Beynəlxaq təşkilat Ermənistanı konstitusiya dəyişikliyinə çağırdı
Hər bir dövlətin beynəlxalq arenada vətəndaş cəmiyyəti səviyyəsində təmsil edilməsinə ciddi ehtiyacı var. Azərbaycanın isə buna daha çox ehtiyacı var. Çunki bir tərəfdən mənfur qonşularımız bizi konfliktə cəlb edib, digər tərəfdən isə tez-tez Qərb və ABŞ-nin haqsız təpkilərinə məruz qalırıq.
Belə bir şəraitdə dövlətimizə qarşı edilən bu haqsızlıqların beynəlxalq ictimaiyyətə çatdırılması və ondan dəstək alınmasına nail olunması xüsusilə vacibdir. Hökumət özü bu istiqamətdə gərəkən addımları atır, müstəqil siyasətini ardıcıl olaraq yürüdür. Amma vətəndaş cəmiyyətinin, o cümlədən də hakimiyyətdə olmayan siyasi partiyaların bu mövqeyi müdafiə etməsi daha ciddi nəticələrə gətirib çıxara bilər. Bu baxımdan AMİP-in əldə etdiyi uğur dövlətimiz və xalqımız üçün çox böyük dəyərə malikdir. Belə ki, AMİP sədri Arzuxan Əlizadə, AMİP sədrinin beynəlxalq əlaqələr üzrə müavini Elşən Mustafayev və AMİP Qadınlar təşkilatının sədr müavini İlhamə Əliyeva BDİ-2025 Forumunda iştirak etmək məqsədi ilə 13-17 may tarixlərində Belçikanın paytaxtı Brüsseldə səfərdə olublar. Səfər Beynəlxalq Demokrat İttifaqının (International Democracy Union) dəvətinə əsasən baş tutub. Forumun gedişatında Cənubi Qafqazda dayanıqlı sabitliyə nail olunması üçün Azərbaycanla Ermənistan arasında sülh müqaviləsinin imzalanmasının əhəmiyyətini vurğulayan sənəd yayılıb. Bununla əlaqədar olaraq AMİP-in təqdim etdiyi məlumatlar əsasında sülh müqaviləsinə əsas maneə kimi Ermənistan Konstitusiyasında Azərbaycana qarşı ərazi iddialarını özündə ehtiva edən müddəanın olduğu qeyd olunub və Beynəlxalq Demokrat İttifaqının Ermənistan tərəfindən referendum yolu ilə bu maneənin aradan qaldırılmasının vacibliyini özündə əks etdirən “Azərbaycan və Ermənistan arasında davamlı sülhün əldə olunmasına dair” xüsusi Bəyanatı qəbul olunub. Bu, dövlətimizin, cəmiyyətimizin və AMİP-in böyük uğurudur. Baki-xeber.com nəşrinin müxbiri ölkədə fəaliyyət göstərən digər öncül partiyaların mətbuat xidmətlərindən də beynəlxalq əlaqələrinin durumu barədə soruşub. Ədalət, Hüquq, Demokratiya (ƏHD) Partiyası İdarə Heyətinin üzvü Əli Zülfüqaroğlu "Bakı Xəbər"ə açıqlamasında bildirdi ki, ƏHD Partiyasının sədri, millət vəkili Qüdrət Həsənquliyev dəfələrlə dünyanın müxtəlif ölkələrində təşkil olunan beynəlxalq tədbirlərdə Azərbaycanı təmsil edib və xüsusilə Ermənistanın işğalçılıq siyasəti ilə bağlı mövqe ortaya qoyub. Onun sözlərinə görə, eyni zamanda partiya funksionerləri müxtəlif vaxtlarda partiyanı Albaniya, Belçika və digər ölkələrdə keçirilən beynəlxalq tədbirlərdə təmsil ediblər. Ə.Zülfüqaroğlu diqqətə çatdırdı ki, eyni zamanda Ədalət, Hüquq Demokratiya Partiyasının (BAXCP) təşkilatçılığı ilə də Bakıda beynəlxalq tədbir keçirilib: “Tədbirə Avropanın bir çox ölkələrindən önəmli siyasətçilər qatılıb. Bu cür tədbirlər təbii ki, ölkənin istər təbliğatı, istərsə də xarici siyasətinə dəstək baxımından əhəmiyyətə malikdir. Hesab edirəm ki, müxalif siyasi partiyaların beynəlxalq əlaqələrinin güclənməsi vacibdir”. ƏHD funksioneri həmçinin əlavə edib ki, partiyanın sədri, millət vəkili Qüdrət Həsənquliyev deputat kimi də dəfələrlə dünyanın müxtəlif ölkələrində beynəlxalq tədbirlərə qatılıb, önəmli platformalarda çıxışlar edib”.
REAL partiyasının sədri Natiq Cəfərli bizimlə söhbətində bildirdi ki, təmsil etdiyi partiya ölkədə ən çox beynəlxalq əlaqələrə malik partiyalardan biridir, bəlkə də birincisidir: "Elə bu günlərdə Avropa Parlamentinin dəvəti ilə Erkin Qədirli Brüsseldədir, bu gün qayıtmalıdır. Mən də hazırda Moldovada bir beynəlxalq tədbirdəyəm, iki gündən sonra Bakıya qayıdacam". N.Cəfərli əlavə etdi ki, tez-tez beynəlxalq konfranslara dəvət alırlar. O dedi ki, bu ilin oktyabrində Praqada Vastlav Qavel Fondunun təşkilatçılığı ilə keçirilən "Forum-2000" nüfuzlu beynəlxalq konfranslarına özü, Erkin Qədirli və İlqar Məmmədov dəvət alıb və iştirak edəcəklər: "Yeri gəlmişkən, bu bizim həmin konfransa altıncı dəvətimiz olacaq. Oraya Azərbaycandan azsaylı siyasətçilər dəvət alır. Biz isə ardıcıl olaraq dəfələrlə dəvət almışıq. Siyasi partiya və təşkilat olaraq bizim hələ ki, müqavilələriniz yoxdur. Çunki biz Azərbaycanda ən yeni partiyalardan biriyik. 2020-ci ildə qeydiyyatdan keçmişik. Beynəlxalq qruplarda isə Azərbaycanı təmsil edən, bəzi hallarda adı olyb, özü olmayan partiyalar da var. Ona görə də Azərbaycandan həmin qruplarda yeni partiyaların təmsilçiliyi bir qədər problemə çevrilir".
Azərbaycan Milli Cəbhə Partiyasının funksioneri Vüsal Qarayev sorğumuza cavab olaraq bildirdi ki, Milli Cəbhə Partiyası gənc bir partiya olmasına baxmayaraq, daxili təşkilatlanma ilə yanaşı, beynəxlaq əlaqələr qurmaq istiqamətində də iş aparır: "Bir çox beynəxalq təşkilatlarla əməkdaşlığımız, dostluğumuz mövcuddur. Azərbaycana səfər edən xarici təşkilatları dəfələrlə partiyamızda qəbul edib əməkdaşlıqlar qurmuşuq". V.Qarayev əlavə etdi ki, özəlliklə partiyanın başqanı deputat Razi Nurullayev tez-tez xarici səfərlərdə olur, beynəlxalq tədbirlərdə iştirak edir və bu tədbirlər çərçivəsində görüşlər keçirir, partiyanın beynəlxalq əlaqələrini genişləndirir.
Müraciət etdiyimiz digər partiyalardan - YAP və VHP-dən sorğumuzu cavablandıran tapılmadı.
Dəniz NƏSİRLİ
