Elşad Həsənov: “Məgər Moskva bilmir ki, Paşinyanı hansı qüvvələr hakimiyyətə gətirib?”
Ermənistan BMT Baş Assambleyasının Rusiyaya qarşı ittihamları ehtiva edən qətnaməsini dəstəkləyib. Belə ki, “Birləşmiş Millətlər Təşkilatı ilə regional və digər təşkilatlar arasında əməkdaşlıq: Birləşmiş Millətlər Təşkilatı ilə Avropa Şurası arasında əməkdaşlıq” adlı sənədin lehinə 105 səs verilib ki, onların sırasında Ermənistan da yer alıb.
ABŞ da daxil olmaqla 9 ölkə onun əleyhinə çıxıb, 33 ölkə isə bitərəf qalıb. Qətnamənin preambulasında, o cümlədən “Rusiyanın Ukrayna və Gürcüstana təcavüzündən” bəhs olunur. Qətnamədə həmçinin “Rusiyanın Ukraynaya təcavüzü cinayəti üzrə xüsusi tribunalın yaradılması” üzərində iş getdiyi xatırladılır.
Bax budur reallıq və Ermənistanın Rusiyaya qarşı yeritdiyi siyasət. Rusiya xarici işlər nazirinin müavini Mixail Qaluzin isə bəyan edir ki, Ermənistanın maraqlarını pozmaq planımız yoxdur və ola da bilməz.
“Hesab edirəm ki, bundan sonra da rəsmi İrəvan Rusiya əleyhinə olan qətnamələri dəstəkləyəcək”
Sözügedən məsələni “Bakı-Xəbər”ə şərh edən siyasi ekspert Elşad Həsənovun fikrincə, Ermənistanın son illər yeritdiyi siyasət məhz birbaşa Rusiyaya qarşı yönəlib: “Paşinyan hakimiyyəti bütün vasitələrlə Rusiyanın Ermənistanda mövcudluğuna son qoymağa çalışır. Bunun üçün də Paşinyan 2021-ci ilin iyununda parlament seçkilərində ikinci dəfə qalib gələndən sonra Rusiyaya qarşı daha inamla hərəkət etməyə başladı. Bu məsələdə 44 günlük müharibədən sonra Ermənistanda yaranan anti-Rusiya ovqatından Nikol maksimum istifadə etdi. Media belə bir rəy yaratdı ki, Rusiya Ermənistan üçün sadiq müttəfiq deyil və s. Daha sonra Ermənistan bir sıra praktiki addımlar atdı. İlk öncə “Zvartnots” hava limanından Rusiya sərhədçiləri çıxarıldı. Ermənistan KTMT-nin üzvü ola-ola Rusiyanı saya salmadan ABŞ-la birgə hərbi təlimlər keçirdi. Özü də Ermənistan ərazisində. Həmçinin İrəvan Ermənistan-Azərbaycan sərhədinə KTMT-qüvvələrini yox, Avropa İttifaqı Müşahidə Missiyasını gətirdi. Rusiya dəfələrlə təklif etdi ki, sərhəddə KTMT qüvvələri iştirak etsin, amma Paşinyan Aİ-yə üstünlük verdi. Daha sonra Ermənistanın İranla sərhədindən Rusiya sərhədçiləri çıxarıldı. Analoji proses bu gün Ermənistan-Türkiyə sərhədində gedir. Əminəm ki, Bayden ötən il ikinci dəfə prezident seçilsəydi, Paşinyan Gümrüdəki 102-ci bazanın çıxarılması məsələsini gündəmə gətirərdi. Ancaq Trampın seçkilərdə qalib gəlməsi Paşinyanın planlarını pozdu. Anladı ki, Tramp hakimiyyəti Bayden administrasiyası qədər onlara dəstək olmayacaq. Tramp tam əksinə olaraq Rusiya prezidenti Vladimir Putinin yaxını kimi özünü göstərməyə başladı. Rusiyanın yenidən güclənməsində, siyasi arenada öz sözünü deməyə şərait yaratdı. Lakin bütün bunlar da Paşinyanın Rusiya ilə bağlı siyasətində kardinal dəyişikliklərə səbəb olmayıb. Elə bunun nəticəsidir ki, Ermənistan BMT Baş Assambleyasının Rusiyaya qarşı ittihamları ehtiva edən qətnaməsinə səs verib. Hesab edirəm ki, bundan sonra da rəsmi İrəvan Rusiya əleyhinə olan qətnamələri dəstəkləyəcək. Ancaq Rusiya rəsmiləri hələ də nəyəsə ümid edirlər və yumşaq mövqedən çıxış edirlər. Halbuki, Rusiyanın təsir rıçaqları kifayət qədər böyükdür. Məgər Moskva bilmir ki, Paşinyanı hansı qüvvələr hakimiyyətə gətirib? Ola bilər ki, Rusiyanın hansısa gizli planları var. Yoxsa bu dərəcədə təmkinli mövqedən çıxış etməzdilər. Ola bilsin ki, Rusiya yaxın zamanlarda kəskin mövqe ortaya qoysun. Lakin bu gedişlə Ermənistan tamamilə Rusiyanın orbitindən çıxa bilər”.
Vidadi ORDAHALLI
