Azərbaycan qaz təchizatının coğrafiyasına görə çox ölkələri üstələdi...
Firdovsi Şahbazov: “Yeni reallıqlar çərçivəsində ölkəmizin geosiyasi rolu artır”
Prezident İlham Əliyev Mingəçevirdəki “8 Noyabr” Elektrik Stansiyasının açılış mərasimindəki çıxışında bəyan edib ki, Azərbaycanın geosiyasi önəmi daha da artacaq:
“Bu gün Azərbaycan Avropanın enerji təhlükəsizliyini təmin edən ölkələr sırasındadır və təsadüfi deyil ki, Avropa İttifaqı tamamilə haqlı olaraq Azərbaycanı etibarlı tərəfdaş və Pan-Avropa qaz təchizatçısı adlandırır. Çünki bu gün Azərbaycan qazı 12 ölkəyə qaz kəmərləri vasitəsilə ixrac edilir. Onlardan 10-u Avropa ölkəsidir və məhz bu göstəriciyə görə, qaz təchizatımızın coğrafi əhatəsinə görə Azərbaycan bu gün dünya miqyasında qabaqcıl yerlərdədir. Əlbəttə ki, bir çox ölkələr Azərbaycan qazından istifadə edib öz enerji təhlükəsizliyini təmin edir. Biz həm təbii qaz, həm xam neft, neft və neft-kimya məhsulları, müəyyən həcmdə elektrik enerjisini ixrac edirik. Ancaq qeyd etdiyim layihələr istismara veriləndən sonra biz müxtəlif elektrik kabelləri vasitəsilə yaşıl enerjini də ixrac edəcəyik. Beləliklə, ölkəmizin iqtisadi gücü, geosiyasi önəmi daha da artacaq, - halbuki bu gün də kifayət qədər yüksək səviyyədədir”.
“Ölkəmiz Şərqlə-Qərb arasında vacib nəqliyyat habına çevrilməkdədir”
Sözügedən məsələni “Bakı-Xəbər”ə şərh edən iqtisad üzrə fəlsəfə doktoru Firdovsi Şahbazov hesab edir ki, uğurlu enerji siyasəti sayəsində Azərbaycan Avropanın etibarlı enerji tərəfdaşına çevrilib: “Azərbaycanın qaz bazarı genişlənir və getdikcə daha çox ölkəyə qaz ixrac edir. Digər Avropa ölkələri də Azərbaycan qazına maraq göstərir. Azərbaycanın yerləşdiyi regionu nəzərə alsaq, belə bir göstəricinin əldə edilməsi ciddi uğurdur. Çünki ölkəmizin cənubunda İran, şimalında Rusiya kimi çətin dövlətlər yerləşir. Hər iki dövlət uzun illərdir Qərblə geosiyasi rəqabətdədir. Belə bir şəraitdə ölkənin enerji resurslarını dayanıqlı şəkildə Avropa bazarına çıxarmaq, bununla bağlı infrastruktur qurmaq böyük uğurdur. O cümlədən, artan yükdaşımalarda Azərbaycanın vacib logistik mərkəzə çevrilməsi yeni reallıqlar formalaşdırır. O baxımdan, yeni reallıqlar çərçivəsində ölkəmizin geosiyasi rolu artır. Çünki Azərbaycan təkcə neft-qaz ölkəsi deyil. Ölkəmiz Şərqlə-Qərb arasında vacib nəqliyyat habına çevrilməkdədir. Eyni zamanda, yaxın perspektivdə Azərbaycandan Avropa bazarına “yaşıl enerji” ixracına start veriləcək. Nəzərə alsaq ki, Avropa bazarında enerjiyə tələbat getdikcə artmaqdadır, bu baxımdan Azərbaycanın enerji resurslarına maraq daha da artacaq. Bütün bunlar həm də Azərbaycanın etibarlı təhlükəsizliyi baxımınndan əhəmiyyət kəsb edir”.
Vidadi ORDAHALLI
