Xaqani Cəfərli: "Fransanın Azərbaycana qarşı ədalətsiz mövqeyinə görə Zaxarovanın sözləri bizi aldatmamalıdır"
Avropalıların və hər şeydən əvvəl fransızların öz geosiyasi məqsədlərinə çatmaq üçün regional gərginliyin saxlanmasında maraqlı olduqlarını düşünməyə bütün əsaslar var. Bunu mətbata açiqlamasında Rusiyanin XİN sözçusu Mariya Zaxarova deyib.
O, sözünə davam edərək deyir: "Biz dəfələrlə Yelisey sarayının Ermənistan-Azərbaycan münaqişəsini və ziddiyyətləri qızışdırmaq bahasına vasitəçilik səyləri tətbiq etmək cəhdlərinin şahidi olmuşuq. 2022-ci ildə ATƏT-in Minsk Qrupunun işini sabotaj etmək və faktiki olaraq dağılmasına görə məsuliyyətin mühüm payı məhz fransızların üzərinə düşür".
Avropa İttifaqının Ermənistandakı mülki monitorinq missiyasının fəaliyyətinə toxunan xanım Zaxarova deyib ki, Avropa İttifaqının nümayəndələrinə casus monitorlar da demək olar.
Rusiya nədən Avropaya, xüsusilə də Fransaya qarşı bu qədər aqressiv davranır?
Baki-xeber.com saytının sualını cavablandıran politoloq Xaqani Cəfərli bildirdi ki, Rusiyanin XİN sözçusu Mariya Zaxarovanın dəfələrlə Yelisey sarayının Ermənistan-Azərbaycan münaqişəsini və ziddiyyətləri qızışdırmaq bahasına vasitəçilik səyləri tətbiq etmək cəhdlərinin şahidi olmaları haqqında açıqlaması xoşməramlı mövqe kimi qəbul oluna bilməz: "Əgər Rusiya rəsmisi bu fikri ATƏT-in Minsk Qrupunun vasitəçilik etdiyi dövrdə səsləndirsəydi, qəbul oluna bilərdi. İllər sonra bunu səsləndirmələri Moskvanın Parisə olan qərəzindən irəli gəlir. ATƏT-in Minsk Qrupunun faktiki olaraq dağılmasına görə məsuliyyəti Fransanın üzərinə qoyması da doğru deyil. ATƏT-in Minsk Qrupu Rusiyanın 24 fevral 2022-ci ildə Ukraynaya qarşı genişmiqyaslı işğalçılıq müharibəsindən sonra ABŞ və Fransanın Rusiya ilə birlikdə fəaliyyət göstərə bilməməsinə görə faktiki olaraq dağıldı. ATƏT-in Minsk Qrupunun faktiki olaraq dağılması isə bütövlükdə müsbət hadisədir.
Zaxarovanın Fransaya qarşı qərəzli mövqeyi isə Trampın Rusiya ilə yaxınlaşmaq siyasəti yürütməsindən sonra Rusiyaya qarşı bloka liderliyi Fransanın öz üzərinə götürməsi ilə bağlıdır. Digər səbəb Ermənistanın Avropa İttifaqına inteqrasiya kursu götürməsidir.
Zaxarovanın birbaşa rəhbəri olan xarici işlər naziri Sergey Lavrovun Qazaxıstan prezidenti Kasım-Jomart Tokayevin 2022-ci ilin iyununda Sankt-Peterburq Beynəlxalq İqtisadi Forumunda dövlətlərin sarsılmaz ərazi bütövlüyü prinsipini əsas götürülməsi ilə bağlı fikirinə üç il sonra münasibət bildirərək millətlərin öz müqəddəratını təyin etmə hüququna hörmət edilməsinin zərurliyini önə çəkməsi Moskvanıln postsovet məkanında separatçılığı körükləmək siysətindən əl çəkmədiyini göstərir.
Fransanın Azərbaycana qarşı ədalətsiz mövqeyinə görə Zaxarovanın sözləri bizi aldatmamalıdır. Aldada da bilməz. Azərbaycana qarşı erməni düşmənçiliyini yaradanıň, yaşadanın, istifadə edənin Rusiya olduğu hər kəsə aydındır. Avropa ilə təkbaşına rəqabət apara bilməyəcəyinə görə Moskva özünə müttəfiq tapmağa çalışır. Ancaq Azərbaycanı belə səviyyəsiz siyasətlə aldada bilməz".
Akif NƏSİRLİ
