfirliyinə hücum etmiş və nəticədə diplomatik nümayəndəliyin binasına zərər yetirmişdilər. Baş vermiş hücum aktı ilə əlaqədar dəlillər yerli məhkəməyə təqdim edilmiş və hücumun əsas təşkilatçısı və iştirakçılarının cəzalandırılması tələb olunmuşdu.
Paris Məhkəməsinin 2023-cü il iyunun 23-də keçirilmiş iclasının qərarı ilə hücumun əsas təşkilatçısı “Charjoum” erməni hərəkatının üzvü Loris Tufanyana 6 aylıq şərti cəza və cərimə müəyyən edilmişdi.
Qarşı tərəf birinci instansiya məhkəməsinin qərarı ilə razılaşmayaraq, Apellyasiya Məhkəməsinə müraciət edib. 2025-ci il iyunun 10-da Apellyasiya Məhkəməsinin iclası keçirilib.
Apellyasiya məhkəməsinin iyulun 8-də elan etdiyi qərarla birinci instansiya məhkəməsi tərəfindən qərara alınmış 6 aylıq şərti cəzanın müddəti 2 dəfə artırılaraq 12 ay müəyyən edilib. Həmçinin L.Tufanyana 5 il müddətinə silah saxlamaq və gəzdirmək qadağan edilib və cərimə məbləği artırılıb.
Paris Apellyasiya Məhkəməsinin bu qərarı gələcəkdə bu kimi halların qarşısının alınması baxımından mühüm addım kimi qiymətləndirilir.
Rəsmi Paris bununla Azərbaycana barışıq jesti edir?
Müstəqil ekspert Rauf Zeyni “Bakı-Xəbər”ə bildirdi ki, çox ehtimal, Fransanın bu addımı regionda və dünyada gedən proseslərdən irəli gəlir: “Fransa Azərbaycan səfirliyinə hücum etmiş radikal, millətçi ermənilərin cəzalarını bir az da sərtləşdirməklə, görünür ki, Azərbaycanın könlünü almaq istəyir. Rəsmi Paris bununla müəyyən mənada özünü əfv etdirmək, cinayətkarları cəzalandırdığını göstərmək istəyir. Bu daha doğru yanaşmadır, çünki Fransa-Azərbaycan münasibətlərinin gərginləşməsində Azərbaycanın heç bir günahı yoxdur.
Hansısa formada Fransa birtərəfli addımlar atmasaydı, Ermənistana və ermənipərəst qüvvələrə, o cümlədən antiazərbaycan kəsimlərə dəstək verməsəydi, bizim Fransa ilə münasibətlərimiz bu səviyyəyə gəlib çatmayacaqdı. Ona görə də Fransa müəyyən addımlar atmalıdır ki, Azərbaycan onun bu addımlarını gələcək münasibətlərdə nəzərə alsın”.
R.Zeyninin fikrincə, bütün məsələlərdə bəşəri ədalət prinsipi əsas götürülməlidir, obyektivlik, ədalətlilik beynəlxalq münasibətlər və beynəlxalq hüquq müstəvisində bərqərar olmalıdır.
R.Zeyni qeyd etdi ki, bütün bunlara əhəmiyyət vermədən bizə qarşı təhdid, təhrik, ədalətsiz hücumlar dilində danışmaq, əlbəttə, adekvat cavabını alacaq. Rəsmi Parisin son addımlarına gəlincə, R.Zeyni hesab edir ki, bu, münasibətləri yumşaltmağa yönələn jest ola bilər.
İradə SARIYEVA
