Ermənistanın baş prokuroru Anna Vardapetyan parlamentdə bildirib ki, Baş Prokurorluq qanunsuz mənşəli əmlakın müsadirə edilməsi iddiası çərçivəsində dövlətin xeyrinə Robert və Bella Köçəryan, Sedrak Köçəryan, Zaruhi Badalyan, Levon və Siranuş Köçəryan, Qayane Köçəryan və Vigen Çatinyanın bir sıra mülk və əmlakının müsadirə edilməsini tələb edir.
Robert Köçəryana qarşı əmlak müsadirəsi məsələsinin yenidən aktivləşməsi Ermənistanda ictimai-siyasi vəziyyəti də gərginləşdirir.
Məsələ ilə bağlı “armenianreport” portalı yazır: “Artıq bir neçə gündür ki, Ermənistanın Baş Prokurorluğu ölkənin necə qarət edildiyi barədə respublika ictimaiyyətini məlumatlandırır. Baş Prokurorluq Robert Köçəryanın və ailəsinin möcüzəvi sərvətindən danışır, özü də ancaq Ermənistanda olanlar barəsində söhbət gedirr. Bunun ardınca “Zvartnots” gömrük idarəsinin keçmiş rəisi Armen Stepanyandan Ermənistan Respublikasının xeyrinə 28 daşınmaz əmlakın və bir çox başqa “zəhmətlə qazanılmış” əşyaların müsadirə edilməsi tələbini eşidirik. Xeyr, oğurlananı geri almaq yaxşı şeydir. Bəli, bizi əmin edirlər ki, hakimiyyətin bu hərəkətlərində şəxsi heç nə yoxdur, siyasi qisas yoxdur, sadəcə olaraq, oğurlananları müsadirə etməklə ölkəni daha varlı, daha xoşbəxt etmək istəyi var. Eyni zamanda, "Vətənin taxıl anbarlarının" harada olduğunu, soyğunçulardan alınan hər şeyin hara axacağını izah edə bilən yoxdur.
Başqa bir sual var. Doğrudanmı kimsə düşünüb ki, uzun illər Ermənistanın prezidenti olmuş və ya keçmiş “Zvartnots” gömrük idarəsinin rəisinin ailəsi bir otaqlı mənzildə, maşınsız, bir-birinin paltarını, ayaqqabısını geyinib yaşayayırmış?! Bu suala müsbət cavab verənlərdən xahiş edirəm ki, belə bir hallüsinasiyaya səbəb olan məlumatları aldıqları yerin adını çəksinlər. Ukrayna bütün dünyaya nümayiş etdirir ki, nə qədər tez və inanılmaz dərəcədə varlanmaq olar. Bu ölkə mətbuatı 2016-2018-ci illərdə kiyevli iş adamı Denis Komarnitski və həyat yoldaşının Ukraynanın paytaxtında 110 mənzilə sahib olduqlarını yazıb. Qeyd olunur ki, söhbət Kiyevdəki prestijli binalardakı daşınmaz əmlakdan gedir. O cümlədən, onların “Comfort Town” yaşayış kompleksində 52 mənzili olub. İş adamının daha 48 mənzili “Central Park” yaşayış kompleksində tapılıb. Jurnalistlərin tapa bildiyi son 10 mənzil “Tetris Hall” yaşayış kompleksində yerləşir. Bildirilir ki, Komarnitski həyat yoldaşı ilə birlikdə bu mənzilləri mülkiyyət hüququ əldə etdikdən sonra bir neçə gün və ya həftə ərzində onları satmağa cəhd edib. Müstəntiqlər qeyd edirlər ki, Komarnitski və həyat yoldaşı bu əmlakın satışından 440 milyon qrivna qazana bilərdilər.
