Ümummilli Lider Heydər Əliyevin anadan olmasının 102-ci ildönümü Berlində qeyd edilib - FOTO
Ölkəmizin Almaniyadakı səfirliyinin təşkilatçılığı ilə Berlindəki Azərbaycan Mədəniyyət Mərkəzində Ümummilli Lider Heydər Əliyevin anadan olmasının 102-ci ildönümünə həsr edilmiş tədbir keçirilib.
“Çağdaş Azərbaycan Respublikasının banisi və Azərbaycan xalqının Ümummilli Lideri” adlı tədbirdə Almaniya Xarici İşlər Nazirliyinin və digər hökumət qurumlarının yüksəkvəzifəli təmsilçiləri, xarici ölkələrin səfirləri, media nümayəndələri, elm və mədəniyyət xadimləri, eləcə də Almaniyada yaşayan Azərbaycan, türk və digər icmaların üzvləri iştirak ediblər.
Azərbaycanın Almaniyadakı səfiri Nəsimi Ağayev tədbirdə çıxış edərək, Ümummilli Liderin xalqımız və dövlətimiz qarşısında misilsiz xidmətlərindən söz açıb. Diplomat bildirib ki, müasir müstəqil Azərbaycanın memarı və qurucusu, Ulu Öndər Heydər Əliyev doğma xalqını və dövlətini taleyüklü məqamda vətəndaş müharibəsi, parçalanma və müstəqilliyin itirilməsi təhlükəsindən fədakarlıqla xilas edərək, ölkəmizi sabitlik, rifah və tərəqqi yoluna çıxarıb.
Diqqətə çatdırılıb ki, Ulu Öndər Heydər Əliyev Azərbaycanın ərazi bütövlüyünün təmin edilməsini milli dövlətçilik strategiyasının əsas prioriteti kimi müəyyənləşdirib və bu amal onun bütün siyasi fəaliyyətinin əsas qayəsini təşkil edib. Bu müqəddəs və ali məqsəd Ümummilli Liderimizin layiqli davamçısı, Prezident İlham Əliyevin qətiyyətli rəhbərliyi ilə reallığa çevrilib, Azərbaycan öz ərazi bütövlüyünü tam bərpa edərək Ulu Öndərin vəsiyyətini yerinə yetirib.
Bu gün qüdrətli Azərbaycanın dünyada böyük hörmət sahibi olduğunu bildirən diplomat bu uğurların əsasında Ulu Öndər Heydər Əliyevin müəyyən etdiyi siyasi xətt və inkişaf strategiyasının dayandığını bildirib. Xüsusi vurğulanıb ki, Ümummilli Liderin ideyaları bu gün də yaşayır, Azərbaycan xalqını birləşdirən mənəvi dəyərə çevrilərək ölkənin hərtərəfli inkişafına xidmət edir.
Ümummilli Lider Heydər Əliyevin Almaniya ilə Azərbaycan arasında münasibətlərin qurulması və inkişafındakı rolundan da söz açan N.Ağayev dahi şəxsiyyətin ikitərəfli münasibətlərə böyük önəm verdiyini, bunun da nəticəsində əlaqələrimizin daim yüksələn xətlə inkişaf etdiyini vurğulayıb.
Sonra Almaniyanın Reyn Dövlət Operasının solisti Mərziyə Hüseynova, pianoçu Nərmin Nəcəfli və alman musiqiçilər konsert proqramı ilə çıxış ediblər. Konsertdə görkəmli Azərbaycan və Avropa bəstəkarlarının məşhur əsərləri ifa olunub.
Tədbir çərçivəsində iştirakçılar Ümummilli Lider Heydər Əliyev və Azərbaycan ilə bağlı nəşrlərlə tanış olublar.
Sonda tədbir iştirakçılarına Azərbaycan milli mətbəxinin ləziz nümunələri təqdim edilib.
ZÜMRÜD
