Mütəllim Rəhimli: "Mən də Ədalət Partiyasının sədrliyinə iddialıyam"
Azərbaycanda siyasi ənənələri olan, qocaman bir pariya olan Ədalət Partiyasının lideri İlyas İsmayılov haqq dünyasına qovuşduqdan sonra partiya yeni sədr seçmək barədə qərar verib.
Partiyanın Ali Məclisi mayın 17-də qurultay keçirəcək. Düzdür, partiya başqanını əvəz edən Meydan Babayev qərara veto qoyub. Amma əksəriyyət qarşısındə bu vetonun da duruş gətirə bilməyəcəyi dəqiqdir.
"İndiki dövrdə Ədalət Partiyasının siyasi xəttində hər hansı dəyişiklik edilməsi nəzərdə tutulmur"
Partiyanın qurultaya hazırlıq məsələləri və perspektivlər barədə baki-xeber.com-un muxbiri Ədalət Partiyasının sədr müavini Mütəllim Rəhimli ilə söhbətləşib.
- Mütəllim bəy, Ədalət Partiyasında qurultaya hazırlıq hansı mərhələdədir və necə gedir?
- Ədalət Partiyasının Ali Məclisi mayın 17-də Qurultayın keçirilməsi ilə bağlı qərar qəbul edib. İclasda Ali Məclisin 56 nəfər üzvü iştirak etmiş və yekdilliklə qurultayın keçirilməsi və vaxtının müəyyənləşdirilməsinə səs vermişlər. Bu gün Ədalət partiyasının sədrinin səlahiyyətlərini icra edən Meydan Babayev Ali Məclisin qərarına veto qoyduğunu bildirib. Partiya Nizamnaməsinə görə onun belə bir səlahiyyəti var. Baxmayaraq ki, iclasda bütün iştirakçılar qərarın lehinə səs verib. Partiyanın Nizamnaməsinə görə, veto qoyulduqda məsələyə yenidən baxılır və üçdə iki səs çoxluğu ilə qəbul olunmuş qərar həlledicidir. Ona görə də bu məsələni yenidən dəyərləndirmək lazım gələcək. Ali Məclis yenidən toplaşaraq 19 aprel qərarını yenidən təsdiq etməlidir.
- Kimlər namizəddir, daha çox reytinq kimə məxsusdur?
- Ədalət Partiyasının hər bir üzvü sədrlik uğrunda mübarizəyə qoşula bilər. Hər kəsin öz namizədliyini və ya namizədini irəli sürmək hüququ var. Sədrliyə iddialı şəxslər var. Mən də Ədalət Partiyasının sədrliyinə iddialıyam. Ona görə də başqası haqqında danişmağım doğru olmazdı.
- Yeni dövrdə partiyanın siyasi xəttində dəyişikliklər olacaqmı? Qarşidakı dönəmdə partiyanın uğurlarına nə qədər təminat var?
- İndiki dövrdə Ədalət Partiyasının siyasi xəttində hər hansı dəyişiklik edilməsi nəzərdə tutulmur. Partiya İlyas İsmayılovun bizə siyasi mirasıdır və bizlər onu yaşatmalıyıq. Ədalət Partiyası mövcud ideoloji və siyasi xətti ilə zamanın sınaqlarına qalib gələrək, nəinki mövcudluğunu qoruyub saxlamışdır, həm də kifayət qədər uğurlar da əldə etmişdir. Ən mühümü isə, çoxsaylı insanların ümid yerinə çevrilə bilmişdir. İlyas müəllim özündən sonra partiyanı idarə etmək gücunə malik xeyli üzv yetişdirmişdir. Onların əhatəli siyasi görüşləri, müasir siyasi prosesləri təhlil etmək bacarıqları var. Ədalət Partiyasını onun sıralarında olan sadiq, sınaqdan keçmiş, heç nəyə əyilməyən funksionerləri yaşadacaq və gələcək nəsillərə ötürəcək.
- Deyilənlərə görə, Elxan Şükürli və bəziləri pariyadan gedib, bu, partiyanın fəaliyyətinə təsir edəcəkmi, yoxsa bunlar elə ciddi itki deyil?
- Elxan Şükürlü Ədalət Partiyasının tanınmış funksionerlərindən biridir. O, partiyanın sıralarını tərk etməyib. Bu yanlış informasiyadır. Ümumiyyətlə götürdükdə isə, heç bir ədalətçi istəməz ki, partiyanın sıralarını əqidə yoldaşı tərk eləsin. Bu siyasi məsələ olmaqdan əlavə, həm də bizim üçün çox boyük mənəvi çəkiyə malik məsələdir.
Akif NƏSİRLİ
