Azər Həsrət: "Həqiqətən də Güney Qafqazda Ermənistanın hər hansı bir ciddi yeri və rolu yoxdur"
İranın müdafiə naziri, briqada generalı Əziz Nəsirzadənin başçılıq etdiyi nümayəndə heyəti Ermənistanın müdafiə naziri Suren Papikyanın dəvəti ilə mayın 20-də iki günlüyə Ermənistanda rəsmi səfərdə olub.
Əziz Nəsirzadə Cənubi Qafqazın əhəmiyyətindən danışaraq deyib: "Bu region həm geosiyasi, həm də geostrateji baxımdan bizim üçün böyük əhəmiyyət kəsb edir. Xüsusi tarixi və tranzit mövqeyə malik ölkə kimi Ermənistan da bu regionda mühüm rol oynayır. Biz əvvəllər geosiyasi və tarixi sərhədlərin hər hansı dəyişikliyinin əleyhinə olduğumuzu bəyan etmişik və bu məsələni Ermənistan tərəfi qarşısında qaldırmışıq".
Cənubi Qafqazda Ermənistan hansı mühüm əhəmiyyətə malikdir? Hansı müsbət rolu var? Regionda İranın maraqlarına xidmətdən başqa Ermənistan hansı rol oynayır?
Baki-xeber.com saytına məsələ barədə açıqlama verən siyasi şərhçi Azər Həsrət bildirdi ki, İran hökumətini idarə edənlər arasında fikir ayrılığı olduğu hər dəfə daha çılpaqlığı ilə özünü göstərməkdədir: "Belə anlaşılır ki, bir tərəfdə prezident Pezeşkiyan Azərbaycanla münasibətləri yoluna qoymağa çalışır, əlindən gələni edir ki, əvvəlki illərdə olan narazılıqlar aradan qaldırılsın, nəhayət, bu iki dövlət bir-birinə yaxınlaşsın. Bununla bərabər, İranın molla rejiminə bağlı olan qüvvələr Ermənistandan dördəlli yapışıb, əl çəkmir. Bu azmış kimi, Ermənistanla münasibətdə Azerbaycanı bu və ya digər şəkildə narazı salacaq açıqlamalar verirlər.
Fikrimizcə, bu səfər və orada səsləndirilən fikirlər də o qəbildəndir.
Həqiqətən də Güney Qafqazda Ermənistanın hər hansı bir ciddi yeri və rolu yoxdur. Əgər söhbət hansısa nəqliyyat dəhlizlərindən, hansısa strateji tərəfdaşlıqdan, hətta beynəlxalq platformalarda iş birliyindən gedirsə, Güney Qafqazın bir nömrəli olkəsi Azərbaycandır. Ermənistan, hətta otuz nömrəli ölkə də deyil. Baxmayaraq ki, bu bölgədə cəmi üç dövlət var, Ermənistanın belə bir dövlət olduğunu bildikləri halda ona süni şəkildə çəki qazandırmaq cəhdləri fars-molla rejiminin anti-Azərbaycan ritorikasından qaynaqlanır. İranda bəlli kəsim Azərbaycanla münasibətlərin normallaşmasında maraqlı deyil. Ona görə də, lazım oldu-olmadı, Ermənistana səfərlər edir, açıqlamalar verir, hətta dəxli olmadan belə sərt ifadələr işlədərək Azərbaycanı qıcıqlandırmaq istəyirlər. Etirazımız yoxdur, indiyə kimi belə hərəkətlərdən kim zərər görübsə, bundan sonra da elə o tərəf zərər görən olacaq. Azərbaycan müstəqillik dönəmində İranla yetərincə isti münasibətlər qurmağa cəhd edib, amma İran içimizə soxularaq, hətta buradakı dünyəvi dövlət quruluşunu devirib, yerində məzhəb dövləti qurmaq istəyib. Azərbaycan isə onun qarşısını lazımi səviyyədə - sərt şəkildə almağı bacardı. İranın Azərbaycana qarşı işləyən hakimiyyət qrupu bundan dərs çıxarmalıdır. Ona görə də İran rəsmiləri Ermənistanla deyil, Azərbaycanla hesablaşmalıdırlar. Hesablaşmayacaqları təqdirdə, əlbəttə, Azərbaycan da uyğun cavabı verəcək".
Dəniz NƏSİRLİ
