Xaqani Cəfərli: "Çox böyük ehtimalla, rejim dəyişikliyinə qədər proses inkişaf edəcək"
Məlum olduğu kimi, bazar ertəsi İran ABŞ-ın İran ərazisini bombalamasına cavab olaraq Amerikanın Yaxın Şərədəki hərbi bazalarına hava hücumları həyata keçirib.
Qətərdə Amerikanın Əl-Udeyd bazasına endirilən zərbədən sonra Tehran, Məşhəd və Qum şəhərlərinin küçələrində rejim tərəfdarları dəstək aksiyaları keçiriblər.
SEPAH "Telegram" kanalında İranın vurduğu İsrailə məxsus F35 qırıcılarının görüntüsünü yaydı.
ABŞ isə bildirib ki, Qətərdəki Əl-Udeyd hərbi bazasına endirilən raket zərbələrinin hamısı "Patriot" HHM sistemi tərəfindən zərərsizləşdirilib.
Bu arada İranin xarici işlər naziri Abbas Əraqçı Moskvaya səfər edib. Qətərin bombalanmasının Əraqçının Moskva səfərinin ardınca baş verməsi təsadüfdürmü?
Məsələyə münasibət bildirən politoloq Xaqani Cəfərli baki-xeber com-a açıqlamasında bildirdi ki, Amerikanın İrandakı nüvə obyektlərinə endirdiyi zərbələrə cavab olaraq İranın ABŞ-ın Yaxın Şərqdəki hərbi bazalarını hədəf alması gözlənilən idi: "Çünki bunu Tehran rəsmiləri dəfələrlə bəyan etmişdi ki, əgər ABŞ İrana zərbə endirərsə, İran cavab verəcək. Tehran rejimi cavab verməsə sifətini tamamilə itirməklə üzləşəcəkdi. Buna görə də bu addımı atdı - Amerikanın Qətərdəki hərbi bazasını bombaladı. ABŞ-ın bazalarının hədəfə alınması İranın Xarici işlər naziri Abbas Əraqçının Moskva səfəri ərəfəsinə təsadüf etməsi məqsədli ola bilər. İstisna deyil ki, Tehran bununla Moskvaya ABŞ-ı vurmaqdan çəkinməyəcəyik mesajını vermək istəyib. Bu, Əraqçının Moskvadakı danışıqları üçün münbit şərait yaratmağa xidmət edə bilər. Ancaq bütün bunlar çox gec atılan addımlardır və prosesi dəyişə bilməz".
Ekspert hadisələrin inkişaf perepektivləri barədə onu da əlavə etdi ki, İran bundan artıq heç nə edə bilməz, ancaq ABŞ-ın sərt cavab vermək imkanı var: "Belə ki, əgər İranın zərbəsi ağır xəsarətlər doğursa, bu cavabsız qalmayacaq. Çox böyük ehtimalla, rejim dəyişikliyinə qədər proses inkişaf edəcək. Bütövlükdə İran çox böyük strateji əhəmiyyətə malik bir ölkədir. Ona görə də İranın gələcəyi ilə bağlı məsələlər öncə dəqiqləşəcək, bundan sonra addımlar atılacaq".
Akif NƏSİRLİ
