Əli Orucov: “Azərbaycanın iştirak etməməsi üçün kifayət qədər əsas var”
Məlum olduğu kimi, Moskvada mayın 9-da Qələbə paradı keçiriləcək. Moskva qələbənin 80 illiyinə və xüsusən də tədbirin təntənəli keçirilməsinə can atır. Daha çox ölkənin tədbirdə iştirakını istəyir ki, dünyaya tək olmadığını göstərsin.
Hər il keçirilən parad Rusiya və onun lideri Vladimir Putin üçün təkcə tarixi hadisənin anılması deyil, həm də siyasi təbliğat alətidir. Kreml üçün bu tədbir həm “faşizmə qarşı mübarizə” simvoludur, həm də Rusiya ətrafında siyasi dəstək nümayiş etdirmək imkanıdır.
Bu il paradda Çin lideri Si Cinpin, Vyetnam Kommunist Partiyasının baş katibi To Lam, Belarus prezidenti Aleksandr Lukaşenko, Braziliya prezidenti Lula da Silva, Kuba lideri Migel Dias-Kanel, Serbiya prezidenti Aleksandar Vuçiç və Ermənistan baş naziri Nikol Paşinyanın iştirak edəcəyi gözlənilir.
Avropa İttifaqının xarici siyasət rəhbəri Kaya Kallas bəyan edib ki, 9 May paradında iştirakın siyasi nəticələri olacaq. Onun sözlərinə görə, Aİ-yə namizəd ölkələrin bu tədbirdə görünməsi qəti şəkildə istənilmir.
O zaman SSRİ neftinin 70-75 faizini, benzinin 85-90 faizini Bakı verirdi. Motorlu hərbi texnika, demək olar ki, Bakı yanacağı ilə işləyirdi. 1941-1945-ci illərdə Bakıdan cəbhəyə 75 milyon ton neft, 22 milyon ton benzin göndərilib. Ancaq müharibədən sonra bir sıra şəhərlərə qəhrəman şəhər statusu verilsə də, Bakıya qəhrəman şəhər statusu verilmədi. Halbuki, Bakı nefti hesabına qələbə qazanıldı. 1991-ci ildə SSRİ dağılanda Rusiya onun varisi oldu. Ancaq buna baxmayaraq, yenə də Bakıya qəhrəman şəhər statusu verilmədi. Moskva Bakının qəhrəman şəhər adını qaytarıb özünə vermək haqda hələ də düşünmür. Əgər Bakının adı verilməsə, Azərbaycanın Moskvada 80 illik paradda iştirakına nə qədər zərurət var? İştirakdan imtina ən düzgünü olmazmı? Ekspertlər bu barədə nə düşünür?
“Bu, gec də olsa, ədalətin təntənəsi olardı, amma göründüyü kimi, Kreml bu dəfə də buna getmədi”
Sözügedən məsələyə aydınlıq gətirən AMİP funksioneri Əli Orucov “Bakı-Xəbər”ə açıqlamasında prinsipcə qələbənin 80 illiyində Azərbaycanın iştirak etməməsi üçün kifayət qədər əsasın olduğunu bildirdi: “Birincisi, ona görə ki, Bakıya qəhrəman şəhər statusu hələ də verilməyib. Baxmayaraq ki, Bakı nefti müharibədə həlledici rol oynayıb. Rusiya qələbənin 80 illiyi münasibəti ilə Bakıya qəhrəman şəhər statusu verə bilərdi. Bu, gec də olsa, ədalətin təntənəsi olardı, amma göründüyü kimi, Kreml bu dəfə də buna getmədi. İkincisi, ötən ilin dekabrında Azərbaycana məxsus mülki təyyarənin Qroznı üzərində vurulması və buna görə Rusiyanın rəsmən üzr istəməməsi iki ölkə arasında soyuqluğa səbəb olub. Ən başlıcası, bu hadisə Rusiyaya münasibətdə inamsızlığı gücləndirib. Üçüncüsü, Rusiyanın Ukraynada apardığı işğalçı müharibə dünyada bu ölkənin imicinə güclü zərər vurub. Bu səbəbdən bir sıra ölkələr 9 mayda Moskvada keçiriləcək paradda iştirak etməyəcəklər. Hesab edirəm ki, bütün bunlardan çıxış edərək Azərbaycan sözügedən tədbirə qatılmaya bilər. Qeyd etdiyim kimi, bunun üçün yetərincə əsas var”.
Vidadi ORDAHALLI
