Hüseyn İbrahimov: “Fransa Azərbaycanla bağlı səhv siyasətini düzəldir”
Bu mənim Şuşaya ilk səfərimdir və bu şəhəri kəşf etmək imkanı qazandığım üçün çox şadam. Əvvəllər də dediyim kimi, bu şəhərin Azərbaycan xalqının qəlbində çox əziz bir yeri var, çünki o, Azərbaycan mədəniyyətində çox mühüm rol oynayır”.
Bunu Fransanın Azərbaycandakı səfiri Ann Buayon deyib.
“Biz Azərbaycanın mədəniyyətini formalaşdıran görkəmli bəstəkarlar və şairlərə həsr olunmuş bir neçə muzeyi ziyarət etdik. Tikinti işlərindən və bu mühüm mədəniyyət ocaqlarının, Azərbaycan mədəniyyətinin simvollarının yenidən canlandırılaraq ziyarətçilərin üzünə açılmasından çox təsirləndim. Bəli, insanlara Şuşaya səfər etməyi tövsiyə edirəm, çünki düşünürəm ki, bu, Azərbaycanı daha yaxından tanımaq üçün yaxşı bir yoldur”, - səfir əlavə edib.
Bundan əvvəl Albaniyada Avropa Siyasi Birliyinin sammitində Fransa prezidenti Emmanuel Makron Azərbaycan lideri İlham Əliyevlə ayaqüstü isti görüşüb və bu, medianın diqqətini cəlb edib. Fransanın səfiri ilk dəfə Qarabağa, Şuşaya gedir. Bütün bunlar o qənaətə əsas verirmi ki, Fransa Azərbaycanla bağlı səhv siyasətinə yenidən baxır?
“Paris artıq Bakıya qarşı münasibətləri yumşaltmaq və iki ölkə arasında əlaqələri inkişaf etdirmək istəyir”
Sözügedən məsələyə aydınlıq gətirən İdarəçilik Akademiyasının müəllimi, sosioloq Hüseyn İbrahimov bunu istisna etmədi: “Əvvəla, münasibətlər hər zaman gərgin qala bilməzdi. Makron nə qədər ermənipərəst olsa da, Fransanın öz maraqları var və əvvəl-axır onları nəzərə almalı idi. Daha dəqiq desək, Fransa buna məhkumdur. Ona görə də Fransa Cənubi Qafqaz siyasətinə yenidən baxır və Azərbaycan amilini nəzərə alır. Çünki Azərbaycansız Fransanın Cənubi Qafqaz siyasəti “axsaq ördəyə” bənzəyirdi. Səfir Buayonun Şuşaya səfəri suverenliyimizə hörmətin ifadəsi idi. Çünki Vətən müharibəsi ilə əlaqədar Fransa Azərbaycana qarşı qərzli mövqe tutmuşdu. O vaxtdan Fransanın Azərbaycandakı səfiri Qarabağa səfər etməməklə suverenliyimizi şübhə altına qoymaq istəyirdi. Fransa səfiri Şuşaya səfər etməklə bu steriotipi dağıtdı. Bu da təsadüfi deyil. Yəqin ki, Parisdən təlimat gələndən sonra səfir bu addımı atıb. Belə görünür ki, Paris artıq Bakıya qarşı münasibətləri yumşaltmaq və iki ölkə arasında əlaqələri inkişaf etdirmək istəyir. Çünki 4 il əvvəlki siyasəti aparmaq yersizdir. Dünyada və regionda reallıqlar dəyişib. Azərbaycanla Ermənistan arasında sülh sazişinin bəndləri demək olar tam razılaşdırılıb. Ermənistan Baş naziri Nikol Paşinyan Türkiyəyə səfər edib. Tərəflər münasibətləri qurmağa çox yaxındılar. Belə bir vəziyyətdə Fransanın sərt mövqedən çıxış etməsi yalnız bu ölkəyə zərər vura bilər. Üstəlik, Fransanın Orta Asiyada böyük iqtisadi maraqları var. Bu region ilə də tranzit baxımından əlaqələr indiki dövrdə Azərbaycandan keçir. O baxımdan Fransa Azərbaycanla bağlı səhv siyasətini düzəldir”.
Vidadi ORDAHALLI
