Qulamhüseyn Əlibəyli: “Ter-Petrosyan Ermənistanla yanaşı konkret Rusiya və ABŞ-ın adını çəkir”
Bakı Hərbi Məhkəməsində davam etdirilən məhkəmə prosesində Ermənistanın birinci prezidenti Levon Ter-Petrsoyanın 1993-cü ildə keçmiş qondarma qurumun nümayəndələri ilə keçirdiyi görüşə dair videomaterial nümayiş olunub.
Videomaterialda çıxış edən Levon Ter-Petrosyan Azərbaycan ərazilərində qanunsuz olaraq yaradılan qondarma quruma Ermənistan adından ən yüksək təhlükəsizlik zəmanətləri verdiyini xatırladıb. O, qondarma qurum və Ermənistan arasında imzalanacaq təhlükəsizlik zəmanətləri barədə müqaviləni məxfi sənəd adlandırıb. Kadrlarda Ermənistanın keçmiş prezidenti müqavilənin iki nüsxədən ibarət olacağını deyərək əlavə edib: “Dağlıq Qarabağ Respublikası beynəlxalq ictimaiyyətin, Rusiya Federasiyasının, ABŞ-ın və xüsusilə Ermənistan Respublikasının Prezidenti Levon Ter-Petrosyanın zəmanətlərinə güvənir”.
Maraqlıdır, Ermənistan Azərbaycana birbaşa hərbi müdaxilə öhdəliyini kimin qarşısında götürüb? Beynəlxalq hüquqla bu cinayətdir. İndi araşdırılmalı deyilmi ki, Ermənistanı bu təcavüzə təhrik edən kim, hansı ölkə olub?
“Bu, faktiki hamıya məlum olan dövlətlərin də ifşa olunmasında əhəmiyyətli dəlil kimi qiymətləndirilə bilər”
Sözügedən məsələni “Bakı-Xəbər”ə şərh edən sabiq millət vəkili, hüquqşünas Qulamhüseyn Əlibəylinin fikrincə, Bakı Hərbi Məhkəməsində insanlıq əleyhinə müharibə cinayətləri törədən şəxslərin barəsində davam etdirilən məhkəmə prosesində onların və başqalarının konkret cinayət əməllərini təsdiq edən xeyli maddi və digər sübutlar araşdırılır: “Bu sübutlar Azərbaycan xalqına qarşı beynəlxalq xarakterli konkret cinayət əməllərinin törədilməsində həm məhkəmə prosesində iştirak edən təqsirləndirilən şəxslərin, həm də Ermənistanın ozamankı siyasi və hərbi rəhbərliyinin, Ermənistanı müdafiə edən digər dövlətlərin rəsmilərinin bilavasitə təhrikçi, təşkilatçı və icraçı kimi iştirakını təsdiq edir. O cümlədən, təqsirləndirilən şəxslərin etirafları ilə yanaşı, Ermənistanın ozamankı siyasi və hərbi rəhbərliyinə daxil olan ayrı-ayrı şəxslərin lovğalıqla etdikləri publik açıqlamalar da onların cinayətkar hərəkətlərini təsdiq edən etibarlı sübut hesab olunmalıdır. Ermənistanın birinci prezidenti Levon Ter-Petrsoyanın Azərbaycan ərazilərinin işğalındakı fəaliyyəti barədə onun özünün dilindən səsləndirdiyi açıqlamalar müxtəlif vaxtlarda mediada yayılıb. Məhkəmə prosesində nümayiş olunan və Ter-Petrsoyanın 1993-cü ildə keçmiş qondarma qurumun nümayəndələri ilə keçirdiyi görüşə dair son videomaterial da onun beynəlxalq cinayətlərdə birbaşa iştirakını bir daha təsdiq edir. Bu material həm də təcavüzkar cinayət əməllərinin təşkilində və təhrikində Ermənistanla birgə iştirakçı olan və faktiki hamıya məlum olan dövlətlərin də ifşa olunmasında əhəmiyyətli dəlil kimi qiymətləndirilə bilər. Ter-Petrosyan özü həmin dövlətləri ümumi şəkildə, bəzən də konkret adını çəkərək göstərir. Belə ki, o, Ermənistanla yanaşı konkret Rusiya və ABŞ-ın adını çəkir. Digərlərini də ümumi şəkildə “beynəlxalq ictimaiyyət” kimi təqdim edir. Bu yaxınlarda Rusiyanın xarici işlər naziri Lavrov da Ermənistan tərəfindən Azərbaycan ərazilərinin rus silahları ilə işğal olunduğunu bir daha yada salıb. Azərbaycan ərazilərinin işğal olunmasına erməniləri təhrik və təşkil edən dövlətlərin kimliyini də məhz qondarma rejimə təhlükəsizlik zəmanəti verənlər (təhlükəsizlik zəmanəti dedikdə, Azərbaycanın keçmiş Dağlıq Qarabağa daxil olmayan digər rayonların işğal olunmasının nəzərdə tutulduğu şübhəsizdir) sırasında axtarmaq lazımdır. Ona görə də bu dövlətlərin kimliyi ayrıca araşdırma predmeti olmalıdır”.
Vidadi ORDAHALLI
