Tural İsmayılov: “...Sülh prosesində yeni bir mərhələnin başlanğıcına işarə edir”
ABŞ prezidenti Donald Tramp, Yaxın Şərq turu çərçivəsində sıx iş qrafikinə baxmayaraq, Rusiya prezidenti Vladimir Putinlə İstanbulda görüşmək imkanını istisna etmədiyini deyib. "Putin mənim orada olmağımı istərdi və bu, tamamilə mümkündür. Mən orada olmasam, onun gəlib-gəlməyəcəyini bilmirəm. Baxacağıq...
Ancaq bu o demək deyil ki, mən çoxlu insanın həyatını xilas etmək üçün bunu edə bilməyəcəm, sonra geri qayıdaraq” - deyə Tramp bildirib.
Digər tərəfdən, “Bloomberg” agentliyi Türkiyə rəsmilərinin Trampın mayın 15-də Türkiyəyə səfərini gözləmədiyini, lakin Rusiya prezidenti Putin də gələcəyi təqdirdə səfərin bir neçə gün ərzində baş tuta biləcəyini bildirib.
Tramp Qətər əmiri Təmim bin Həməd Al Tani ilə görüşündə isə deyib ki, Ukrayna məsələsi ilə bağlı “yaxın günlərdə yaxşı xəbərlər” ola bilər: "Bu gün, bəlkə sabah və ya cümə günü yaxşı xəbərlər ala bilərik, gözləyib görəcəyik".
Tramp deyib ki, çox yaxın günlərdə Ukrayna ilə bağlı yaxşı xəbərlər olacaq. ABŞ prezidenti nə demək istəyir?
“Trampın açıqlaması Ukrayna münaqişəsində yeni ümidlərin yaranmasına səbəb olur”
Politoloq Tural İsmayılov “Bakı-Xəbər”ə “ABŞ prezidenti Donald Trampın yaxın günlərdə Ukrayna ilə bağlı yaxşı xəbərlərin olacağını deməsi sülh prosesində yeni bir mərhələnin başlanğıcına işarə edir. Bu bəyanat mayın 15-də İstanbulda Rusiya və Ukrayna liderləri arasında keçiriləcək görüşə olan optimizmin ifadəsidir. Trampın görüşdə iştirak etməyəcəyi açıqlansa da, onun bu prosesə dəstək verməsi diqqət çəkir. Bu, ABŞ-ın münaqişənin həllində vasitəçilik rolunu davam etdirmək niyyətində olduğunu göstərir”-deyə bildirdi.
T.İsmayılovun sözlərinə görə, Ukrayna prezidenti Zelenski də Trampın dəstəyini yüksək qiymətləndirir və dialoqun genişlənməsinin vacibliyini vurğulayır: “Trampın açıqlaması həmçinin müharibənin dayandırılması və regionda sabitliyin bərpası üçün beynəlxalq koalisiyanın formalaşmasına zəmin yaradır. ABŞ-ın bu prosesdə fəal olmağı münaqişənin sülh yolu ilə həllinə olan inamı artırır.
Trampın sözləri, həmçinin, Rusiya-Ukrayna münaqişəsinin uzun müddət davam edən gərginliyinə son qoymaq üçün real imkanların mövcud olduğunu göstərir. Bu, ABŞ və Avropa üçün strateji əhəmiyyət kəsb edən bir addımdır.
Bununla yanaşı, Trampın bəyanatı münaqişənin həllindəki çətinlikləri və qarşıda duran risqləri də unutmamağa çağırır. Sülh prosesinin uğuru tərəflərin kompromisə hazır olması və beynəlxalq dəstəyin davamlılığı ilə bağlıdır. Trampın optimizmi, həm də bu prosesin siyasi və diplomatik müstəvidə irəliləməsinə təkan verir.
Nəticə etibarilə, Trampın açıqlaması Ukrayna münaqişəsində yeni ümidlərin yaranmasına səbəb olur və beynəlxalq ictimaiyyətdə müsbət rezonans doğurur. Bu, ABŞ-ın qlobal siyasətdə nüfuzunu artırmaq və regionda sülhün təmin olunmasına töhfə vermək istəyini göstərir”.
T.İsmayılov qeyd etdi ki, sülhün bərqərar olması yalnız regional deyil, qlobal təhlükəsizlik üçün də önəmlidir. “Trampın mesajı münaqişənin sülh yolu ilə həllinə olan inamı gücləndirir və diplomatik proseslərin davam etdirilməsinin vacibliyini vurğulayır” - deyə T.İsmayılov bildirdi.
İradə SARIYEVA