Həmçinin, Komarnitskinin Kiyevdə abadlıq üçün torpaq ayırmaq sxemlərində iştirak etdiyinə dair şübhələri nəzərə alaraq, jurnalistlər bu mənzillərin bu cür xidmətlərin göstərilməsi üçün ödəniş üsuluna çevrilə biləcəyini düşünürlər. İndu bu şəxs Kiyev torpaqlarını qanunsuz mənimsəmək məqsədilə cinayətkar təşkilat yaratmaq və idarə etmək maddəsi ilə ittiham olunub. Amma jurnalistlər daha sonra Komarnitskinin xaricə qaçdığını aşkar ediblər. KİV-in məlumatına görə, o, hüquq-mühafizə orqanlarının əməkdaşlarının müşayiəti ilə Ukraynadan qaçıb və “200” işarəsi olan avtomobilin örtüyü altında Ukrayna sərhədinə aparılıb. Ermənistanda da bu ssenari keçərli ola bilər. İndi cəmiyyət gözlərini ölkənin ikinci prezidentinin və görkəmli gömrük əməkdaşının ailəsinə məxsus bir neçə onlarla mülkə dikib! Hakimiyyətdəkilər də korrupsiyaya qarşı mübarizə apardıqlarını deyirlər. Deməli, bu korrupsiya həmişə hər yerdə olub, var və olacaq. Bütün bunlar necə görünməlidir? ABŞ prezidenti Donald Trampdan öyrənin. Onun sayəsində ABŞ və Səudiyyə Ərəbistanı arasında Ər-Riyadın Amerika şirkətlərinə və iqtisadiyyatına 600 milyard dollar sərmayə qoyacağı müqavilələr paketi imzalandı.
Tərəflər, xüsusən 142 milyard dollar dəyərində müdafiə məhsullarının satışına dair “indiyə qədərki ən böyük” sazişi imzaladılar ki, bu sazişə əsasən Səudiyyə Ərəbistanı ABŞ-ın ondan çox müdafiə firmasından ən qabaqcıl hərbi texnika və xidmətləri alacaq. Qətər ABŞ prezidentinin Dohaya səfəri zamanı “Qatar Airways” üçün Amerika istehsalçısı “Boeing”dən 200 milyard dollar dəyərində 160 təyyarə almağa dair müqavilə imzalayıb. Bütün bunlardan Donald Tramp əhəmiyyətli bir faiz və ya bizim ərazimizdə deyildiyi kimi, “otkat” alacaq. O, həmçinin Qətərdən “hava sarayı” alacaq. Sözügedən təyyarə 400 milyon dollarlıq bir “Boeing 747-8”dir və Amerikanın yeni “Air Force One” modeli olacaq. Amma Ermənistanda bundan fərqli olaraq hakimiyyətdə olanlar, indiki halda Robert Köçəryan açıq qarət həyata keçirib”. Ermənistan Baş naziri Aparatı rəhbərinin müavini Taron Çaxoyan bildirir ki, Robert Köçəryanın vətəni Ermənistan deyil. Ermənistan rəsmisi vətənə xəyanətdə ittiham olunan Robert Köçəryan barədə sosial media hesabında yazıb: “Köçəryana qarşı vətənə xəyanət ittihamları “yalandır”. Köçəryan heç vaxt “vətəninə” xəyanət etməyib, heç vaxt. Çünki onun vətəninin hara olması ayrı bir məsələdir”. Xatırladaq ki, Taron Çaxoyan bundan əvvəl Robert Köçəryanı Moskvaya işləməkdə ittiham edərək, onu Rusiya casusu adlandırmışdı. Ermənistan parlamentinin sədri Alen Simonyan sosial şəbəkədəki səhifəsində Robert Köçəryan və oğlu Levonu ələ salıb. O, bu barədə parlamentdəki son insidentdən sonra bildirib: “Uşaq ağlaya-ağlaya evə gəlir, deyir: ana, mənə həyətdə “Robert Köçəryan” dedilər. Ana cavab verir: Bəs sən heç nə etmədin, sadəcə sənə dedilər ki, o yana get, Robert Köçəryan? Ömrün boyu sənə “Robert Köçəryan” deyəcəklər, sən isə ağlayıb özünü müdafiə etməli olacaqsan”. Xatırladaq ki, bundan əvvəl parlamentdə iclas zamanı hakim partiyanın deputatı, vitse-spiker Akop Arşakyanla Robert Köçəryanın oğlu, deputat Levon Köçəryan arasında dava olub. Mübahisə ilə başlayan gərginlik əlbəyaxa davaya çevrilib. Levon hakim partiyanın üzvlərini təhqir edərək, söyüb. Qarşı tərəfin nümayəndələri isə onun atasını saysız cinayətlər törətməkdə, korrupsiya və talançılıqda ittiham ediblər.
Tahir TAĞIYEV
