Sahil Kərimli: “Paşinyanın da fikri, rəyi öyrənilə bilər ki, Harutyunyanın bu fikirləri nə dərəcədə ciddidir, yaxud o nə qədər düz danışır”
Azərbaycana qarşı müxtəlif cinayətlər törətməkdə ittiham olunan erməni əsilli şəxslərin Bakı məhkəməsində bir sıra yeni faktlar üzə çıxır ki, bunlar da ortaya yeni məsələlər çıxarır, yeni suallar doğurur. Xüsusən də Ermənistanın keçmiş və indiki rəhbərliyinin Azərbaycan ərazilərində həyata keçirdikləri cinayət, terror hərəkətləri ilə əlaqədar ittiham olunan şəxslərin və şahidlərin ifadələrindən çox gizlinlərin üzə çıxdığını görürük.
Bakı Hərbi Məhkəməsində davam etdirilən məhkəmə prosesində Arayik Harutyunyanın yer aldığı videomaterial nümayiş etdirilib və o, dövlət ittihamçılarının suallarını cavablandırıb.
Məhkəmə prosesində nümayiş olunan fotoşəkillərin bəzilərində Arayik Harutyunyan özünü tanıyıb. Şəkillərin əksəriyyətində o, hərbi formada görünür.
Baş Prokurorun xüsusi tapşırıqlar üzrə köməkçisi Tuqay Rəhimli təqsirləndirilən şəxsə BMT-nin qətnamələrinin niyə icra olunmaması barədə suallar verib.
O, suallara cavabında deyib: “Bu barədə qərar var idi. Amma niyə yerinə yetirilməməsini bilmirəm. Mən Levon Ter-Petrosyanla da görüşmüşdüm. Başa düşdüm ki, yekdillik olmayıb”.
Dövlət ittihamçısı Vüsal Abdullayevin suallarını cavablandıran təqsirləndirilən şəxs 2018-2019-cu illərdə Ermənistanla keçmiş qondarma qurum arasında keçirilən iki iclasın birində iştirak etdiyini bildirib və deyib: “2020-ci ilin may ayında “prezident” vəzifəsini qəbul etdim. İyun ayında Ermənistanın baş naziri Nikol Paşinyandan xahiş etmişəm ki, iclas çağırsın. İstəyirdim, Azərbaycanla danışıqlar olsun, yekun razılığa gəlinsin. Həmin söhbətin içində BMT-nin dörd qətnaməsi də var idi”.
Bu məhkəmə ifadələri əsasında rəsmi olaraq Azərbaycandan Paşinyana müraciət oluna bilərmi ki, Paşinyan o zaman qondarma rejimin belə təkliflərinə niyə laqeyd qalıb, yaxud nə cavab verib? Bu kimi müraciətlərə hər hansı bir cavab verilibmi?
Məsələn, Qərbi Azərbaycan İcması xətti ilə də bu müraciəti etmək olarmı ki, Paşinyan bir izah versin, görək belə şey doğrudanmı olub? Bununla əlaqədar Paşinyana Azərbaycandan həm dövlət, həm də ictimai təşkilatlar səviyyəsində hansısa bir addım atmaq, müraciət etmək mümkündürmü?
“Bütün hallarda Harutyunyanın dedikləri ilə bağlı Paşinyana müraciət edilməli, sorğu göndərilməli, ondan cavab tələb olunmalıdır”
Siyasi ekspert Sahil Kərimli “Bakı-Xəbər”ə bildirdi ki, istər vaxtilə Qarabağda separatçıların fəaliyyət göstərməsi, istərsə də Vətən müharibəsində, ondan əvvəlki və sonrakı dövrlərdə Azərbaycanın suverenliyinə, ərazi bütövlüyünə qarşı atılan istənilən addım Azərbaycan qanunları ilə ciddi şəkildə cəzalandırılır, bundan sonra da cəzalandırılacaq. “Burda həmin dövrdə Ermənistanın baş naziri olan Nikol Paşinyan, eyni zamanda Araik Harutyunyan və qondarma, separatçı rejimin digər cinayətkar üzvləri öz cəzalarını alacaqlar. Bu gün Arayik Harutyunyan məhkəmə prosesində müxtəlif ziddiyyətli bəyanatlar səsləndirir, çıxışlar edir. Eyni zamanda da biz onun məsuliyyətdən yayınmaq, paralel olaraq öz məsuliyyətini digər şəxslərin üzərinə atmaq cəhdlərinin şahidi oluruq. Bu gün Arayik Harutyunyan bildirir ki, guya o, müharibə zamanı hərbi əməliyyatların dərhal dayandırılması və Azərbaycanla danışıqlara başlanılması məsələsini Ermənistanın baş nazirinə bildirib, amma Nikol Paşinyan buna əhəmiyyət verməyib. Harutyunyan bu cür bəyanatlar verməklə, təbiidir ki, məsuliyyətdən yayınmağa çalışır. Amma o bir məsələni unudur, yaxud da yaxşı bilir və məsuliyyətdən yayınmaq istəyir ki, 44 günlük Vətən müharibəsi dövründə törətdiyi cinayət əməllərinin cəzasından yaxa qurtarsın”.
S.Kərimli bildirdi ki, Azərbaycanın müharibə bölgəsindən uzaq ərazilərinin, dinc mülki əhalisinin bombardman edilməsi, ağır artilleriya ilə atəşə tutulması müharibə cinayətidir və burda Arayik Harutyunyan, onun qondarma rejiminin üzvləri məsuliyyət daşıyır. “Həmin dövrdə Ermənistanın baş naziri kimi Nikol Paşinyan da məsuliyyət daşıyır. Çünki Azərbaycan torpaqları Ermənistanın işağlı altında olanda da o baş nazir olub.
Təbii ki, ehtiyac olarsa, Harutyunyanın ittihamları, bəyanatları ilə bağlı Nikol Paşinyana məhkəmə tərəfindən sorğu göndərilə bilər. Bununla əlaqədar Paşinyanın da fikri, rəyi öyrənilə bilər ki, Harutyunyanın bu fikirləri nə dərəcədə ciddidir, yaxud o nə qədər düz danışır. Bütün hallarda Harutyunyanın dedikləri ilə bağlı Paşinyana müraciət edilməli, sorğu göndərilməli, ondan cavab tələb olunmalıdır”-deyə S.Kərimli qeyd etdi.
İradə SARIYEVA
