Rəşad Bayramov: “Görünür, London hansısa balansı qorumaqdan ötrü bu addımı atır”
Böyük Britaniyanın Ermənistandakı səfiri Con Galleqerin aprelin 20-də Gorusa səfər edib. Səfər çərçivəsində o, Avropa İttifaqının Ermənistandakı müşahidə missiyası ilə görüşüb.
Britaniya səfiri müşahidə missiyasının üzvləri ilə görüşdə belə bir açıqlama verib: “Avropa İttifaqının monitorinq qrupu ilə çox faydalı görüş keçirdim. Onlar öz mandatlarını necə yerinə yetirdiklərini və sərhəd icmalarında etimadı necə yaratdıqlardan danışdılar. Sünikdəkilərin dinc şəraitdə yaşamaq və işləmək hüququ var”.
Maraqlıdır, Aİ-nin Ermənistandakı müşahidə missiyasının tərkibində ingilis diplomatlar və hərbçilər yoxdur. Belə olan halda Britaniya səfirinin həmin missiya ilə görüşü hansı zərurətdən yaranıb? Digər tərəfdən, Səfir “Sünikdəkilərin dinc şəraitdə yaşamaq və işləmək hüququ var” cümləsi ilə kimə işarə edib? İngiltərə niyə Azərbaycanla bu dərəcədə yaxın tərəfdaşlığı birdən-birə görməzdən gəlir?
“Hər halda, səfir bu fikirlərinə bir izahat verməlidir ki, konkret kimə işarə edir”
Sözügedən məsələ ilə bağlı fikirlərini “Bakı-Xəbər”lə bölüşən AMİP Ali Məclisinin sədri Rəşad Bayramov buna bir neçə prizmadan yanaşdı: “Prinsip etibarilə Böyük Britaniyanın Ermənistandakı səfirinin sərhəd bölgəsində olan icma nümayəndələri ilə görüşü və yaxud da Aİ-nin müşahidə missiyası ilə görüşündə qeyri-adi bir şey yoxdur. Çünki İngiltərə hər nə qədər Aİ-nin üzvü olmasa da, hər nə qədər müşahidə missiyasının tərkibində fəaliyyət göstərməsə də, Londonun özünün Cənubi Qafqaz maraqları var. Cənubi Qafqaz maraqları da həmin ölkəni yerdə bu və ya digər şəkildə ayrı-ayrı qruplarla əlaqələri saxlamağı özündə ehtiva edir. Nəzərə almalıyıq ki, Böyük Britaniyanın Azərbaycandakı səfiri zaman-zaman Qarabağa səfər edib. Biz hələ Qarabağda suverenliyimizi tam bərqərar etməmiş səfir Şaşaya gedirdi. Halbuki, nə ABŞ, nə də Fransa səfirləri antiterror əməliyyatlarından əvvəl Qarabağa səfər etmirdilər. Görünür, bu baxımdan London hansısa balansı qurumaqdan ötrü bu addımı atır. Nəzərə almalıyıq ki, İngiltərə Azərbaycanla nə qədər yaxın olsa da, Ermənistanla da müəyyən əlaqələrə malikdir. Ortada xristian amili və digər faktorlar var. Səfirin Zəngəzur istiqamətində görünməsi, fikrimcə, həm də Böyük Britaniyanın dəhlizə olan marağının ifadəsidir. Deməzdim ki, səfir Con Galleqerin sırf erməni maraqlarından ötrü Gorusa səfər edib. O ki qaldı səfirin “Sünikdəkilərin dinc şəraitdə yaşamaq və işləmək hüququ var” açıqlaması verməsinə, bunun arxasında nəyin dayanması maraq doğurur. Hər halda, səfir bu fikirlərinə bir izahat verməlidir ki, konkret kimə işarə edir. Bütün bunların fonunda hesab edirəm ki, biz Böyük Britaniyanın Azərbaycanla əlaqələrini, ərazi bütövlüyümüzə, suverenliyimizə verdiyi qiyməti, indiyə qədər separatçı rejim dövründə keçirilən heç bir “seçkini” tanımamasını qiymətləndirməliyik. Bütün bunlar onu deməyə əsas verir ki, səfirin Gorusda səsləndirdiyi fikirlər sülhün vacibliyinə işarədir. Çünki sülhün olmamasından ən çox əziyyət çəkən sərhəd bölgələridir. Ola bilsin ki, bununla səfir Ermənistanda revanşistlərə dolayı yolla xəbərdarlıq edir. Bu da ola bilər”.
Vidadi ORDAHALLI
