ABŞ-ın Suriyadan çəkilməsi kimə qarşı çevrilib?..
Ramil Məmmədli: “Tramp bu addımı atmaqla iki müttəfiqi arasında qalmaq istəmir”
ABŞ qoşunlarının Suriyadan çıxarılması xəbərləri fonunda Birləşmiş Ştatlar Koniko hərbi bazasını tərk edəcək. Bir neçə gün əvvəl ABŞ Suriyanın Deyr əz-Zor əyalətinin şimal-şərqindəki Koniko hərbi bazasından öz qüvvələrini çıxarmağa başlayıb. Məlum olub ki, aprelin 13-də adıçəkilən bazanı 200-dən çox texnika, o cümlədən ağır texnika və tankerlər tərk edib.
Eyni zamanda, “Reuters” Agentliyi iki amerikalı rəsmiyə istinadən xəbər verib ki, ABŞ Suriyadakı qoşunlarının sayını 50 faiz azaldacaq. Qeyd olunur ki, hazırda ölkədə bir neçə bazada 2000 hərbi qulluqçu yerləşdirilib, onların sayının 1000-ə endirilməsi planlaşdırılır.
Maraqlıdır, Tramp qoşunları niyə Suriyadan çıxardır? Kimə acıq edir - İsrailə, yoxsa Türkiyəyə?
“Başqa bir səbəb odur ki, Vaşinqton artıq Suriyada kürdlərə təhlükə görmür”
Sözügedən məsələyə aydınlıq gətirən hərbi ekspert Ramil Məmmədli “Bakı-Xəbər”ə açıqlamasında bildirdi ki, burada bir sıra səbəblər var: “Əvvəla, Tramp hələ seçki kampaniyası dönəmində ABŞ qoşunlarını Suriyadan çıxaracağını vəd etmişdi. Əslində Tramp birinci prezidentliyi (2017-2020) dönəmində qoşunları çıxarmaq istəyirdi, amma müəyyən səbəblərdən bu baş vermədi. Baydenin 2020-ci ildə seçilməsi işi yarımçıq saxladı. Nəzərə alsaq ki, Tramp ABŞ xərclərini azaltmağı qarşısına məqsəd qoyub və neçə vaxtdır bu istiqamətdə konkret addımlar atır. Çünki Suriya və digər ölkələrdə qoşun saxlamaq əlavə xərcdir. Digər tərəfdən, Tramp bu addımı atmaqla iki müttəfiqi olan İsrail və Türkiyə arasında qalmaq istəmir. Məlum olduğu kimi, İsrail ABŞ qoşunlarının Suriyadan çıxarılmasına qarşıdır. Hesab edirlər ki, bu, Türkiyənin Suriyada təsir imkanlarını genişləndirilməsinə gətirib çıxaracaq. Türkiyə isə qoşunların çıxarılmasının tərəfdarıdır. Başqa bir səbəb odur ki, Vaşinqton artıq Suriyada kürdlərə təhlükə görmür. Yeni hakimiyyət Birləşmiş Ştatların dəstəklədiyi kürdlərlə münasibətləri yaxşı tutmaq istəyir. Bir ay əvvəl Suriya hökuməti ilə YPG qruplaşması arasında razılıq sənədi imzalanıb. Sənəd səkkiz maddədən ibarətdir. Mətndə göstərilir ki, dini və etnik mənsubiyyətindən asılı olmayaraq bütün suriyalıların dövlət qurumlarında təmsil olunmaq və səlahiyyətləri əsasında siyasi proseslərdə iştirak etmək hüquqları təmin edilməlidir. Həmçinin qeyd olunub ki, kürd icması Suriya dövlətində vacib bir cəmiyyətdir və Suriya dövləti kürd icmasının vətəndaşlıq hüquqlarını və bütün konstitusiya hüquqlarını təmin edir. Razılığa görə, bütün Suriya ərazisində atəşkəs təmin olunmalıdır. Suriyanın şimal-şərqindəki bütün mülki və hərbi qurumların sərhəd qapıları, hava limanları, neft və qaz yataqları daxil olmaqla, Suriya dövlətinin idarəçiliyinə inteqrasiya olunmalıdır. Fikrimcə, ABŞ-ın qoşunlarını Suriyadan çıxarmasının səbəblərindən biri də budur”.
Vidadi ORDAHALLI
