Ceyhun Məmmədov: “Türk dövlətlərinin hazırkı birliyi...”
Türk Dövlətləri Təşkilatına (TDT) üzv olan bəzi ölkələr, daha dəqiq desək, Mərkəzi Asiyadakı türk dövlətləri Avropa İttifaqının (Aİ) toruna düşüb, uyğun olmayan qərar qəbul edib, yunan Kiprində səfirlik açıb, bu fakt da, təbii ki, ciddi narahatlıq doğurur. Hazırda türk dövlətləri birliyi özünün çox həssas mərhələsini yaşayır.
Türk dövlətlərinin birliyinin indiki səviyyəsi necədir və perspektivdə nə gözlənilir?
“Bu birliyi istəməyən, bu birliyə mane olmaq istəyən dövlətlər də var, olub, olacaq və gələcəkdə də bunu etməyə çalışacaqlar”
Millət vəkili Ceyhun Məmmədov “Bakı-Xəbər”ə şərhində “Buna heç kəsin şübhəsi olmasın ki, bu əsrimiz və gələcək əsrimiz türk əsridir, türk birliyinin güclənməsi əsridir. Bunun çox ciddi əsasları var. Bu gün deyə bilərik ki, türk dövlətlərinin hazırkı birliyi yüksək səviyyədədir və bu təşkilatın çox böyük perspektivləri var. Burda Azərbaycan və Türkiyə lokomotiv rolu oynayır. Bu məsələdə Prezident İlham Əliyevin rolunu xüsusi qeyd etməliyik. Yəni bu gün Prezident İlham Əliyev və Türkiyə prezidenti bu istiqamətdə çox fəal bir iş aparırlar”-deyə bildirdi.
C.Məmmədovun fikrincə, ötən dövrə baxanda artıq bu birlik təşkilata çevrilib, strukturları formalaşıb, bir neçə il ərzində çoxlu sammitlər, çoxlu görüşlər keçirilib. Bu gün Azərbaycan dövləti tərəfindən bu istiqamətdə addımlar atıldığını deyən C.Məmmədov bildirdi ki, bu addımlar uğurla həyata keçirilir. “Ümumi proseslərin uğurla getdiyini görürük. Deyə bilərik ki, bu gün təşkilart qeyd etdiyim kimi bütün sahələrdə böyük uğurlara imza atır. Son dövrlər müəyyən proseslər getdi, müəyyən hadisələr baş verdi, amma ümumi götürdükdə isə deyə bilərik ki, proseslər qaydasındadır və inkişafı daha da çoxdur.
Əlbəttə, bu birliyi istəməyən, bu birliyə mane olmaq istəyən dövlətlər də var, olub, olacaq və gələcəkdə də bunu etməyə çalışacaqlar. Ancaq biz heç bir vəchlə prosesin bu istiqamətdə getməsinə imkan vermirik. Cənab Prezident dəfələrlə Orta Asiya Respublikalarına səfərlər edib, biz bunun şahidiyik. Davamlı olaraq müxtəlif tədbirlər görülür, addımlar atılır. Bu da bizə onu deməyə əsas verir ki, bu gün proseslər arzuolunan səviyyədə gedir. Biz əminik ki, hər şey daha da yaxşı olacaq, daha da inkişaf edəcək, daha da güclənəcək. Azərbaycan Türkiyə və Orta Asiya Respublikaları ilə birgə daha böyük uğurlara imza atacaq. Yəni bunun üçün çox ciddi əsaslar var, çox ciddi səylər var. Yəni bu ona aparacaq ki, Azərbaycan qarşısına qoyduğu hədəf və məqsədlərə zamanla nail ola biləcək və Türk Dövlətləri Təşkilatı da uğurlarını davam etdirəcək, davamlı olaraq bütün istiqamətlərdə öz səylərini irəliyə doğru apara biləcək. Bunun üçün çox geniş əsas və imkanlar var”-deyə C.Məmmədov qeyd etdi.
İradə SARIYEVA
