“Müqəddəs mübarizə” hərəkatının lideri, arxiyepiskop Baqrat Qalstanyan küçə mübarizəsinin bərpa olunduğunu elan edib: “Artıq 3-4 aydır ki, biz Ermənistanın hər yerində təşkilati iş aparırıq. Biz insanları küçə döyüşlərinə, vətəndaş itaətsizliyinə hazırlamaq üçün çox böyük iş görmüşük və mən buna son qoyacağımıza artıq əminəm.
Aydınlaşdırılması lazım olan bəzi xırda hallar var. Başqa heç bir maneə yoxdur. Ona görə də mən həm sözlərimdə, həm də hərəkətlərimdə çox diqqətliyəm”.
Baqrat Qalstanyan ictimai etiraz formatını dəyişməyi planlaşdırdıqlarını bildirib. O, 2026-cı il seçkilərinin çox əhəmiyyətli olduğunu bildirib: “Mən artıq bəyan etmişəm ki, canlı yayım formatında xalqla görüşləri dayandırıram. Onlar başqa yerlərdə və fərqli formatda keçiriləcək”.
Qeyd edək ki, Qalstanyan 2024-cü ilin aprelində Ermənistanın Azərbaycanla sərhədinin delimitasiyası və demarkasiyasına qarşı etiraz aksiyalarında fəal iştirakından sonra geniş tanınıb və bu, əvvəllər Ermənistan silahlı qüvvələrinin işğalı altında olan dörd kəndin Azərbaycan nəzarətinə keçməsindən sonra baş verib. Bu kəndlər Qalstanyanın Erməni Apostol Kilsəsinin Tavuş yeparxiyasının rəhbəri vəzifəsində çalışdığı Tavuş vilayətində yerləşir. Tavuş rayonunun kəndlərində yerli etirazlardan yaranan hərəkata məhz o rəhbərlik edirdi. Hərəkat "Vətən naminə Tavuş" adını aldı və dərhal lideri ilə birlikdə iqtidaryönlü medianın diqqət mərkəzində oldu. Media Qalstanyan biznes fəaliyyətinə nəzər saldı, onun Rusiya ilə, Ermənistanın əvvəlki hakim elitaları ilə pərdəarxası əlaqələrini üzə çıxardı. Sübut kimi Ermənistanın keçmiş hakimiyyət nümayəndələrinin müxalifət hərəkatının aksiyalarında fəal iştirakı göstərildi. Burada daha bir həssas məqam Qalstanyanın vətəndaşlığı məsələsidir, çünki onun Ermənistan pasportu ilə yanaşı, Kanada pasportu da var. Ermənistan Konstitusiyasına görə, deputat və ya baş nazir postuna namizəd son dörd ildə müstəsna olaraq Ermənistan vətəndaşı olmalı və bu ölkədə yaşamalıdır. Kifayət qədər qısa müddətdə Baqrat Qalstanyan Nikol Paşinyanın tərəfdarından onun qızğın rəqibinə çevrildi. Bir vaxtlar Qalstanyan hətta İrəvana yürüş edəndə Paşinyanı dəstəkləyib, həmçinin Nikol Paşinyanın həyat yoldaşı Anna Akopyan başçılıq etdiyi fondun qəyyumlar şurasına daxil olub. Ancaq arxiyepiskopun ətrafındakılar bunu xatırlamamağa çalışırlar. İndi Qalstanyan bəyan edir ki, hökumətə qarşı “mübarizə metodları” dəyişdiriləcək, çünki onlar qarşı tərəfin sərt hərəkətlərindən nəticə çıxarıblar. Keşişin sözlərinə görə, küçə mübarizəsinin strategiyası dəyişəcək. Qalstanyan yeni simaların da bu hərəkata qoşulacağını istisna etməyib: “Artıq bir neçə aydır ki, insanları küçə mübarizəsinə hazırlayırıq. 3-4 aydır ki, biz Ermənistanın bütün ərazisində təşkilati işlər aparırıq. Biz insanları küçə mübarizəsinə, vətəndaş itaətsizliyinə hazırlamaq üçün çox böyük iş görmüşük və əminəm ki, biz buna son qoyacağıq. Bir neçə hal var. Onlardan sonra elan olunacaq”.
Bu arada radikal müxalifət də Qalstanyana dəstək verməyə hazır olduğunu bəyan edib. Ermənistanın keçmiş baş naziri Vazgen Manukyan bunun mənasız olduğunu bildirib: “Əgər müxalifət meydanında iqtidara qarşı vahid cəbhə formalaşmazsa, seçkilər və baş nazirə etimadsızlıq məsələsi yenə dalana dirənəcək. 2021-ci ildə seçkilərin elan edilməsi hakimiyyət üçün yeganə xilas oldu və əgər müxalifət seçkilərin əleyhinə olduğunu bəyan edib, mübarizəni davam etdirməyə hazır olduğunu bildirsəydi, bu gün vəziyyət başqa cür olardı. İstənilən halda, bu seçkilər iqtidar üçün ölüm-dirim məsələsi olacaq, çünki onların itirəcəkləri heç bir şey yoxdur, eyni zamanda, bütün xalqın ətrafında birləşəcək bir namizəd də görmürəm. Bölgədə müharibə başlasa, xarici oyunçular bura əsgər göndərməyəcəklər. Deyəcəklər: “Onların özlərinin döyüşmədiyi dəyərlər üçün biz niyə mübarizə aparmalıyıq?”. Onun sözlərinə görə, digər yol belədir: əgər dünya erməni xalqında aydın proqramı olan qətiyyəti görsə, o zaman Ermənistana ciddi maraq göstərəcək: “Bu, bizə güc mərkəzləri ilə – ABŞ, Çin, Aİ, ABŞ, Çin ilə əlaqələr yaratmağa imkan verəcək. Bizim Türkiyə ilə də əlaqələrimiz olmalıdır. Bu yolu seçən o xalqlar min illərdir Yer kürəsində yaşayırlar. Lakin, ilk növbədə, bizi dağıdıcı yola aparan hakimiyyəti dəyişmək lazımdır. Bu, dünyaya yenidən oyuna qayıtdığımızı göstərəcək”. Müxalif deputat Tiqran Abramyan isə məsələyə bel münasibət bildirib: “2026-cı il seçki proseslərinə hazırlıq fonunda sual yenidən aktuallaşıb: hakimiyyət dəyişikliyi, yoxsa parlamentdə mandat uğrunda mübarizə? Ümumiyyətlə, hansı ideyalar və məqsədlər uğrunda mübarizə aparılır - küçələrdə, yoxsa parlamentdə? Bəs onların hər biri öz mövqeləri ilə hansı problemi həll edir? Hətta indiki hakimiyyətə qarşı çıxanlar arasında "günəşdə yerlərini" tutmağa çalışan qüvvələr var. Üstəlik, mübarizə çox vaxt indiki idarəçiyə qarşı deyil, digər siyasi qüvvələrə və ya sahənin aktorlarına qarşı yönəlir, bəziləri üçün mübarizə ölkədə real dəyişikliklərə aparan yol deyil, müxtəlif geosiyasi mərkəzlərin müştərisinə çevrilmək və onlara xidmət göstərmək yoludur”. Erməni mediası yazır ki, bu şəraitdə Nikol Paşinyan hələ uzun müddət hakimiyyətdə qala biləcək.
Samirə SƏFƏROVA
