Azərbaycan xalqı qəhrəman xalqdır və düşmən təcavüzünə qarşı hər zaman qəhrəmanlıqla döyüşüb, torpağını, yurdunu müdafiə edib. Bu əzmkarlıq xalqımızın təbii xarakteridir.
XX əsrin ən dəhşətli müharibəsi kimi tarixə düşən İkinci Dünya müharibəsində Azərbaycan oğul və qızlarının misilsiz qəhrəmanlığı düz 80 ildir ki, danışılır, nəsillərdən nəsillərə keçir. İkinci Dünya müharibəsində alman faşizmi üzərində qazanılan qələbədə xalqımızın və dövlətimizin böyük payının olduğunu bütün dünya bilir.
Tale elə gətirdi ki, Azərbaycan xalqı XX əsrin sonlarında erməni faşizmi ilə üz-üzə qaldı, havadarlarının dəstəyi ilə Ermənistan torpaqlarımıza təcavüz etdi və biz 30 il torpaqlarımızın sülh yolu ilə azad olunacağı günü gözlədik. Amma günlərin birində səbr kasamız daşdı və torpaqlarımızı azad etmək uğrunda xalqımız mübarizəyə başladı. Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsi başladı və xalqımız, Ordumuz bu müharibədə böyük tarixi qələbə qazandı. Özü də mütləq və tam qələbə qazandı. İkinci Dünya müharibəsindən sonra heç bir dövlətin müharibədə mütləq qələbə qazanmadığını bilirik. Hər zaman deyildiyi kimi, Azərbaycan müharibəni müvəqqəti atəşkəs, qeyri-müəyyən sülhlə yox, tam qələbə ilə bitirib.
Mütləq və tam qələbə...
Ağdam Muğam Mərkəzinin açılışında Prezident İlham Əliyev mütləq və tam qələbə barədə bunları deyib: “...Biz açıq-aydın başa düşürdük və görürdük ki, hansı qüvvələr Ermənistana dəstək verir, hansı qüvvələr onların arxasındadır, hansı qüvvələrlə biz üz-üzə gələ bilərik və gəlmişik də. Amma bu, bizi çəkindirmədi. Artıq biz “öldü var, döndü yoxdur” şüarı ilə yaşayırdıq və 44 günlük Vətən müharibəsi həm peşəkarlıq, həm qəhrəmanlıq, həm milli ruh salnaməsidir. Bu, bütün dünyaya Azərbaycan xalqının nə qədər böyük xalq olduğunu göstərdi. Onu göstərdi ki, Azərbaycan xalqı mütləq və tam qələbə qazanmaq üçün öz canından keçməyə hazırdır. Qələbəmizi bir çox amillər şərtləndirdi. Biz son dörd il yarım ərzində bu barədə dəfələrlə danışmışıq, fikirlərimizi bölüşmüşük.
Bütün bunlar cəmiyyətdə birmənalı qəbul edilir: siyasi iradə, iqtisadi güc, müstəqil siyasət, güclü Ordu, vətənpərvərlik və gənc nəsil - milli ruhda tərbiyə olunan, bu torpaqları heç vaxt görməyən gənc nəsil. Bu torpaqları heç vaxt görməyənlərin, müharibədə iştirak edənlərin əksəriyyəti işğal dövründə doğulmuş insanlar idi. Onları doğma torpağa çəkən o tarixi bağlar - bütün bu və digər amillər bizim Qələbəmizi şərtləndirdi və biz mütləq və tam Qələbə qazandıq. Nə bizdən qabaqkı onilliklər ərzində, nə bizdən sonrakı dörd il yarım ərzində heç kim mütləq və tam Qələbə qazanmamışdır və elə görünür ki, qazanmayacaq. Bunu mən müqayisə üçün demirəm. Amma dünyada hər şey müqayisə ilə ölçülür...”
Az itki - möhtəşəm Zəfər...
Tarixçilər qeyd edir ki, Prezident İlham Əliyevin ötən illər ərzində qurduğu müasir Azərbaycan Ordusu yüksək peşəkarlığı sayəsində çox qısa zamanda düşmənə sarsıdıcı zərbələr endirərək 300-dən çox yaşayış məntəqəsini və Qarabağın tacı Şuşanı azad etdi. Ali Baş Komandan “dəmir yumruğu” ilə işğalçını kapitulyasiya aktına imza atmağa məcbur etdi. Məlumdur ki, Vətən müharibəmizdə qarşıya qoyulan başlıca məqsəd minimum itki ilə möhtəşəm qələbə çalmaq idi. Qəhrəman döyüşçülərimiz sentyabrın 27-dən, Vətən müharibəsinin elə ilk günündən ön cəbhə xəttini uğurla yardı, yaşayış məntəqələrimizi, yüksəkliklərimizi işğaldan azad edərək xalqımızın 30 illik Qarabağ yarasına məlhəm çəkdi. Döyüş başlayandan qısa müddət sonra Azərbaycan Ordusu tərəfindən Cəbrayıl, Füzuli, Zəngilan, Qubadlı rayonları, Suqovuşan, Hadrut qəsəbələri, Xocalının və Kəlbəcərin bir hissəsi, Murovdağ silsiləsi, Laçının cənub hissəsi, strateji yüksəkliklər düşməndən azad edildi. 2020-ci il noyabrın 8-də isə şanlı ordumuz Azərbaycanın üçrəngli bayrağını Qarabağın tacı Şuşada dalğalandırdı, igidlərimiz düşməni qarşılarında diz çökdürərək onun müqavimət istəklərini birdəfəlik sındırdılar. Qəhrəman Azərbaycan döyüşçüləri 9 Noyabr Bayraq Günümüzdə işğal altında olan daha 70 kəndimizi azad edərək xalqımıza qələbə sevinci yaşatdılar.
44 günlük Vətən müharibəsindən sonra 23 saatlıq lokal antiterror tədbirləri nəticəsində digər ərazilərimiz də işğaldan azad olundu. Antiterror tədbirləri Azərbaycanın Qarabağ bölgəsində qanunsuz olaraq yerləşdirilmiş silahlı qüvvələrin tamamilə zərərsizləşdirilməsini və separatçı rejimin məğlubiyyətini təmin etdi. Azərbaycan ordusu bölgədə sülhün və sabitliyin bərqərar olunması üçün öz qətiyyətini və hərbi gücünü bir daha nümayiş etdirdi. Bu, yalnız Azərbaycanın deyil, regionun gələcək sabitliyi üçün də önəmli bir addım idi.
Azərbaycanın tarixi Zəfəri nəticəsində Şuşa, Füzuli, Ağdam, Laçın, Kəlbəcər, Xankəndi, Xocalı, Ağdərə, Xocavənd, Əsgəranda üçrəngli bayrağımız dalğalanır. Vətən müharibəsində əldə edilən Zəfər bizim güvənc simvolumizdir. Bütün bunlar göstərdi ki, Prezident İlham Əliyevin rəhbərliyi ilə Azərbaycan Ordusu və Azərbaycan xalqı XXI əsr tarixinə qızıl hərflərlə yazılan tam və mütləq qələbənin qazanılması üçün bütün gücünü ortaya qoyub və məqsədinə nail olub.
Azərbaycan dünya tarixində xüsusi iz buraxan tarixi qələbə qazanmaqla nəinki bölgədə, eləcə də bütün dünyada öz sözünü dedi.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
